ବଲାଙ୍ଗୀର ଅଫିସ, ୭ା୫: ଅଖିଳ ଭାରତୀୟ ଆୟୁବିଜ୍ଞାନ ସଂସ୍ଥାନ୍ (ଏମ୍ସ) ଭୁବନେଶ୍ୱର ଶାଖାର ଏକ ରାପିଡ ରେସପନ୍ସ ଟିମ୍ (ଆରଆରଟି) ଗୁରୁବାର ବଲାଙ୍ଗୀର ଜିଲା ଗୁଡଭେଲା ବ୍ଳକ୍ର କଣ୍ଟେମେଣ୍ଟ ଜୋନ୍ ପରିଚିହ୍ନତ ଲିଖିରିଆ, ତୁଷରା ଓ ରୁଷୁଡାରେ ପହଞ୍ଚତ୍ ଅନୁସନ୍ଧାନ ପ୍ରକ୍ରିୟାର ସ୍ଥିତି ତଦାରଖ କରିଛନ୍ତି। ଏହି ଟିମ୍ରେ ଡା ଅରବିନ୍ଦ ସିଂ, ଡା ସୌରିନ୍ ଭୂୟଁା ଓ ଡା ଦୁର୍ଗେଶ ପ୍ରସାଦ ସାହୁ ତିନିଜଣ ସଦସ୍ୟ ଆସିଛନ୍ତି। ଏହି ଟିମ୍ କଣ୍ଟେନମେଣ୍ଟ ଜୋନ୍ରେ କିଭଳି ଭାବେ କରୋନା ସଂକ୍ରମଣ ପରବର୍ତ୍ତୀ ଅନୁସନ୍ଧାନ କାର୍ଯ୍ୟ, ସ୍ବାବ୍ ସଂଗ୍ରହ ଓ କଣ୍ଟ୍ରାକ୍ଟ ଟ୍ରେସିଂ କାର୍ଯ୍ୟକ୍ରମ ଚାଲିଛି ତାହା ତଦାରଖ କରିଛନ୍ତି। ଏହି ଅଞ୍ଚଳରେ ସ୍ବାସ୍ଥ୍ୟ କାର୍ଯ୍ୟକ୍ରମକୁ କିଭଳି ମଜଭୁତ କରାଯିବ ସେନେଇ ମଧ୍ୟ ନିରୀକ୍ଷଣ କରିଛନ୍ତି। ଭୁବନେଶ୍ୱର ଏମ୍ସ ଆରଆରଟି ସହ ବଲାଙ୍ଗୀର ସ୍ବାସ୍ଥ୍ୟ ବିଭାଗର ଏକ ମେଡିକାଲ ଟିମ୍ ମଧ୍ୟ ସମ୍ପୃକ୍ତ ଅଞ୍ଚଳ ଗସ୍ତ କରିଥିଲେ। ଏହି ଟିମ୍ ସଦସ୍ୟ ଡା ଏଲ. ନାୟକ ଓ ଡା ସୁମିତ୍ ମେହେର ଭୁବନେଶ୍ୱର ଆରଆରଟି ସହ ଉପସ୍ଥିତ ଥିଲେ ା ଭୁବନେଶ୍ୱର ଆରଆରଟି ତାମିଲନାଡୁ ଫେରାନ୍ତା ଦୁଇ ଶ୍ରମିକଙ୍କ କଣ୍ଟ୍ରାକ୍ଟ ଟ୍ରେସିଂକୁ ଅନୁଧ୍ୟାନ କରି ସେମାନେ ସଂକ୍ରମିତ ହୋଇଛନ୍ତି ଓ ସଂକ୍ରମଣର ଗତିବିଧି କ’ଣ ରହିଛି କାହା ଅନୁଧ୍ୟାନ କରିଛନ୍ତି। କଣ୍ଟ୍ରାକ୍ଟ ଟ୍ରେସିଂ ତାଲିକା ପ୍ରସ୍ତୁତି ଠିକ୍ ରହିଛି ନା’ ନାହିଁ ଓ ସମସ୍ତଙ୍କ ଠିକ୍ ଅନୁଧ୍ୟାନ ସହ ସ୍ବାବ୍ ସଂଗ୍ରହ ହୋଇଛି କି ନାହିଁ ତାହା ତଦାରଖ କରିଛନ୍ତି। ସେଠାରେ ନିୟୋଜିତ ହୋଇଥିବା ସ୍ବାବ୍ ସଂଗ୍ରହ ଟିମ୍, ସର୍ଭେ କରୁଥିବା ଆଶା, ଅଙ୍ଗନୱାଡି, ଏଏନ୍ଏମ୍ ଟିମ କିଭଳି କାର୍ଯ୍ୟ କରୁଛନ୍ତି ତାହା ମଧ୍ୟ ତଦାରଖ କରିଛନ୍ତି। ଗତ ମେ ୧ ତାରିଖ ଦିନ ଲିଖିରିଆ ଗଁାରେ ତାମିଲନାଡୁ ଫେରନ୍ତା ଦୁଇ ଯୁବ ଶ୍ରମିକଙ୍କ ସ୍ବାବ୍ ପରୀକ୍ଷା ରିପୋର୍ଟ ପଜିଟିଭ ବାହାରିବା ପରେ ଗୁଡଭେଲା ବ୍ଳକ୍, ଦେଓଗଁା ବ୍ଳକ୍ ଓ ତୁଷରା ସହରାଞ୍ଚଳ ସମେତ ୨୨ଟି ଗଁାକୁ ନେଇ କଣ୍ଟେମେଣ୍ଟ ଜୋନ୍ ଓ ବଫର ଜୋନ୍ କରାଯାଇଛି।
