ଭୁବନେଶ୍ୱର, ୨୨।୯(ବ୍ୟୁରୋ): ଟ୍ରେନ, ଷ୍ଟେଶନ ପରିସର ଓ କାର୍ଯ୍ୟାଳୟରେ ପ୍ଲାଷ୍ଟିକ ବ୍ୟବହାରକୁ ନିଷିଦ୍ଧ କରିଛି ରେଳ ବିଭାଗ। ୨୧ ଅଗଷ୍ଟରେ ରେଲ୍ଓ୍ବେ ବୋର୍ଡ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଥିବାବେଳେ କିଛ ଷ୍ଟେଶନକୁ ପ୍ଲାଷ୍ଟିକମୁକ୍ତ ଘୋଷଣା କରାଯାଇଛି। ଆଗକୁ ସମସ୍ତ ଷ୍ଟେଶନରେ ପ୍ଲାଷ୍ଟିକ ପାଣି ବୋତଲ କ୍ରସିଂ ମେଶିନ ଲଗାଇବାକୁ ବୋର୍ଡ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଥିବା ବେଳେ ବିଭିନ୍ନ ସମୟରେ ପ୍ଲାଷ୍ଟିକ ବର୍ଜନ ପାଇଁ କର୍ମଚାରୀଙ୍କୁ ଶପଥପାଠ କରାଯାଉଛି। କିନ୍ତୁ ଏଥିପ୍ରତି କେହି ଆଗ୍ରହ ପ୍ରକାଶ କରୁ ନ ଥିବାରୁ ଏହାର କିଛି ବି ସୁଫଳ ମିଳିପାରୁନି। ଅନ୍ୟପକ୍ଷେ ସଚେତନତା ଅଭାବରୁ ଭୁବନେଶ୍ୱର ରେଳ ଷ୍ଟେଶନରେ ଲାଗିଥିବା ପ୍ଲାଷ୍ଟିକ ବୋତଲ କ୍ରସିଂ ମେଶିନ କୌଣସି କାର୍ଯ୍ୟରେ ଆସିପାରୁନି। ଷ୍ଟେଶନରର ପ୍ଲାଟଫର୍ମ ନଂ.୧ ଓ ନଂ. ୬ରେ ଦୁଇଟି କ୍ରସିଂ ମେଶିନ ଲଗାଯାଇଛି। ଏହା କିଛି ଦିନ ପର୍ଯ୍ୟନ୍ତ ଠିକ୍ ଚାଲିଥିଲା। ଲୋକଙ୍କୁ ସଚେତନତା ସହ ପ୍ରୋତ୍ସାହିତ କରାଯାଉଥିଲା। କ୍ରସିଂ ମେଶିନରେ ବୋତଲ ପକାଇବା ଲାଗି ଯାତ୍ରୀଙ୍କୁ ଉତ୍ସାହିତ କରିବାକୁ ଯାତ୍ରୀଙ୍କୁ ମୋବାଇଲ ଟକ୍ଟାଇମ ମିଳୁଥିଲା। ଏବେ ନା ସଚେତନତା ଅବା ପ୍ରୋତ୍ସାହନ ସବୁକିଛି ବନ୍ଦ। ଏଥିସହ ପ୍ରାୟତଃ ବନ୍ଦ ହୋଇଯାଇଛି ମେଶିନ ବ୍ୟବହାର। କାରଣ ଯାତ୍ରୀମାନେ ଏହି କ୍ରସିଂ ମେଶିନ ବିଷୟରେ ସମ୍ପୂଣ୍ଣ ଅଜଣା ରହିଥିବା ଜାଣିବାକୁ ମିଳିଛି।
ସୂଚନାଯୋଗ୍ୟ, କ୍ରସିଂ ମେଶିନରେ ୨ ଲିଟର ପର୍ଯ୍ୟନ୍ତ ପ୍ଲାଷ୍ଟିକ ବୋତଲ ପକାଇଲେ ତାହା ଗୁଣ୍ଡ ହୋଇଯାଇଥାଏ। ପରେ ଏଥିରୁ ଲମ୍ବା ସମୟ ପର୍ଯ୍ୟନ୍ତ ବ୍ୟବହାର ହୋଇପାରୁଥିବା ପ୍ଲାଷ୍ଟିକ ସାମଗ୍ରୀ ଓ ଟି-ଶାର୍ଟ ପ୍ରସ୍ତୁତ କରାଯାଏ। ଭୁବଶ୍ୱେର ରେଳ ଷ୍ଟେଶନର ପ୍ଲାଟଫର୍ମ.୧ରେ ଥିବା ମେଶିନଟି ଅଧିକାଂଶ ସମୟ ଅଚଳ ହୋଇଯାଉଛି। ଗତ ସୋମବାର ମେଶିନ ମରାମତି ହୋଇଥିବାବେଳେ ଶୁକ୍ରବାରଠାରୁ ପୁଣି ଖରାପ ହୋଇଛି। ମେଶିନ ଚାଲୁଛି, କିନ୍ତୁ ବୋତଲ ପକାଇଲେ ଭିତରକୁ ଯାଉନି। ମେଶିନ ଅଚଳ ହୋଇପଡିଥିବା ନେଇ କୋଚିଙ୍ଗ ଡିପୋ ଅଫିସର ସାକ୍ୟ ଆଚାର୍ଯ୍ୟ ଜାଣି ନ ଥିବା କହିବା ସହ ଷ୍ଟେଶନ କର୍ତ୍ତୃପକ୍ଷଙ୍କୁ ଜଣାଇଛନ୍ତି ବୋଲି ସଫେଇ ଦେଇଛନ୍ତି। ସେହିପରି ପ୍ଲାଟଫର୍ମ ନଂ.୬ରେ ଥିବା ମେଶିନ ମଧ୍ୟ ଖରାପ ହୋଇପଡ଼ିଛି। ବୋତଲ ପକାଇବାମାତ୍ରେ ମେଶିନରୁ ଜୋର୍ରେ କର୍କଶ ଶବ୍ଦ ବାହାରୁଛି। ଫଳରେ ଯାତ୍ରୀମାନେ ଭୟଭୀତ ହୋଇପଡୁଛନ୍ତି। ଜଣେ ବୋତଲ ପକାଇମାତ୍ରେ ଶବ୍ଦଶୁଣି ଆଖପାଖରେ ଥିବା ଯାତ୍ରୀ କ’ଣ ହେବା ଭାବି ସେଠାକୁ ଦୌଡ଼ୁଥିବା ଦେଖିବାକୁ ମିଳୁଛି। ୬ମାସ ହେବ ମେଶିନଟି ସ୍ଥାପନ ହେବା ସତ୍ତ୍ୱେ ଏଯାଏ ଲୋକେ ଜାଣି ନ ପାରି ପାଣି ଓ ଅନ୍ୟ ବୋତଲ କିମ୍ବା ପ୍ଲାଷ୍ଟିକକୁ ଡଷ୍ଟବିନ୍ ଏବଂ ଏଠିସେଠି ଫିଙ୍ଗୁଛନ୍ତି। ଅନ୍ୟପକ୍ଷରେ ୧.୮ କିଲୋଓ୍ବାଟର ମେଶିନଗୁଡ଼ିକ ୨୪ ଘଣ୍ଟା ଧରି ଚାର୍ଜ ହୋଇ ଅଯଥା ଅର୍ଥ ଓ ଶକ୍ତି ଅପଚୟ ହେଉଛି। ଏପରିସ୍ଥିତିରେ ରେଲ୍ଓ୍ବେର ପ୍ଲାଷ୍ଟିକମୁକ୍ତ ଷ୍ଟେଶନ ଅଭିଯାନର ସଫଳତାକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି।
