ଭୁବନେଶ୍ୱର, ୨୨।୪(ବ୍ୟୁରୋ): ଲକ୍ଡାଉନ୍ ଖୋଲିବା ପରେ ବାହାର ରାଜ୍ୟରେ ଫସି ରହିଥିବା ଓଡ଼ିଆ ରାଜ୍ୟକୁ ଫେରିବେ। ଆକଳନ ଅନୁଯାୟୀ ଓଡ଼ିଶାକୁ ବାହାରୁ ପ୍ରାୟ ୫ଲକ୍ଷ ଓଡ଼ିଆ ଆସିବାର ସମ୍ଭାବନା ରହିଛି। ତେବେ ସେମାନେ କିଭଳି ଆସିପାରିବେ ସେନେଇ ପଞ୍ଚାୟତିରାଜ ସଚିବ ବିସ୍ତୁତ ସୂଚନା ଦେଇଛନ୍ତି। ସେମାନଙ୍କୁ ପ୍ରଥମେ ରେଜିଷ୍ଟ୍ରେଶନ କରିବାକୁ ପଡ଼ିବ। ଏଥିପାଇଁ ୨୪ତାରିଖରୁ ସ୍ବତନ୍ତ୍ର ପୋର୍ଟାଲ ଖୋଲିବେ। ଏଥିରେ ସେମାନେ ନିଜେ ବା ତାଙ୍କର କେହି ଏହି ପଞ୍ଜୀକରଣ କରାଇପାରିବେ। ତାଙ୍କର କେହି ସମ୍ପର୍କୀୟ ମଧ୍ୟ ପଞ୍ଚାୟତ ଅଫିସରରେ ଫର୍ମ ଦେଇପାରିବେ। ପଞ୍ଜୀକରଣ ପରେ ଯେବେ ଆସିବେ, ବିଭକ୍ତିକରଣ କରାଯାଇପାରିବ। ପଞ୍ଚାୟତଓ୍ବାରୀ ଆସିବେ, ଷ୍ଟେଶନକୁ ଗାଡ଼ି ନେଇ ପ୍ରବାସୀଙ୍କୁ ଅଣାଯିବ। ପଞ୍ଚାୟତ ଅଧିକାରୀ ଷ୍ଟେଶନ ଯିବେ। ଗାଡ଼ି କରି ସେମାନଙ୍କୁ ଆଣିବେ। ସେମାନେ ଘରକୁ ଯାଇପାରିବେ ନାହିଁ। ପଞ୍ଚାୟତ କ୍ୱାରାଣ୍ଟାଇନ୍ ସେଣ୍ଟରରେ ରହିବେ। ୧୪ ଦିନ ମଧ୍ୟରେ ସେମାନଙ୍କର ସାମ୍ପୁଲ ଟେଷ୍ଟ କରାଯିବ। ପ୍ରବାସୀଙ୍କୁ ହୋମ୍ କ୍ୱାରାଣ୍ଟାଇନ୍ ମନା। ସେମାନେ ସରକାରୀ କ୍ୱାରାଣ୍ଟାଇନ୍ରେ ରହିବେ। ସ୍ବାସ୍ଥ୍ୟ କର୍ମୀ ପଞ୍ଚାୟତ କ୍ୟାମ୍ପ ଯିବେ, ସେମାନଙ୍କ ସ୍ବାସ୍ଥ୍ୟ ପରୀକ୍ଷା କରିବେ।
ପ୍ରକାଶ ଯେ, ସରପଞ୍ଚ ନିଜ ପଞ୍ଚାୟତକୁ ଆସିବାକୁ ଥିବା ଲୋକମାନଙ୍କ ସମ୍ଭାବନାକୁ ଦୃଷ୍ଟିରେ ରଖି କ୍ୱାରାଣ୍ଟାଇନ୍ ବ୍ୟବସ୍ଥା କରିବାକୁ ପଡ଼ିବ। ରାଜ୍ୟ ସରକାର ଏଥିପାଇଁ ୨୪ତାରିଖରେ ଏକ ପୋର୍ଟାଲ ଖୋଲିବେ। ସେଥିରେ ଆସୁଥିବା ସମସ୍ତ ଲୋକଙ୍କ ଆତ୍ମୀୟ ଓ ପରିବାର ପଞ୍ଜୀକରଣ କରିବେ ତାହା ସୁନିଶ୍ଚିତ କରିବା ସରପଞ୍ଚଙ୍କ ଦାୟିତ୍ୱ। ସବୁ ପଞ୍ଚାୟତ ପାଇଁ ଜଣେ ଜଣେ ନୋଡ଼ାଲ ଅଫିସର ରହିବା ସହ ବିଡିଓମାନେ ପଞ୍ଚାୟତରେ ତଦାରଖ ପାଇଁ ଏକ ୫ଜଣିଆ ଟିମ୍ ଗଠନ କରିବାକୁ କାର୍ଯ୍ୟକ୍ରମରେ ମତ ପ୍ରକାଶ ପାଇଛି। ଏହାଛଡ଼ା ମୁଖ୍ୟମନ୍ତ୍ରୀ ସରପଞ୍ଚମାନଙ୍କୁ କ୍ଷମତା ଦେବା ପରେ ସେମାନେ ଗ୍ରାମାଞ୍ଚଳରେ ଜଣେ ଜଣେ କୋଭିଡ ଯୋଦ୍ଧା ଭାବେ କାମ କରିବେ ବୋଲି ବୁଧବାର ଆୟୋଜିତ ଶପତପାଠ ଉତ୍ସବରେ କୁହାଯାଇଥିଲା।
