କେନ୍ଦୁଝର,୧୪।୬(ସ୍ବ.ପ୍ର./ଡି.ଏନ.ଏ.)-ଭାରତୀୟ ରେଳର ରେଳ ଚାଳକ ଓ ସହ ଚାଳକ ମାନେ ନିଜ ଓ ନିଜ ପରିବାରକୁ ପଛରେ ପକାଇ କରୋନା ଯୁଦ୍ଧରେ ସାମିଲ ହୋଇଛନ୍ତି। ତାଲା ବନ୍ଦ ସମୟରେ ରେଳ ଚାଳକ ମାନେ ମାଲ ଗାଡି ଶ୍ରମିକ ସ୍ପେଶାଲ, ପାର୍ସଲ ସ୍ପେଶାଲ ଇତ୍ୟାଦି ଟ୍ରେନ ଗୁଡିକର ଦୁଚାରୁ ରୂପେ କାର୍ଯ୍ୟ ସମ୍ପାଦନ କରିଛନ୍ତି, ବିପତ୍ତି ସମୟରେ ନିଜର ଗୋଟିଏ ଦିନର ଦରମା ପ୍ରଧାନମନ୍ତ୍ରୀଙ୍କ ପାଣ୍ଠିକୁ ଏବଂ ମୁଖ୍ୟମନ୍ତ୍ରୀଙ୍କ ପାଣ୍ଠିକୁ ପ୍ରଦାନ, ଅଭାବି ଲୋକଙ୍କୁ ରିଲିଫ ସାମଗ୍ରୀ ବିତରଣ ମଧ୍ୟ କରିଛନ୍ତି କିନ୍ତୁ ସରକାର ଏମାନଙ୍କ ପ୍ରତି ଅବହେଳା ବୈମାତୃକ ମନୋଭାବ ପୋଷଣ କରୁଥିବାର ସଂଘ ଅଭିଯୋଗ କରିଛି। ଦେଢ଼ ବର୍ଷର ମହଙ୍ଗା ଭତ୍ତା ବନ୍ଦ ନ କରିବା, ଶ୍ରମ ଆଇନରେ ସଂଶୋଧନ ନ କରିବା, କର୍ମଚାରୀଙ୍କ ଦରମାରେ ଅସଙ୍ଗତ ଦୂର କରିବା, ସମସ୍ତ ରେଳ ଇଞ୍ଜିନକୁ ଏସି କରିବା, ତାଲା ବନ୍ଦ ସମୟରେ ଯାତ୍ରୀ ଗାଡି ଚାଳକଙ୍କୁ ଭତ୍ତା ପ୍ରଦାନ କରିବା, ପୁରାତନ ପେନସନ ଯୋଜନା ଲାଗୁ କରିବା, ନଅ ଘଣ୍ଟା କାର୍ଯ୍ୟ ସମୟ ଲାଗୁ କରିବା ଆଦି ପାଇଁ ସର୍ବଭାରତୀୟ ରେଳ ଚାଳକ ସଂଘ ପକ୍ଷରୁ ଜୁନ ୧୫ରୁ ୧୯ ତାରିଖ ପର୍ଯ୍ୟନ୍ତ ୫ଦିନ ଧରି କରୋନା ନିର୍ଦ୍ଦେଶବଳୀ ପାଳନ କରି କଳା ଦିବସ ପାଳନ କରିବ। ଏହାକୁ ସମର୍ଥନ କରି ଖୋର୍ଦ୍ଧା ରେଳ ମଣ୍ଡଳର ସଚିବ ଜୟ ପ୍ରକାଶ ଦଣ୍ଡପାଟ ଏବଂ ଖୋର୍ଦ୍ଧା ରୋଡ ଶାଖା ସଚିବ ରାକେଶ କୁମାର ମହାନ୍ତି ସୂଚନା ଅନୁଯାୟୀ ମଣ୍ଡଳର ପାରାଦୀପ, କଟକ, ଭଦ୍ରକ, ଜଖପୁରା, ତାଳଚେର, ଢେଙ୍କାନାଳ ସମେତ କେନ୍ଦୁଝରଗଡର ସମସ୍ତ ଚାଳକ ଏହି ବିରୋଧ କାର୍ଯ୍ୟକ୍ରମରେ ଅଂଶ ଗ୍ରହଣ କରିବା ସହିତ ଏହି ମର୍ମରେ ମଣ୍ଡଳ ପ୍ରବନ୍ଧକଙ୍କୁ ସ୍ମାରକପତ୍ର ପ୍ରଦାନ କରିବେ। ସରକାର ଦାବି ପ୍ରତି କର୍ଣ୍ଣପାତ ନକଲେ ଆଗାମୀ ଦିନରେ ଆନ୍ଦୋଳନକୁ ତୀବ୍ରତର କରାଯିବ ବୋଲି ସଂଘ ପକ୍ଷରୁ ଚେତାବନୀ ଦିଆଯାଇଛି।
