ମୁମ୍ବାଇ: ଅଭିନେତା ଶାହିଦ କପୁରଙ୍କ ଅଭିନୀତ ‘କବିର ସିଂ’ ରିଲିଜର ପ୍ରଥମ ଦିନରେ ହିଁ ୨୦କୋଟି ଟଙ୍କା ଅର୍ଜନ କରିପାରିଛି। ଏହାଦ୍ୱାରା ଶାହିଦ କପୁର ନିଜ କ୍ୟାରିୟରରେ ସବୁଠୁ ବଡ଼ ସଫଳତା ଅର୍ଜନ କରିପାରିଛନ୍ତି। ଫିଲ୍ମ ନିର୍ମାତାଙ୍କ କହିବାନୁଯାୟୀ, କବିର ସିଂ ହେଉଛି ତେଲୁଗୁ ଫିଲ୍ମ ‘ଅର୍ଜୁନ ରେଡ୍ଡୀ’ର ରିମେକ୍। ଶୁକ୍ରବାର ଏହା ମୁକ୍ତିଲାଭ କରିଥିବାବେଳେ ୨୦.୨୧ କୋଟି ଅର୍ଜନ କରିପାରିଛି। ସନ୍ଦୀପ ରେଡ୍ଡୀ ଭାଙ୍ଗାଙ୍କ ନିର୍ଦ୍ଦେଶିତ ଏହି ଫିଲ୍ମ ଚଳିତବର୍ଷର ଅଳ୍ପ କେତେକ ବକ୍ସ ଅଫିସ ହିଟ୍ ଫିଲ୍ମ ସହ ଯୋଡ଼ି ହୋଇପାରିଛି।
ବ୍ୟବସାୟିକ ବିଶ୍ଳେଷକ ତରନ୍ ଆଦର୍ଶ ଶନିବାର ଟୁଇଟ୍ କରିଛନ୍ତି, ‘କବିର ସିଂ’ ପ୍ରଥମ ଦିନରେ ହିଁ ହିଟ୍ ହୋଇଛି। ଏହାଦ୍ୱାରା ଶାହିଦ କପୁରଙ୍କ ସର୍ବୋତ୍ତମ କ୍ୟାରିୟର ଆରମ୍ଭ ହୋଇଛି। ଏହା ମଧ୍ୟ ‘ପଦ୍ମାବତ୍’ର ପ୍ରଥମ ଦିନ ରିଲିଜର ଆୟ (୧୯କୋଟି)କୁ ଟପିଯାଇଛି। ୨୦୧୯ରେ ‘ଟୋଟାଲ ଧମାଲ୍’ (ଅଣଛୁଟିଦିନ ରିଲିଜ)ର ପ୍ରଥମ ଦିନର ଆୟ (୧୬.୫୦ କୋଟି)କୁ ମଧ୍ୟ ଅତିକ୍ରମ କରିଯାଇଛି। ଫିଲ୍ମ ଦେଖିବାକୁ ତରୁଣ ଦର୍ଶକଙ୍କ ମଧ୍ୟରେ ଅହେତୁକ ଆଗ୍ରହ ବୃଦ୍ଧିପାଇଥିବାରୁ ଏତେଟା ସଫଳତା ମିଳିଥିବା ଆଦର୍ଶ ପ୍ରକାଶ କରିଛନ୍ତି। ତାଙ୍କ କହିବାନୁଯାୟୀ, ଭାରତର ୩,୧୨୩ ପ୍ରେକ୍ଷାଳୟରେ ଏହା ରିଲିଜ ହୋଇଛି।
ମୂଳ ଫିଲ୍ମରେ ଅଭିନେତା ବିଜୟ ଦେବେରକୋଣ୍ଡା ଏବଂ ଅଭିନେତ୍ରୀ ଶାଲିନୀ ପାଣ୍ଡେ ଅଭିନୟ କରିଥିବାବେଳେ ଏହାର ହିନ୍ଦୀ ରିମେକ୍ରେ ଅଭିନୟ କରିଛନ୍ତି ଶାହିଦ ଏବଂ କିୟାରା ଆଡଭାନୀ। ‘କବିର ସିଂ’ରେ କବିର (ଶାହିଦ) ଜଣେ ଶେଷବର୍ଷ ମେଡିକାଲ ଛାତ୍ର। ସେ ତାଙ୍କ ଜୁନିୟର ଛାତ୍ରୀ ପ୍ରୀତି (କିୟାରା)ଙ୍କ ପ୍ରେମରେ ପଡ଼ିଯାଇଛନ୍ତି। ଉକ୍ତ ଫିଲ୍ମକୁ ମିଳିତ ଭାବେ ପ୍ରସ୍ତୁତ କରିଛନ୍ତି ଭୂଷଣ କୁମାର, ମୁରାଦ ଖେତାନି, କ୍ରିଷନ୍ କୁମାର ଏବଂ ଅଶ୍ୱିନ୍ ଭାର୍ଦେ।
