ଭୁବନେଶ୍ୱର,୧୪।୨(ବ୍ୟୁରୋ): ବିଧାନସଭା ବଜେଟ ଅଧିବେଶନ ଶୁକ୍ରବାରଠାରୁ ଆରମ୍ଭ ହୋଇ ଦୁଇଟି ପର୍ଯ୍ୟାୟରେ ଚାଲିବ। ଏହା ପୂର୍ବରୁ ଶାସକ ଦଳକୁ ଘେରିବା ଲାଗି ରାଜ୍ୟ ଭାଜପା ବିଧାୟକ ଦଳ ବୈଠକ ଦଳୀୟ କାର୍ଯ୍ୟାଳୟଠାରେ ଅନୁଷ୍ଠିତ ହୋଇଛି। ବିରୋଧୀ ଦଳ ନେତା ପ୍ରଦୀପ୍ତ ନାଏକଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ରାଜ୍ୟର ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଛି। ମୁଖ୍ୟତଃ ଚଳିତ ବିଧାନସଭା ଅଧିବେଶନରେ ପ୍ରଧାନମନ୍ତ୍ରୀ ଆବାସ ଯୋଜନାକୁ ନିଜସ୍ବ ଯୋଜନାର ନାମ ଦେଇ ରାଜ୍ୟ ସରକାର ଅନିୟମିତତା କରୁଥିବା ପ୍ରସଙ୍ଗ ଦଳ ଗୃହରେ ଉଠାଇବ। ଏହାସହ ଶାସକ ଦଳ କିଛିଦିନ ହେବ ରେଳ ବଜେଟରେ ଓଡ଼ିଶାକୁ ଗତଥର ଅପେକ୍ଷା କମ୍ ଅନୁଦାନ ଦିଆଯାଇଥିବା ଅଭିଯୋଗ କରିଆସୁଛି। ଶାସକ ଦଳ ସହ କଂଗ୍ରେସ ମଧ୍ୟ ଏହି ପ୍ରସଙ୍ଗରେ ସ୍ବର ଉଠାଇବାରେ ଲାଗିଛି। ତେଣୁ ଏହି ବିଷୟକୁ କାଉଣ୍ଟର ଦେବା ସକାଶେ ଭାଜପା ପ୍ରସ୍ତୁତ ହୋଇଛି। ରେଳ ବିସ୍ତାର ପାଇଁ ଜମି ଅଧିଗ୍ରହଣରେ ଅହେତୁକ ବିଳମ୍ବ ହେଉଥିବାରୁ ଅନୁଦାନ ମିଳିବାରେ ବିଳମ୍ବ ହେଉଛି ବୋଲି ଭାଜପା ନେତାମାନେ ଯୁକ୍ତି ରଖିବେ। ଏହାସହ ପଛୁଆବର୍ଗଙ୍କ ପାଇଁ ସଂରକ୍ଷଣ ବ୍ୟବସ୍ଥା, ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି, ମହିଳା ସୁରକ୍ଷା, ସୂଚନା ଅଧିକାର କର୍ମୀଙ୍କୁ ଯୋଜନାବଦ୍ଧ ହତ୍ୟା ଆଦି ପ୍ରସଙ୍ଗରେ ଶାସକ ଦଳକୁ କାଠଗଡ଼ାରେ ଛିଡ଼ା କରାଯିବ ବୋଲି ଭାଜପା ମୁଖ୍ୟ ସଚେତକ ମୋହନ ମାଝି ସୂଚନା ଦେଇଛନ୍ତି।
ଏହାସହ ଅନ୍ୟ ରାଜ୍ୟରେ ପଛୁଆବର୍ଗକୁ ଶିକ୍ଷା ଓ ନିଯୁକ୍ତି କ୍ଷେତ୍ରରେ ମିଳୁଥିବା ସଂରକ୍ଷଣ ଓଡ଼ିଶା ସରକାର ଲାଗୁ କରୁନାହାନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଜ୍ୟର ଗରିବ ଲୋକଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ଯୋଗାଇଦେବା ପାଇଁ ପର୍ଯ୍ୟାପ୍ତ ଅର୍ଥ ଦେଉଛନ୍ତି। ମାତ୍ର ଏହି ଯୋଜନାରେ ରାଜ୍ୟରେ ଅନିୟମିତା ହେଉଛି। ଏ ନେଇ କେନ୍ଦ୍ରମନ୍ତ୍ରୀ ନରେନ୍ଦ୍ର ସିଂ ତୋମାରଙ୍କୁ ଭାଜପା ଏମ୍ପିମାନେ ଭେଟି ଏହିସବୁ ଅନିୟମିତତା ରୋକିବା ଲାଗି ଅନୁରୋଧ କରିଛନ୍ତି। ଏହି ପ୍ରସଙ୍ଗ ଉପରେ ହିଁ ଭାଜପା ବିଧାୟକମାନେ ଜୋର୍ ଦେବେ। ସରକାରଙ୍କ ଟୋକନ ଓ ଟାର୍ଗେଟ୍ ବ୍ୟବସ୍ଥା ଯୋଗୁ ରାଜ୍ୟର ବିଭିନ୍ନ ମଣ୍ଡିରେ ହଜାର ହଜାର କୁଇଣ୍ଟାଲ ଧାନ ପଡ଼ିରହୁଛି। ଚାଷୀ ଧାନ ଅମଳ କରି ବିକିବାକୁ ବସିଥିବାବେଳେ କେଉଁଠି ମଣ୍ଡି ନାହିଁ ତ ଅନ୍ୟ କେଉଁଠି ମଣ୍ଡିରେ ବ୍ୟାପକ ଅବ୍ୟବସ୍ଥା ଦେଖାଯାଇଛି। ଶାସକ ଦଳ ଓ ଅସାଧୁ ବ୍ୟବସାୟୀଙ୍କ ମଧୁଚନ୍ଦ୍ରିକାର ଶିକାର ହୋଇ ଚାଷୀ ନିଜ ହକ୍ ପାଇବାରୁ ବଞ୍ଚିତ ହେଉଛନ୍ତି। ମଣ୍ଡି ଅଭାବରୁ ସରକାରଙ୍କ ଦ୍ୱାରା ଧାର୍ଯ୍ୟ ଏମ୍ଏସ୍ପିରୁ କମ୍ ଦରରେ ଚାଷୀ ନିଜର ଉପତ୍ାଦିତ ଧାନକୁ ବିକ୍ରି କରୁଛନ୍ତି। ଗତ କିଛିଦିନରେ ରାଜ୍ୟର ୨ଜଣ ସୂଚନା ଅଧିକାର କର୍ମୀଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଛି। ଦୁର୍ନୀତି ବିରୋଧୀ ଅଭିଯାନ ଚଳାଇଥିବା ସୂଚନା ଅଧିକାର କର୍ମୀମାନଙ୍କୁ ହତ୍ୟା କରାଯାଉଥିବା ବେଳେ ପୋଲିସ ହାତ ବାନ୍ଧି ବସିଛି। ଅପରାଧୀଙ୍କ ବିରୋଧରେ ପୋଲିସ ନରମ ଭାବ ପ୍ରଦର୍ଶନ କରୁଥିବା ଅଭିଯୋଗରେ ଶାସକ ଦଳକୁ ଟାର୍ଗେଟ କରାଯିବ ବୋଲି ମାଝି କହିଛନ୍ତି। ସ୍ମିତାରାଣୀ ହତ୍ୟାକାଣ୍ଡ ଘଟଣାକୁ ନେଇ ମଧ୍ୟ ଶାସକ ଦଳକୁ ପ୍ରଶ୍ନ ପଚରାଯିବ ବୋଲି ସେ କହିଛନ୍ତି।
