ରୂପ୍ସା/ବସ୍ତା/ଜଳେଶ୍ୱର, ୧୧।୧(ଡି.ଏନ.ଏ./ସ୍ବ.ପ୍ର.)-ଦକ୍ଷିଣ-ପୂର୍ବ ରେଳପଥର ଜେନେରାଲ ମ୍ୟାନେଜର(ଜିଏମ୍) ସଞ୍ଜୟ କୁମାର ମହାନ୍ତି ପ୍ରଥମଥର ପାଇଁ ଶୁକ୍ରବାର ବାଲେଶ୍ୱର ଗସ୍ତରେ ଆସି ରୂପ୍ସା ଜଙ୍କଶନ, ବସ୍ତା ଓ ଜଳେଶ୍ୱର ଷ୍ଟେଶନ ପରିଦର୍ଶନ କରିଛନ୍ତି।
ଏକ ସ୍ବତନ୍ତ୍ର ଟ୍ରେନ୍ ଯୋଗେ ସେ ବାଙ୍ଗିରିପୋଷି ଷ୍ଟେଶନ ଗସ୍ତ କରିବା ପରେ ମଧ୍ୟାହ୍ନ ୧୨ଟାରେ ରୂପ୍ସା ଜଙ୍କଶନରେ ପହଞ୍ଚିଥିଲେ। ଉତ୍ତରକେବିନ ପଟକୁ ଯାଇ ଟ୍ରାକ୍ମ୍ୟାନଙ୍କ ସହ ସାକ୍ଷାତ୍ କରି ରେଳଟ୍ରାକ କାର୍ଯ୍ୟ ଓ ନିରାପତ୍ତା ପାଇଁ ବ୍ୟବହୃତ ସାମଗ୍ରୀ ସବୁ ଦେଖିଥିଲେ। ସେମାନଙ୍କ କାର୍ଯ୍ୟଦକ୍ଷତା ଓ ସୁବିଧା ଅସୁବିଧା ସମ୍ପର୍କରେ ପଚାରି ବୁଝିଥିଲେ। ବିଭିନ୍ନ ଦାବି ନେଇ ସ୍ଥାନୀୟ ରାଜନୈତିକ ଦଳ ଓ ବିଭିନ୍ନ ଅନୁଷ୍ଠାନ ପକ୍ଷରୁ ଦାବିପତ୍ର ପ୍ରଦାନ କରାଯାଇଥିଲା। ପରେ ବସ୍ତା ରେଳ ଷ୍ଟେଶନରେ ପହଞ୍ଚତ୍ଥିଲେ। ସ୍ଥାନୀୟ ବିଧାୟକ ନିତ୍ୟାନନ୍ଦ ସାହୁ ଓ ମୋରଡ଼ା ବିଧାୟକ ରାଜକିଶୋର ଦାସଙ୍କ ସହ ବରିଷ୍ଠ ଜନସାଧାରଣଙ୍କ ସହ ବିଭିନ୍ନ ଏକ୍ସପ୍ରେସର ରହଣି, ୪ନଂ. ପ୍ଲାଟଫର୍ମର ନିର୍ମାଣ ସହ ତଦନୁଯାୟୀ ଫୁଟ ଓଭରବ୍ରିଜର ସମ୍ପ୍ରସାରଣ, କାଳୀଗିରି ଫାଟକଠାରୁ ଷ୍ଟେଶନ ପର୍ଯ୍ୟନ୍ତ ରେଳଧାରଣାର ପୂର୍ବ ପାଶ୍ୱରେ ସ୍ଥାୟୀ ରାସ୍ତା ସୁବିଧା, ହାଓ୍ବଡା-ଜଳେଶ୍ୱର ପାସେଞ୍ଜରକୁ ବାଲେଶ୍ୱର ଓ ପଲାସା – ଭୂବନେଶ୍ୱର-ଭଦ୍ରକ ପାସେଞ୍ଜରକୁ ଜଳେଶ୍ୱର ପର୍ଯ୍ୟନ୍ତ ସମ୍ପ୍ରସାରଣ, ନୂତନ ଟ୍ରେନ୍ ପ୍ରଚଳନ ଉପରେ ଆଲୋଚନା କରିଥିଲେ। ପରେ ଅପରାହ୍ନ ସାଢ଼େ ୨ଟାରେ ଜଳେଶ୍ୱର ରେଳଷ୍ଟେଶନ ପରିଦର୍ଶନ କରିଥିଲେ। ଜଳେଶ୍ୱର ବିଧାୟକ ଅଶ୍ୱିନୀ ପାତ୍ର ଓ ବିଭିନ୍ନ ସଙ୍ଗଠନ ପକ୍ଷରୁ ସମ୍ବର୍ଦ୍ଧନା ଦିଆଯିବା ସହ ଯାତ୍ରୀମାନଙ୍କ ସୁବିଧା ଲାଗି ବିଭିନ୍ନ ଦାବି ଉପସ୍ଥାପନ କରାଯାଇଥିଲା। ପରିଦର୍ଶନ ସମୟରେ ଜିଏମ୍ ମହାନ୍ତିଙ୍କ ସହ ଖଡ଼ଗପୁର ଡିଆରଏମ୍ ମନୋରଞ୍ଜନ ପ୍ରଧାନ, ପ୍ର୍ରିନ୍ସପାଲ ଚିଫ ଅପରେଶନାଲ ମ୍ୟାନେଜର ଜରିନା ଫିରଦସି, ପ୍ରିନ୍ସପାଲ ଚିଫ ଇଞ୍ଜିନିୟର ଉମେଶ ବାରିନ୍, ସିନିଅର ଡିଭିଜନାଲ ଅପରେଶନ ମ୍ୟାନେଜର ବିନୀତ କୁମାର ଗୁପ୍ତା, ସେକ୍ରେଟାରୀ ପଙ୍କଜ କୁନୱାର, ପିଡବ୍ଲ୍ୟୁଆଇ ନିଖିଲ ଚନ୍ଦ୍ର ସରକାର, ରୂପ୍ସା ଷ୍ଟେଶନ ମ୍ୟାନେଜର ମେଘରାୟ ହାଁସଦା ଓ ଶ୍ରୀପତି ରାଉତ, ଜଳେଶ୍ୱର ଷ୍ଟେଶନ ମ୍ୟାନେଜର ଖଗେନ୍ଦ୍ର ନାଥ ମଣ୍ଡଳ ପ୍ରମୁଖ ଉପସ୍ଥିତ ଥିଲେ। ରେଳବାଇ ପୋଲିସଙ୍କ କଡ଼ା ସୁରକ୍ଷା ମଧ୍ୟରେ ବିଭାଗୀୟ ଉଚ୍ଚ ପଦସ୍ଥ କର୍ମକର୍ତ୍ତାଙ୍କ ସହ ରେଳଷ୍ଟେଶନ ଅଞ୍ଚଳ ପରିଦର୍ଶନ କରିଥିଲେ।
