ଭୁବନେଶ୍ୱର,୨୮ା୧୧(ବ୍ୟୁରୋ): ରାଜ୍ୟର ଜମି, ଜଳ, ଜଙ୍ଗଲକୁ ବ୍ୟବହାର କରି ସଂଖ୍ୟାଧିକ କମ୍ପାନୀ ଶିଳ୍ପ ସମୃଦ୍ଧ ହୋଇଛନ୍ତି। ହେଲେ ସେହି ପରିମାଣରେ ରାଜ୍ୟର ମାନବ ସମ୍ବଳକୁ ନିଯୁକ୍ତି ଦେବାରେ ବିଫଳ ହୋଇଛନ୍ତି। ଦଳମତ ନିର୍ବିଶେଷରେ ବିଧାୟକମାନେ ଶୂନ୍ୟକାଳରେ ବୁଧବାର ବିଧାନସଭାରେ ଏହି ପ୍ରସଙ୍ଗ ଉଠାଇଥିଲେ।
ଶିଳ୍ପସଂସ୍ଥାରେ ଅଣକୁଶଳୀ ଶ୍ରମିକମାନଙ୍କ ପାଇଁ ୯୦ ପ୍ରତିଶତ ନିଯୁକ୍ତି ନେଇ ସରକାରୀ ନିର୍ଦ୍ଦେଶନାମା ରହିଛି। ହେଲେ ଏହାକୁ ସଂପୃକ୍ତ ଶିଳ୍ପସଂସ୍ଥାଗୁଡ଼ିକ ଅଣଦେଖା କରୁଥିବା ଅଭିଯୋଗ ହେଉଛି। ଏପରି କି ରାଜ୍ୟ ସରକାର ସ୍ଥାନୀୟ ନିଯୁକ୍ତି ସମ୍ପର୍କରେ ସ୍ପଷ୍ଟୀକରଣ ପାଇଁ ମଧ୍ୟ କେତେକ ସଦସ୍ୟ ଦାବି କରିଥିଲେ। ସରକାରୀ ଦଳରୁ କିଶୋର ମହାନ୍ତି, ବ୍ରଜ କିଶୋର ପ୍ରଧାନ ପ୍ରମୁଖ ଏମ୍ସିଏଲ୍କୁ ଟାର୍ଗେଟ କରିଥିଲେ। ସେହିପରି ଭାଜପା ବିଧାୟିକା କୁସୁମ ଟେଟେ ଏନ୍ଟିପିସିକୁ ଟାର୍ଗେଟ କରିଥିଲେ। ଯଦି ଏହି ସ୍ଥାନୀୟ ନିଯୁକ୍ତି ସମସ୍ୟାର ସମାଧାନ ନ ହୁଏ, ତେବେ ଆଗାମୀ ଦିନରେ ଝାରସୁଗୁଡାରେ ଆଇନ ଶୃଙ୍ଖଳା ପରିସ୍ଥିତି ସୃଷ୍ଟି ହେବାର ଆଶଙ୍କା ରହିଥିବା କିଶୋର ମହାନ୍ତି ଚେତାବନୀ ଦେଇଛନ୍ତି। ଗତ ନଭେମ୍ବର ୨୪ରେ ୨୩୭୩ ଜଣ ଏମ୍ସିଏଲ୍ ପକ୍ଷରୁ ନିଯୁକ୍ତି ପାଇଛନ୍ତି, ତନ୍ମଧ୍ୟରୁ ମାତ୍ର ୧୦ ଜଣ ଓଡ଼ିଶାର। ଯେଉଁମାନେ ଏମ୍ସିଏଲ୍ ପାଇଁ ଜମି ହରାଇଛନ୍ତି, ସେମାନେ ନିଯୁକ୍ତିରୁ ବଞ୍ଚିତ ହେବା ଦୁର୍ଭାଗ୍ୟଜନକ ବୋଲି କିଶୋର କହିଛନ୍ତି। ବିଜେଡି ସଭ୍ୟ ଅମର ପ୍ରସାଦ ଶତପଥୀ ଏ ପ୍ରସଙ୍ଗରେ ବାଚସ୍ପତି ଏକ ରୁଲିଂ ପ୍ରଦାନ କରନ୍ତୁ ବୋଲି ଦାବି କରିଥିଲେ। ବାଚସ୍ପତି ସୂର୍ଯ୍ୟନାରାୟଣ ପାତ୍ର ମଧ୍ୟ ଏହି ଘଟଣାରେ ଖଣି ବିଭାଗ ଅନୁଧ୍ୟାନ କରୁ ବୋଲି ନିର୍ଦ୍ଦେଶ ଦେଇଥିଲେ।
