ମୋଞ୍ଜା (ଇଟାଲୀ), ୮ା୯ (ଏଏଫ୍ପି)- ଇଟାଲିଆନ ଫର୍ମୁଲା ଓ୍ବାନ ଗ୍ରାଁ ପ୍ରି ମୋଟର ରେସ୍ ପାଇଁ ଫେରାରିର ଚାଲର୍ସ ଲେକ୍ରେକ୍ ପୋଲ ପୋଜିଶନ ହାସଲ କରିଛନ୍ତି। ପ୍ରଥମ ସ୍ଥାନ ପାଇଁ ୫ଥର ଚାମ୍ପିୟନ ଲୁଇସ୍ ହାମିଲଟନଙ୍କ ସହିତ ତାଙ୍କର ତୀବ୍ର ପ୍ରତିଯୋଗିତା ହୋଇଥିଲା। ତେବେ ହାମିଲଟନ ଦ୍ୱିତୀୟ ସ୍ଥାନରେ ରହିଥିଲେ। ଫେରାରିର ସେବାଷ୍ଟିଆ ଭେଟେଲଙ୍କୁ ପଛରେ ପକାଇ ମର୍ସିଡିଜ୍ର ଭାଲ୍ଟେରି ବୋଟାସ ତୃତୀୟ ହୋଇଥିଲେ। ରେନଲ୍ଟର ଦୁଇ ଡ୍ରାଇଭର ଡାନିଏଲ ରିକାର୍ଡୋ ଏବଂ ନିକୋ ହକେନବର୍ଗ ୫ମ ଓ ୬ଷ୍ଠ ସ୍ଥାନ ଅଧିକାର କରିଥିଲେ। ସେହିପରି ମ୍ୟାକଲରେନର କାର୍ଲୋସ ସେଞ୍ଜ ଜୁନିୟର, ରେଡ୍ବୁଲ୍ରୁ ଆଲେକ୍ଜାଣ୍ଡର ଆଲ୍ବନ, ରେସିଂ ପଏଣ୍ଟର ଲାନ୍ସ ଷ୍ଟ୍ରୋଲ୍ ଏବଂ ଆଲ୍ଫା ରୋମିଓର କିମି ରାଇକୋନେନ ଯଥାକ୍ରମେ ୭ମ, ୮ମ, ୯ମ ଏବଂ ୧୦ମ ହୋଇଥିଲେ। ସୂଚନାଯୋଗ୍ୟ, ଗତ ସପ୍ତାହରେ ଅନୁଷ୍ଠିତ ବେଲଜିଆନ ଗ୍ରାଁ ପ୍ରିରେ ଲେକ୍ରେକ୍ ତାଙ୍କର ପ୍ରଥମ ଫର୍ମୁଲା ଓ୍ବାନ ଟାଇଟଲ ଜିତିଥିଲେ।
