ନୟାଗଡ଼ ଅଫିସ,୨୧ା୯: ନୟାଗଡ଼ ଜିଲା ସଦର ବ୍ଲକ ଲାଠିପଡ଼ାସ୍ଥିତ ଜିଲାର ଏକମାତ୍ର ସରକାରୀ ମଡେଲ ଡିଗ୍ରୀ କଲେଜରେ ଲାଗି ରହିଛି ଅବ୍ୟବସ୍ଥା। ବିଭିନ୍ନ ସମୟରେ ଏ ନେଇ ଛାତ୍ରୀଛାତ୍ରମାନେ କର୍ତ୍ତୃପକ୍ଷଙ୍କୁ ଜଣାଉଥିଲେ ମଧ୍ୟ କୌଣସି ସୁଫଳ ମିଳୁ ନ ଥିଲା । ଫଳରେ ଅବ୍ୟବସ୍ଥାକୁ ନେଇ ଛାତ୍ରମାନଙ୍କ ମଧ୍ୟରେ ବିଭିନ୍ନ ସମୟରେ ଅସନ୍ତୋଷ ଲାଗି ରହିଥିଲା। ଶୁକ୍ରବାର ଏହା ତୀବ୍ର ରୂପ ଧାରଣ କରିଥିଲା। କଲେଜର ନାମଫଳକ ଲଗାଇବା, ସାଇକେଲ୍ ଷ୍ଟାଣ୍ଡ ନିର୍ମାଣ କରିବା, ଛାତ୍ରୀ ଓ ଛାତ୍ରନିବାସକୁ ଖୋଲିବା , ଖେଳପଡ଼ିଆ ନିର୍ମାଣ କରିବା ଭଳି ୪ ଦଫା ଦାବିରେ ଛାତ୍ରମାନେ ଧାରଣା ଦେଇଥିଲେ। ଛାତ୍ରମାନେ କଲେଜ ମୁଖ୍ୟ ଫାଟକରେ ତାଲା ପକାଇ ଧାରଣା ଦେବା ସହ ବିକ୍ଷୋଭ ପ୍ରଦର୍ଶନ କରିଥିଲେ। ମଧ୍ୟାହ୍ନ ୧୨ଟାରୁ ପ୍ରାୟ ୩ ଘଣ୍ଟା ଛାତ୍ରମାନେ ଧାରଣାରେ ବସିବା ପରେ କଲେଜ କର୍ତ୍ତୃପକ୍ଷ ଏହାର ସମାଧାନ ଲାଗି ଆଲୋଚନା କରିବାକୁ ଡାକିବା ପରେ ଧାରଣା ପ୍ରତ୍ୟାହୃତ ହୋଇଥିଲା।
ଯେ, ୧୦ ଅଗଷ୍ଟ ୨୦୧୭ରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡିଓ କନ୍ଫରେନ୍ସିଂ ମାଧ୍ୟମରେ ଉକ୍ତ ମଡେଲ ଡିଗ୍ରୀ କଲେଜକୁ ଉଦ୍ଘାଟନ କରିଥିଲେ। ଏହାପରେ ଉକ୍ତ ମହାବିଦ୍ୟାଳୟରେ ଛାତ୍ରୀଛାତ୍ରମାନଙ୍କୁ ଶିକ୍ଷାଦାନ କରାଯାଇଥିଲା। ୨ ବର୍ଷ ବିତି ଯାଇଥିଲେ ମଧ୍ୟ କଲେଜରେ ବିଭିନ୍ନ ଅବ୍ୟବସ୍ଥା ଲାଗି ରହିଛି। କଲେଜ ପରିସରରେ ଛାତ୍ରୀ ଓ ଛାତ୍ରନିବାସ କରାଯାଇଥିଲେ ମଧ୍ୟ ଏହା ଏପର୍ଯ୍ୟନ୍ତ କାର୍ଯ୍ୟକ୍ଷମ କରାଯାଇ ନାହିଁ। ହଷ୍ଟେଲ ଖୋଲା ନ ହେବା ଯୋଗୁ୍ ବାହାରୁ ଆସୁଥିବା ଛାତ୍ରୀଛାତ୍ରମାନେ ବହୁତ ହଇରାଣ ହେଉଛନ୍ତି। ମଜୁରିଆପଲ୍ଲୀ ଛକଠାରେ ବସ୍ରୁ ଓହ୍ଲାଇ କଲେଜକୁ ଛାତ୍ରୀଛାତ୍ରମାନେ ଚାଲି ଚାଲି ଯାଉଥିବା ଦେଖିବାକୁ ମିଳୁଛି। ମଜୁରିଆପଲ୍ଲୀ ଛକଠାରୁ କଲେଜର ଦୂରତା ପ୍ରାୟ ୧.୫ କିଲୋମିଟର ହୋଇଥିଲେ ମଧ୍ୟ ସେହି ବାଟରେ କୌଣସି ଅଟୋ ଯାଉନାହିଁ। ଫଳରେ ଛାତ୍ରୀଛାତ୍ର ଚାଲି ଚାଲି ଯାଉଥିବା ଧାରଣାଦେଇଥିବା ଛାତ୍ରମାନେ ପ୍ରକାଶ କରିଥିଲେ। ଗତ ଫନିରେ କଲେଜର ନାମଫଳକ ଉଡ଼ି ଯାଇଥିଲେ ମଧ୍ୟ ଏହାକୁ ଲଗାଯାଉ ନାହିଁ। ମହାବିଦ୍ୟାଳୟରେ ସାଇକେଲ୍ ଷ୍ଟାଣ୍ଡ ଓ ଖେଳପଡ଼ିଆ ନ ଥିବା ଯୋଗୁ ଛାତ୍ରୀଛାତ୍ରମାନେ ହଇରାଣ ହେଉଥିବା ପ୍ରକାଶ କରିଥିଲେ। ଉକ୍ତ ମଡେଲ ଡିଗ୍ରୀ କଲେଜରେ ଯୁକ୍ତ ୩ କଳା, ବାଣିଜ୍ୟ ଓ ବିଜ୍ଞାନ ବିଭାଗର ୮୬୯ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଏ ନେଇ କଲେଜ ଅଧ୍ୟକ୍ଷ ନୀଳାଞ୍ଚଳ ସେଠୀଙ୍କୁ ପଚାରିବାରୁ ସେ କୁହନ୍ତି, ନାମଫଳକ ଶନିବାର ଭିତରେ ଲାଗିଯିବ। ହଷ୍ଟେଲ କାର୍ଯ୍ୟ ସରିଥିଲେ ମଧ୍ୟ ଆସବାବପତ୍ର ନ ଥିବା ଯୋଗୁ ଏହାକୁ ଖୋଲାଯାଇ ପାରୁନାହିଁ। ପିଲାମାନେ ଅଭିଯୋଗ କରିଥିବା ସମସ୍ତ ସମସ୍ୟାକୁ ସମାଧାନ କରାଯିବ ବୋଲି ସେ କହିଥିଲେ।
