ରାୟଗଡ଼ା ଅଫିସ,୧୮ା୫: ଏଣିକି ରାୟଗଡ଼ା ଜିଲାରେ ହେବ କୋଭିଡ୍ ପରୀକ୍ଷା। ଏଠାରେ ସନ୍ଦିଗ୍ଧଙ୍କ ସ୍ବାବ୍ ପରୀକ୍ଷା ଦ୍ୱାରା ରୋଗୀଙ୍କ ଶୀଘ୍ର ଚିକିତ୍ସା ହୋଇପାରିବ। ଏ ନେଇ ଜିଲା ମୁଖ୍ୟ ଚିକିତ୍ସାଳୟସ୍ଥିତ ଆର୍ଏମ୍ଆର୍ସି ଟ୍ରାଇବାଲ୍ ୟୁନିଟ ଉପକେନ୍ଦ୍ରରେ ପ୍ରସ୍ତୁତି ଚାଲିଛି। ଏଥିପାଇଁ ଆବଶ୍ୟକ ଯାନ୍ତ୍ରିକ ଉପକରଣ ସ୍ଥାପନ ହୋଇଛି। ସେହିପରି ସୋମବାର ଟ୍ୟୁନାଟ୍ କରୋନା ଭାଇରସ୍ ଟେଷ୍ଟିଂ ମେଶିନ ଆସି ରାୟଗଡ଼ାରେ ପହଞ୍ଚିଥିବା ଜଣାପଡ଼ିଛି। ଏହାକୁ କାର୍ଯ୍ୟକ୍ଷମ କରିବା ନିମନ୍ତେ ଭୁବନେଶ୍ୱରସ୍ଥିତ ଆର୍ଏମ୍ଆର୍ସିର ଏକ ଟିମ୍ ଉଦ୍ୟମ ଚଳାଇଛନ୍ତି। ପୂର୍ବରୁ ଜିଲା ଚିକିତ୍ସାଳୟ ପରିସରରେ ଆର୍ଏମ୍ଆର୍ସିର ଟ୍ରାଇବାଲ ୟୁନିଟ ଉପକେନ୍ଦ୍ର ପ୍ରତିଷ୍ଠା ହୋଇଛି। ୨୦୦୮ ଓ ୨୦୦୯ ମସିହାରେ କାଶୀପୁରଠାରେ ଝାଡ଼ାବାନ୍ତି ମହାମାରୀ ରୂପ ନେଇଥିବାବେଳେ ସେ ସମୟରେ ରୋଗ ନିରୂପଣ ସକାଶେ ଏହି ଉପକେନ୍ଦ୍ର ଖୋଲିଥିଲା। ତେବେ ଚଳିତବର୍ଷଠାରୁ ଅନୁଦାନ ଆସିବା ବନ୍ଦ ହୋଇଥିବାରୁ ଉପକେନ୍ଦ୍ର ମଧ୍ୟ ବନ୍ଦ ରହିଥିଲା। ଏବେ ରାଜ୍ୟରେ କରୋନା ସଂକ୍ରମଣ ସଂଖ୍ୟା ବୃଦ୍ଧି ପାଉଛି। ଦକ୍ଷିଣ ଓଡ଼ିଶାରୁ ସନ୍ଦିଗ୍ଧଙ୍କ ସ୍ବାବ୍ ପରୀକ୍ଷା ପାଇଁ ଭୁବନେଶ୍ୱର ପଠାଯାଉଛି। ଏହାଦ୍ୱାରା ରୋଗୀ ଚିହ୍ନଟ ଏବଂ ଚିକିତ୍ସାରେ ବିଳମ୍ବ ଘଟୁଛି। ତେବେ ଏଠାରେ ପୂର୍ବରୁ ଆର୍ଏମ୍ଆର୍ସି ଟ୍ରାଇବାଲ୍ ଉପକେନ୍ଦ୍ର ରହିଥିବାରୁ ସ୍ବାବ୍ ପରୀକ୍ଷା ପାଇଁ ଏହା କାର୍ଯ୍ୟକ୍ଷମ କରିବା ଲାଗି ଜିଲାପାଳ ପ୍ରମୋଦ କୁମାର ବେହେରା, ସିଡିଏମ୍ ଓ ପିଏଚ୍ଓ ଆର୍ତ୍ତବନ୍ଧୁ ନାୟକ ରାଜ୍ୟ ସରକାରଙ୍କୁ ପରାମର୍ଶ ଦେଇଥିଲେ। ଏଥିନେଇ ବିଭାଗୀୟ ଅଧିକାରୀଙ୍କ ସହମତି ପରେ ଜିଲାରେ କୋଭିଡ୍ ପରୀକ୍ଷା ହେବା ନିଶ୍ଚିତ ହୋଇଛି। ମେ’ ଶେଷ ସପ୍ତାହ ସୁଦ୍ଧା ସ୍ବାବ୍ ନମୁନା ପରୀକ୍ଷଣ ଲାବ୍ ସମ୍ପୂର୍ଣ୍ଣ କାର୍ଯ୍ୟକ୍ଷମ ହେବ ବୋଲି ଜଣାପଡ଼ିଛି। ଏଥିପାଇଁ ୨ ଟେକ୍ନିସିଆନଙ୍କୁ ଭୁବନେଶ୍ୱରସ୍ଥିତ ଆର୍ଏମ୍ଆର୍ସି ମୁଖ୍ୟ ଲାବ୍ରେ ତାଲିମ ନେବାପରେ ଏଠାରେ ବିଧିବଦ୍ଧଭାବେ ପରୀକ୍ଷା ଆରମ୍ଭ ହେବ। ପ୍ରାଥାମିକ ପର୍ଯ୍ୟାୟରେ ଦୈନିକ ୫୦ ନମୁନା ପରୀକ୍ଷା ପାଇଁ ଲକ୍ଷ୍ୟ ରହିଥିବା ସିଡିଏମ୍ ଓ ପିଏଚ୍ଓ ଆର୍ତ୍ତବନ୍ଧୁ ନାୟକ କହିଛନ୍ତି।
