ପ୍ରେମର ରାସ୍ତାରେ ଚାଲିବା ଏତେ ସହଜ ନୁହେଁ। ଏହି ରାସ୍ତା ଅନେକ ଜାଗାରେ କଣ୍ଟକିତ। ପ୍ରେମ କରିବା ସମୟରେ କେତେବେଳେ ମନରେ ଖୁସିର ମାହୋଲ ସୃଷ୍ଟି ହୁଏ ତ ପୁଣି କେତେବେଳେ ଦୁଃଖ ଅବସାଦର କଳା ବାଦଲ ହଠାତ୍ ମାଡିଆସିଥାଏ। ସେପରି ପରିସ୍ଥିତି ପ୍ରେମରେ ଟ୍ବିଷ୍ଟ ଆଣିଥାଏ। ସେପରି ଏକ ଭିନ୍ନ ଧରଣର କାହାଣୀକୁ ଚଳଚ୍ଚିତ୍ରର ରୂପ ଦିଆଯାଇଛି। ଟାଇଟଲ ରହିଛି ‘ଲଭ୍ ଟ୍ବିଷ୍ଟ’। ଏହି ସିନେମାର କାହାଣୀ, ଚିତ୍ରାନାଟ୍ୟ, ସଂଳାପ ରଚନା କରିବା ସହ ନିର୍ଦ୍ଦେଶନାର ଗୁରୁଦାୟିତ୍ୱ ତୁଲାଇଛନ୍ତି ସଚ୍ଚିଦାନନ୍ଦ ସାମଲ। ନବାଗତ ପ୍ରଯୋଜକ ଅନନ୍ତ କୁମାର ସାମଲ ଫିଲ୍ମଟିର ସଫଳତା ନେଇ ବେଶ୍ ଆଶା ରଖିଛନ୍ତି। ଖାସ୍ କଥା ହେଲା, ଏହି ଚଳଚ୍ଚିତ୍ରରେ ନବାଗତ ଯୋଡି ‘ଦେବ୍-ମନସ୍ମିତା’କୁ ବ୍ରେକ୍ ଦେଇଛନ୍ତି ପ୍ରଯୋଜକ। ଏହି ଫିଲ୍ମରେ ଅଭିନୟ କରିବା ପୂର୍ବରୁ ଭୁବନେଶ୍ୱରସ୍ଥ ଉତ୍କଳ ସଙ୍ଗୀତ ମହାବିଦ୍ୟାଳୟରୁ ଡିଗ୍ରୀ ହାସଲ ପରେ ଦେବ୍ ‘ମନର ମାନସୀ’ ଟାଇଟଲ ବିଶିଷ୍ଟ ସିନେମାର ନିର୍ଦ୍ଦେଶନା ଦେଇସାରିଛନ୍ତି। ଅପରପକ୍ଷରେ ବଡ଼ ପରଦା ପାଇଁ ପ୍ରଥମ ଥର କ୍ୟାମେରା ସାମ୍ନା କରିଛନ୍ତି ନବାଗତା ମନସ୍ମିତା। ଅନନ୍ତ ବିହାରୀ ପ୍ରଡକ୍ସନ ବ୍ୟାନରରେ ନିର୍ମିତ ଏହି ପ୍ରଥମ ସିନେମାରେ ସଂଯୋଜିତ ଗୀତଗୁଡିକୁ ରଚନା କରିଛନ୍ତି ଅରୁଣ ମନ୍ତ୍ରୀ, ବାପୁ ଗୋସ୍ବାମୀ, ଏବଂ ଡ. ନିର୍ମଳ ନାୟକ। ସୁଶୀଲ ଦଳାଇଙ୍କ ସ୍ବର ସଂଯୋଜନାରେ ଗୀତଗୁଡିକ ପାଇଁ କଣ୍ଠଦାନ କରିଛନ୍ତି ହ୍ୟୁମାନ ସାଗର, ଅସୀମା ପଣ୍ଡା, ବିଷ୍ଣୁ ମୋହନ କବି ଏବଂ ତାରିକ ଅଜିଜ୍। ଦେବ୍-ମନସ୍ମିତା ଯୋଡି ବ୍ୟତୀତ ଏଥିରେ ଅଜିତ ଦାସ, ମିହିର ଦାସ, ପୁଷ୍ପା ପଣ୍ଡା, ପ୍ରଜ୍ଞା ଏବଂ କାଳୀ ପ୍ରମୁଖ କଳାକାର ଅଭିନୟ କରିଛନ୍ତି। ଫିଲ୍ମଟି ଖୁବ୍ ଶୀଘ୍ର ପରଦା ଉପରକୁ ଆସିବ ବୋଲି ସୂଚନା ଦେଇଛନ୍ତି ପ୍ରଯୋଜକ।
