ଲଣ୍ଡନ, ୨୯ା୪: ରବିବାର ବିଶ୍ୱପ୍ରସିଦ୍ଧ ୩୯ତମ ଲଣ୍ଡନ ମାରାଥନ୍ରେ ୪୦ହଜାରରୁ ଊର୍ଦ୍ଧ୍ୱ ବ୍ୟକ୍ତି ଭାଗନେଇଥିଲେ। ଅଧିକାଂଶ ଦୌଡାଳି ଗିନିଜ୍ ବିଶ୍ୱରେକର୍ଡ ହାସଲ କରିବାକୁ ଲକ୍ଷ୍ୟ ରଖିଥିଲେ। ସେମାନେ ଦୌଡିବା ପାଇଁ ପ୍ରସ୍ତୁତ ହେଉଥିବା ବେଳେ ଚଳିତବର୍ଷ ବିଶିଷ୍ଟ ଟେନିସ ଖେଳାଳି ଆଣ୍ଡି ମୁରେ ବନ୍ଧୁକରୁ ଗୁଳି ଫୁଟାଇ ଏହାର ଶୁଭାରମ୍ଭ କରିଥିଲେ। ୧୯୮୧ରେ ଲଣ୍ଡନ ମାରାଥନ୍ ଆରମ୍ଭ ହେବା ପରଠାରୁ ଏହା ୧୦୦କୋଟି ପାଉଣ୍ଡ ପାଣ୍ଠି ଉଠାଣ କରିସାରିଲାଣି ବୋଲି ଦୌଡ ଆୟୋଜକ ଭର୍ଜିନ ମନି ପକ୍ଷରୁ ପ୍ରକାଶ ପାଇଛି। ଇଭେଣ୍ଟ ନିର୍ଦ୍ଦେଶକ ହୁଗ୍ ବ୍ରାଶରଙ୍କ କହିବାନୁଯାୟୀ, ବିଶ୍ୱରେ ଅନ୍ୟ କୌଣସି ମାରାଥନ୍ରେ ଏତେସଂଖ୍ୟକ ବ୍ୟକ୍ତି ଅଂଶଗ୍ରହଣ କରନ୍ତି ନାହିଁ। ଏଥିପାଇଁ ପ୍ରତ୍ୟେକ ଦୌଡାଳି, ସମର୍ଥକ, ଦାତା, ଦାତବ୍ୟ ସଂସ୍ଥା, ସ୍ବେଚ୍ଛାସେବୀ, ଆୟୋଜକ, ଦର୍ଶକ ଏବଂ ଷ୍ଟାଫ୍ ମେମ୍ବରଙ୍କୁ ସେ ଧନ୍ୟବାଦ ଦେଇଥିଲେ। କଲ୍ୟାଣମୂଳକ କାର୍ଯ୍ୟ ପାଇଁ ପାଣ୍ଠି ଉଠାଣ ବିଷୟରେ ଉଦ୍ବୋଧନ ଦେଇ ଲଣ୍ଡନ ମେୟର ସାଦିକ ଖାନ୍ ପ୍ରତ୍ୟେକ ଅଂଶଗ୍ରହଣକାରୀଙ୍କୁ ଅଭିନନ୍ଦନ ଜଣାଇଥିଲେ। ପାଣ୍ଠି ଉଠାଣକାରୀ ଏହି ବିଶ୍ୱପ୍ରସିଦ୍ଧ ଲଣ୍ଡନ ମାରାଥନ୍ ୩୮ବର୍ଷ ମଧ୍ୟରେ ଲକ୍ଷାଧିକ ଲୋକଙ୍କୁ ସହାୟତା କରିଥିବା ସେ ପ୍ରକାଶ କରିଥିଲେ।
