ଢେଙ୍କାନାଳ ଅଫିସ, ୧୪।୬-ରାଜ୍ୟ ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ଆନୁକୁଲ୍ୟରେ ପ୍ରଥମ ଥର ଆୟୋଜନ କରାଯାଇଥିବା ଲୋକକଳା ଦିବସ ନୂତନ ଅଧ୍ୟାୟ ସୃଷ୍ଟି କରିଛି। କଳାକାରଙ୍କ ଆର୍ଥତ୍କ, ସାମାଜିକ ଏବଂ କଳା ନୈପୁଣ୍ୟତାର ବିକାଶ ପାଇଁ ଆଗାମୀ ଦିନରେ କାର୍ଯ୍ୟ କରାଯିବ। ପାରମ୍ପରିକ କଳାକୁ ସଂରକ୍ଷଣ କରିବା ଦିଗରେ ପଦକ୍ଷେପ ଗ୍ରହଣ କରାଯିବ। ଲୋକ କଳାର ସମୃଦ୍ଧି ପାଇଁ ପ୍ରତିମାସରେ ପ୍ରଶିକ୍ଷଣ ଦିଆଯିବ। ନିୟମିତ ବୈଠକ ଆୟୋଜନ କରି ଏହାକୁ ପ୍ରୟୋଗଶାଳାରେ ପରିଣତ କରାଯିବ ବୋଲି କହିଛନ୍ତି ଢେଙ୍କାନାଳ ଜିଲାପାଳ ତଥା ଜିଲା କଳାସଂସ୍କୃତି ସଂଘ ସଭାପତି ନିଖିଲ ପଓ୍ବନ କଲ୍ୟାଣ। ଜିଲା ଶିକ୍ଷାଧିକାରୀଙ୍କ ସମ୍ମିଳନୀ କକ୍ଷରେ ଶୁକ୍ରବାର ପୂର୍ବାହ୍ନରେ ଆୟୋଜିତ ଜିଲାସ୍ତରରେ ଲୋକକଳା ଦିବସ-୨୦୧୯ ପାଳନ ଅବସରରେ କାର୍ଯ୍ୟକ୍ରମକୁ ଉଦ୍ଘାଟନ କରିବା ସହ ଜିଲାପାଳ ଏପରି ବକ୍ତବ୍ୟ ରଖିଥିଲେ।
ଜିଲା ସଂସ୍କୃତି ଅଧିକାରୀ ଲକ୍ଷ୍ମୀଧର ରାଉତ ସ୍ବାଗତ ଭାଷଣ ପ୍ରଦାନ କରିଥିଲେ। ଜିଲା କଲା ସଂସ୍କୃତି ସଂଘ ଉପସଭାପତି ଅବନୀ କୁମାର ମିଶ୍ର କାର୍ଯ୍ୟକ୍ରମର ରୂପରେଖ ସମ୍ପର୍କରେ ଆଲୋକପାତ କରିବା ସହ କାର୍ଯ୍ୟକ୍ରମକୁ ସଞ୍ଚାଳନ କରିଥିଲେ। ଜିଲା କଳାସଂସ୍କୃତି ସଂଘ ପକ୍ଷରୁ ଆୟୋଜିତ ଉକ୍ତ କାର୍ଯ୍ୟକ୍ରମରେ ଭୁବନ ବ୍ଲକ ଉପସଭାପତି ଅଶୋକ ସାମଲ, ଗଁଦିଆ ବ୍ଲକ ଉପସଭାପତି କପିଳେଶ୍ୱର ବେହେରା, କାମାକ୍ଷାନଗରର ବିଭୂତି ବିଶ୍ୱାଳ, ହିନ୍ଦୋଳର ବିମଳ ବିଶ୍ୱାଳ, ଓଡ଼ାପଡ଼ାର ଦୁର୍ଯ୍ୟୋଧନ ଜେନା, ପରଜଙ୍ଗର ପ୍ରଭାକର ନାଥ ପ୍ରମୁଖ ଉପସ୍ଥିତ ରହି ନିଷ୍ଠାର ସହିତ କଳାର ପ୍ରଚାର ଓ ପ୍ରସାର କରିବାକୁ କଳାକାରଙ୍କୁ ଆହ୍ବାନ ଦେଇଥିଲେ। ଦୁର୍ଗାଚରଣ ମହାପାତ୍ର ଧନ୍ୟବାଦ ଦେଇଥିଲେ।
ଶେଷରେ ପାଲା ଗାୟିକା ହରପ୍ରିୟା, ବାଳାମଣି ସାଥୀ କଳାକାରଙ୍କ ସହ ପାଲା ପରିବେଷଣ କରିଥିଲେ। ପ୍ରତି ବ୍ଲକରୁ ଆସିଥିବା କଳାକାରମାନେ ଦଣ୍ଡ, ଖଞ୍ଜଣି ଭଜନ, ସଂକୀର୍ତ୍ତନ ଭଳି ପାରମ୍ପରିକ ଲୋକକଲା ପରିବେଷଣ କରିଥିଲେ।
