ଗୁଡ଼ଭେଲା,୨୭ା୮(ଡି.ଏନ୍.ଏ.):
ଗଲା ୧୯ ତାରିଖ ସୋମବାର ଧରିତ୍ରୀ ସମ୍ବଲପୁର ସଂସ୍କରଣରେ ‘ରୂପେଲିର ଚିକିଛା ଲାଗି ଟଁକା ଅଭାବ୍, ଚିନ୍ତାରେ ଗରିବ୍ ମା’ବାପ୍’ ଶୀରଷକ୍ରେ ଖବର ବାହାରିଥିଲା। ସେନ୍ତା ୨୧ ତାରିଖ ବୁଧୁବାର ଧରିତ୍ରୀରେ ଫେନ୍ଘାଏ ଇ ଘଟନା ବାବ୍ଦେ ‘ଗଁାରେ ପୁହୁଁଚିଲେ ଡାକ୍ତରୀ ଦଲ’ ଶୀରଷକ୍ରେ ଖବର ବାହାରିଥିଲା। ସ୍ବାସ୍ଥ୍ୟ ବିଭାଗ୍ ଘଟନାକେ ଗୁରୁତ୍ ଦେଇ ଥିଲା। ଗଲା ୧୯ ତାରିଖ ସୋମବାର ଗୁଡ଼ଭେଲା ସ୍ବାସ୍ଥ୍ୟ କେନ୍ଦ୍ର ଅଧ୍କାରୀ ବିବେକାନନ୍ଦ ଧରୁଆକଁର ଦେଖ୍ରେଖରେ ଗୁଟେ ଡାକ୍ତରୀ ଦଲ୍ ରୂପେଲିକଁର ଘରେ ପୁହୁଁଚିଥିଲା। ଡାକ୍ତରୀ ଦଲ୍ ରୂପେଲିର ଦିହିପା ପରୀକ୍ଷା ନିରୀକ୍ଷା କରି ତାହାକୁ ଉଚ ଚିକିଛା ଲାଗି ବଲାଙ୍ଗୀର ଜିଲା ସହଜ ସ୍ବାସ୍ଥ୍ୟ ପରୀକ୍ଷା ଓ ଚିକିସତ୍ା କେନ୍ଦ୍ର (ଡିଇଆଇସି)କେ ନେଇଥିଲା। ଘଟନା ବାବ୍ଦେ ଜିଲା ରାଷ୍ଟ୍ରୀୟ ବାଲ୍ ସ୍ବାସ୍ଥ୍ୟ କର୍ଯ୍ୟକ୍ରମର ପରିଚାଳକ କୃଷ୍ଣ ପ୍ରଧାନକୁଁ ପଚରାଲାରୁ ଶିଶୁ ବିଶେଷଜ୍ଞ ଡା.ସରୋଜ ତିହାଡ଼ି ରୂପେଲିର ଚିକିଛା କରୁଥିଲେ। ରୂପେଲିର ଅନେକ ପରୀକ୍ଷା ନିରୀକ୍ଷା ଲାଗି ରକତ୍ ନମୁନା ଠୁଲାଯାଇଛେ, ଏକ୍ସ-ରେ କରାଯାଇଛେ। ଇ ସବୁ ନମୁନାର ପରୀକ୍ଷା ଲାଗି ବାହାରକେ ପଠାଯାଇଛେ, ସେଠାନୁ ରିପୋର୍ଟ ଆଏଲା ଉତାରୁ ରୂପେଲିକେ କେନ୍କେ ଉଚ ଚିକିଛା ଲାଗି ପଠାଯିବା ସେଟା ଥିର କରାଯିବା ବଲି ସେ କହିଥିଲେ।
ପୂରବର ସୂଚନା ହିସାବେ ବଲାଙ୍ଗୀର ଜିଲା ଗୁଡ଼ଭେଲା ବ୍ଲକ ଡୁଙ୍ଗିବାହାଲ ଗଁାର ମେଘନାଦ ରଣାକଁର ଝି’ ହେଉଛନ୍ ରୂପେଲି(୩)। ସେ ଜନମ୍ ହେବାର ଦୁଇ ମାସ ଉତାରୁ ରୂପେଲିର ଦିହିପା ଖରାପ ହେଲା। ମା’ବାପ୍ ଝି’କେ ଅନେକ ଡାକ୍ତରଖାନାରେ ଚିକିଛା କରେଇ ନିରାଶ ହେଲେ। ଇଆଡ଼େ ରୂପେଲିର ମୁଡ଼ ବଢ଼ୁଥିଲାବେଲେ ସେ ହିସାବେ ଗୋଡ଼ହାତ୍ ନାଇଁ ବଢ଼ବାର। ବଏସ୍ ବଢ଼ୁଥିଲେ ବି ସେ ଚାଲବୁଲ କି କଥାବାରତା ନାଇଁ କରିପାରବାର। ସେନ୍ତା ତାହାକୁ ସବୁବେଲେ ସଜେ ବତ୍ରେ ପାଇ କଲେଯାଇ, ନାଇଁ ହେଲେ ଅନେକ ସମିଆରେ ତାକର ଗୋଡ଼ହାତ୍ ଭାଂଗି ଯାଉଛେ ଆର ଦିନାକେତେ ଉତାରୁ ତାର ମନ୍କେ ଯୁଡ଼ି ହେଇଯାଉଛେ। ଇଆଡ଼ ମେଘନାଦ କୁଲି ମଜୁରି କରି ଦୁଇ ପଏସା ଆନ୍ଲେ ଯାଇ ଘରର ଚୁଲି ଜଲୁଛେ। ଏନ୍ତାଥି ସେ ଝି’ର ଉଚ ଚିକିଛା କଥା ଚିନ୍ତା କରି ନାଇଁପାରବାର। ସେନ୍ତା ଇ ପରିବାରଟା ବିଜୁ ସ୍ବାସ୍ଥ୍ୟ କଲ୍ୟାଣ ବୀମା ଯୋଜନାରେ ବି ସାମିଲ ନାଇଁ ହେଇପାରି।
