ଆମିଷ ଭିତରେ ଚିଙ୍ଗୁଡିକୁ ବିଭିନ୍ନ ରଙ୍ଗ ଦେଇ ପରଷା ଯାଇଥାଏ। ଷ୍ଟାର୍ଟରଠାରୁ ନେଇ ମେନ୍ କୋର୍ସରେ ସମସ୍ତେ ପସନ୍ଦ କରନ୍ତି ଏହି ଖାଦ୍ୟକୁ। ସେହିଭଳି ରାନି ପ୍ରନ ହେଉଛି ଚିଙ୍ଗୁଡିର ଏକ ସ୍ବତନ୍ତ୍ର ପ୍ରସ୍ତୁତି। ଭୁବନେଶ୍ୱରରେ ଖୁବ୍ କମ୍ ରେସ୍ତୋରଁ।ରେ ଏହା ପରଷା ଯାଉଛି ଓ ପସନ୍ଦଯୋଗ୍ୟ ବି ହେଉଛି। ଏହାକୁ ସହଜରେ ଘରେ ପ୍ରସ୍ତୁତ କରି ଅତିଥିଙ୍କୁ ପରିଷି ହେବ, ସଂଧ୍ୟାରେ ସ୍ନାକ୍ସ ଭଳି ମଧ୍ୟ ଖାଇହେବ। ଭୁବନେଶ୍ୱରରୁ ପୁରୀ ଜାତୀୟ ରାଜପଥରେ ଶିଶୁପାଳଗଡସ୍ଥ ବ୍ରଦର୍ସ ଢାବାରେ କାର୍ଯ୍ୟରତ ଶେଫ୍ ସତ୍ୟଜିତ୍ ‘ରାନି ପ୍ରନ’ ପ୍ରସ୍ତୁତି ସମ୍ପର୍କରେ କହନ୍ତି…
ଆବଶ୍ୟକ ସାମଗ୍ରୀ:
ଚିଙ୍ଗୁଡି ୬ ପିସ୍ (ବଡ଼), ତେଲ ୨୦୦ ମିଲି ଅଣ୍ଡା ୧ଟା, କଞ୍ଚାଲଙ୍କା କିମା ୫୦ ଗ୍ରାମ୍, ଅଦା ରସୁଣ କିମା ୫୦ ଗ୍ରାମ୍, ପିଆଜ କିମା ୫୦ ଗ୍ରାମ୍, ଭୁର୍ସୁଙ୍ଗ ପତ୍ର ୧୦ ଗ୍ରାମ୍, ଶୁଖିଲା ଲଙ୍କା ୨ ପିସ୍, ଦହି ୫୦ ଗ୍ରାମ୍, ଟମାଟୋ ସସ୍ ୫୦ ଗ୍ରାମ, ମଇଦା ୨୫ ଗ୍ରାମ୍, କର୍ନଫ୍ଲୋର ୨୫ ଗ୍ରାମ୍, ଲୁଣ ୨୫ ଗ୍ରାମ୍, ଶୁଖିଲା ଲଙ୍କା ପେଷ୍ଟ ୧୦ ଗ୍ରାମ, ଅମୂଲ କ୍ରିମ୍ ୧୦ ମି.ଲି, ଗୋଲମରିଚ ଗୁଣ୍ଡ ୫ ଗ୍ରାମ୍, ଧନିଆ ପତ୍ର ୫ ଗ୍ରାମ୍।
ପ୍ରସ୍ତୁତି ପ୍ରଣାଳୀ
ଚିଙ୍ଗୁଡିରେ ଲୁଣ, ଅଦା ରସୁଣ ପେଷ୍ଟ, ଅଧା ଅଣ୍ଡା ଗୋଳେଇକି ୧୦ ମିନିଟ୍ ରଖନ୍ତୁ। ଅଲଗା ଏକ ପାତ୍ରରେ ଅଧା ଅଣ୍ଡା, ଲୁଣ, ମଇଦା, କର୍ନଫ୍ଲୋରରେ ପାଣି ଦେଇ ମୋଟା କରିି ଗୋଳାନ୍ତୁ। ମ୍ୟାରିନେଟ୍ ହୋଇଯାଇଥିବା ଚିଙ୍ଗୁଡିକୁ ଏଥିରେ ବୁଡାଇ ଛାଣନ୍ତୁ। ଗୋଲ୍ଡେନ ରଙ୍ଗ ହେବା ପର୍ଯ୍ୟନ୍ତ ଏହା ଛଣାଯିବ। ଅଲଗା ଏକ ତାଓ୍ବାରେ ତେଲ, ଶୁଖିଲା ଲଙ୍କା, ଭୁର୍ସୁଙ୍ଗ ପତ୍ର, ଅଦା ରସୁଣ କିମା ପକାଇ ଭାଜିବାକୁ ପଡିବ। ନାଲି ରଙ୍ଗ ହେଲା ପରେ ଏଥିରେ ପିଆଜ ପକାନ୍ତୁ। ଅଳ୍ପ ସମୟ ଭାଜିଲା ପରେ ସେଥିରେ ଦହି, ଅଦାରସୁଣ ପେଷ୍ଟ୍, ଟମାଟୋ ସସ୍, ଶୁଖିଲା ଲଙ୍କା ପେଷ୍ଟ୍, ଲୁଣ, ଅମୂଲ କ୍ରିମ୍ ପକାଇ ବହଳିଆ କରନ୍ତୁ। ଛଣା ଚିଙ୍ଗୁଡିକୁ ଏଥିରେ ମିଶାଇ ଡିଶ୍ରୁ କାଢ଼ି ଗୋଲ ମରିଚ ଗୁଣ୍ଡ, ଧନିଆ ପତ୍ର ପକାଇ ପରଷି ଦିଅନ୍ତୁ।
