ବମ୍ବେ: ଆସନ୍ତା ସପ୍ତାହରେ ରିଲିଜ ହେବ ଦୁଇଟି ବହୁ ପ୍ରତୀକ୍ଷିତ ଫିଲ୍ମ। ଗୋଟିଏ ପଟେ ଆୟୁଷ୍ମାନ ଖୁରାନ୍ନାଙ୍କ ‘ଶୁଭ ମଙ୍ଗଲ ଜ୍ୟାଦା ସାବଧାନ’କୁ ଅନ୍ୟପକ୍ଷେ ବିକ୍କି କୌଶଲଙ୍କ ‘ଭୂତ’ର ବଡ଼ପରଦାରେ ହେବ ଟକ୍କର। ଦର୍ଶକଙ୍କୁ ସର୍ବଦା ଭରପୂର ମନୋରଞ୍ଜନର ଗ୍ୟାରେଣ୍ଟି ଦେଇଆସୁଥିବା ଆୟୁଷ୍ମାନଙ୍କ ଏହି ଫିଲ୍ମ ହିଟ୍ ହେବ ବୋଲି ନିର୍ମାତା ଆଶା ରଖିଛନ୍ତି। ସେହିଭଳି ଭୂତର କାହାଣୀ ଦମଦାର ରହିଥିବାରୁ ହରର୍ ଫିଲ୍ମ ଦେଖୁଥିବା ଦର୍ଶକଙ୍କ ମନ ଜିଣିବ ବୋଲି ବିକ୍କି ଆଶା ରଖିଛନ୍ତି।
‘ଶୁଭ ମଙ୍ଗଲ ଜ୍ୟାଦା ସାବଧାନ’ର କାହାଣୀର ପୃଷ୍ଠଭୂମିକୁ ଦେଖିଲେ ଏହା ସମଲିଙ୍ଗୀ ସମ୍ପର୍କ ଉପରେ ପର୍ଯ୍ୟବେଶିତ। ଆୟୁଷ୍ମାନ ଏଥିରେ ଗେ’ ଭୂମିକାରେ ନଜର ଆସିବେ। ଫିଲ୍ମର ଟ୍ରେଲର ରିଲିଜ ହେବା ପରଠାରୁ ଏହା ଚର୍ଚ୍ଚାରେ ରହିଆସୁଛି। ସେହିଭଳି ଭୂତ ହେଉଛି ଏକ ହରର୍ ଥ୍ରିଲର୍ ଫିଲ୍ମ। ଏହାର ନିର୍ଦ୍ଦେଶନା ଦେଉଛନ୍ତି ଭାନୁ ପ୍ରତାପ ସିଂହ। ନିକଟରେ ଫିଲ୍ମଟିର ଟ୍ରେଲର ରିଲିଜ ହେବା ପରେ ଏହାକୁ ବେଶ୍ ପସନ୍ଦ କରାଯାଇଥିଲା।
ପୂର୍ବରୁ ଆୟୁଷ୍ମାନଙ୍କ ଫିଲ୍ମ ‘ବାଲା’, ‘ଡ୍ରିମ୍ ଗର୍ଲ’, ‘ଆର୍ଟିକିଲ ୧୫’, ‘ବଧାଇ ହୋ’, ‘ଅନ୍ଧାଧୁନ୍’ ହିଟ୍ ସାବ୍ୟସ୍ତ ହୋଇଥିଲା। ଏହାଛଡ଼ା ବିକ୍କିଙ୍କ ‘ଉରି’, ‘ମନମର୍ଜିୟା’, ‘ସଞ୍ଜୁ’, ‘ଲଷ୍ଟ ଷ୍ଟୋରିଜ୍’ ମଧ୍ୟ ବକ୍ସ ଅଫିସରେ ଭଲ ପ୍ରଦର୍ଶନ କରିଥିଲା। ଏବେ ଫେବୃୟାରୀ ୨୧ରେ ଉଭୟଙ୍କ ଫିଲ୍ମ ରିଲିଜ ହେବ। ଏହା ଫିଲ୍ମର ବ୍ୟବସାୟକୁ ଫିକା କରିପାରେ ବୋଲି ଆଲୋଚନା ହେଉଛି।
