ନୂଆଦିଲ୍ଲୀ,୨-୮: ବିଶ୍ୱର ସବୁଠାରୁ ଧନୀ ବ୍ୟକ୍ତି ଜେଫ୍ ବେଜୋସ୍ଙ୍କ ଇ-କମର୍ସ କମ୍ପାନୀ ଆମାଜନ ମୁକେଶ ଅମ୍ବାନୀଙ୍କ ମାଲିକାନାରେ ଥିବା ଦେଶର ସର୍ବବୃହତ ରିଟେଲ କମ୍ପାନୀ ରିଲାଏନ୍ସ ରିିଟେଲର ୨୬% ଅଂଶଧନ କିଣିପାରେ। ତେବେ ଦୁଇ କମ୍ପାନୀ ମଧ୍ୟରେ ଆଲୋଚନା ଚାଲିଥିବାରୁ ନିଷ୍ପତ୍ତି ସମ୍ପର୍କରେ ଏବେ କିଛି ସ୍ପଷ୍ଟ ହୋଇନାହିଁ।
ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ରିଲାଏନ୍ସ ରିଟେଲ ନିଜର ଅଂଶଧନ ବିକ୍ରି କରିବା ନେଇ ଏଥିପୂର୍ବରୁ ଚାଇନାର ଇ-କମର୍ସ କମ୍ପାନୀ ଆଲିବାବା ଗ୍ରୁପ୍ ସହ ଆଲୋଚନା ଚଳାଇଥିଲା। ତେବେ ମୂଲ୍ୟାଙ୍କନକୁ ନେଇ ସହମତି ପ୍ରକାଶ ନ ପାଇବାରୁ ଚୁକ୍ତି ହୋଇପାରି ନାହିଁ। ଅଧିକାରୀଙ୍କ କହିବାନୁଯାୟୀ, ଆମାଜନ ଭାରତର ସମସ୍ତ ବଡ଼ ବ୍ରିକ୍ ଆଣ୍ଡ ମୋର୍ଟାର ଚେନ୍ରେ ଦୀର୍ଘ ସମୟାବଧି ଲାଗି ଅଂଶଧନ କିଣିବାକୁ ଆଗ୍ରହୀ। କାରଣ ଭାରତରେ ଏବେ ସୁଦ୍ଧା ଦୋକାନରେ ସପିଂ କରିବାର ପରମ୍ପରା ବଜାୟ ରହିଛି। ରିଲାଏନ୍ସର ଅଂଶଧନ ଜରିଆରେ ଆମାଜନ ଭାରତୀୟ ଗ୍ରାହକଙ୍କ ନିକଟରେ ବିଭିନ୍ନ ଚ୍ୟାନେଲ ଜରିଆରେ ନିଜକୁ ପହଞ୍ଚାଇପାରିବ। ଅନ୍ୟପକ୍ଷରେ ମିଡିଆ ରିପୋର୍ଟ ଅନୁଯାୟୀ ରିଲାଏନ୍ସ ରିଟେଲ ଅଂଶଧନ ବିକ୍ରି ନେଇ ଫ୍ୟୁଚର ଗ୍ରୁପ୍ ସହ ମଧ୍ୟ ଆଲୋଚନା ଚଳାଇଛି। କିନ୍ତୁ ଆଲୋଚନାର ଗତି ଅତ୍ୟନ୍ତ ଧିମା ଜଣାପଡୁଛି। କେନ୍ଦ୍ର ସରକାରଙ୍କ ପକ୍ଷରୁ ଫେବୃୟାରୀରେ ଲାଗୁ ହୋଇଥିବା ଏଫ୍ଡିଆଇ ନିୟମ ଅନୁଯାୟୀ ଏହି ଡିଲ୍ ହେଉ ବୋଲି ଆମାଜନ ଚାହୁଁଛି। ଅଂଶଧନ ବିକ୍ରି ମାଧ୍ୟମରେ ରିଲାଏନ୍ସ ରିଟେଲ ଆମାଜନର ଭାରତୀୟ ଇ-କମର୍ସ ପ୍ଲାଟଫର୍ମରେ ନିଜର ସାମଗ୍ରୀ ବିକ୍ରି କରିବାର ସୁବିଧା ହାସଲ କରିପାରିବ। କଞ୍ଜ୍ୟୁମର ଇଲେକ୍ଟ୍ରୋନିକ୍ସ ଏବଂ ମୋବାଇଲ ଫୋନ ମାର୍କେଟରେ ରିଲାଏନ୍ସ ରିଟେଲ ଅଗ୍ରଣୀ ରହିଥିବାରୁ ଏହି କମ୍ପାନୀର ଅଂଶଧନ କିଣିବା ଲାଗି ଆମାଜନ ଆଗ୍ରହ ଦେଖାଇଛି ବୋଲି ଉକ୍ତ ଅଧିକାରୀ ପ୍ରକାଶ କରିଛନ୍ତି। ସୂଚନାଥାଉ କି, ଜୁନ ତ୍ରୈମାସ ସୁଦ୍ଧା ରିଲାଏନ୍ସ ରିଟେଲ ଉପରେ ୨.୮୮ ଲକ୍ଷ କୋଟି ଟଙ୍କାର ବକେୟା ଋଣ ରହିଛି।
