ଭୁବନେଶ୍ୱର,୨୭ା୧୦(ବ୍ୟୁରୋ): ରାଜ୍ୟ ମହିଳା କମିଶନ ଅଧ୍ୟକ୍ଷା ପଦ ଏକ ସାମ୍ବିଧାନିକ ଦାୟିତ୍ୱ। ଏହା ବିଜେଡିର ରାଜନୈତିକ ପଦବୀ ନୁହେଁ । ଯାଜପୁର ଜିଲାର ପିଇଓ ସ୍ମିତାରାଣୀ ବିଶ୍ୱାଳଙ୍କୁ ବଳାତ୍କାର ଓ ହତ୍ୟା ଘଟଣାରେ କମିଶନ ଅଧ୍ୟକ୍ଷା ଉପଯୁକ୍ତ ତଦନ୍ତ କରୁ ନ ଥିବା ଭାଜପା ମହିଳା ମୋର୍ଚ୍ଚା ପକ୍ଷରୁ ଅଭିଯୋଗ କରାଯାଇଛି। ମହିଳା ମୋର୍ଚ୍ଚା ସଭାନେତ୍ରୀ ପ୍ରଭାତୀ ପରିଡା ଶନିବାର ରାଜ୍ୟ ମୁଖ୍ୟାଳୟରେ ଖବରଦାତା ସମ୍ମିଳନୀ କରି କମିଶନ ଅଧ୍ୟକ୍ଷାଙ୍କୁ ଟାର୍ଗେଟ କରିବା ସହ ଇସ୍ତଫା ଦାବି କରିଛନ୍ତି। ପ୍ରଭାତୀ କହିଛନ୍ତି ଯେ, ବଳାତ୍କାର ଓ ହତ୍ୟା ସମ୍ପର୍କରେ ଅଭିଯୋଗ ପରେ ମଧ୍ୟ ରାଜ୍ୟ ମହିଳା କମିଶନ ଅଧ୍ୟକ୍ଷା ମିିନତି ବେହେରା ପ୍ରଥମେ ଚୁପ ରହିଲେ। ପରବର୍ତ୍ତୀ ସମୟରେ ତଦନ୍ତର ଶିଥିଳତା ନେଇ ଗଣମାଧ୍ୟମ ପ୍ରଶ୍ନ କରିବାରୁ ଅନୁସନ୍ଧାନ ନିରପେକ୍ଷ ଭାବେ ଚାଲୁଥିବା ମତ ଦେଇଥିଲେ। ହେଲେ ତଦନ୍ତ ଠିକ୍ ଭାବେ ଚାଲୁନାହିଁ। କମିଶନ ଅଧ୍ୟକ୍ଷା ଗତ ୧୯ରେ ସେ ଯାଜପୁର ଯାଇ ତଦନ୍ତ କରିଥିବା କଥା କହୁଛନ୍ତି। ଏହା ସମ୍ପୂର୍ଣ୍ଣ ମିଛ ା ଯଦି ତଦନ୍ତ କରି ଯାଇଥିଲେ, ତେବେ କାହାକୁ ଭେଟିଥିଲେ ବୋଲି ପ୍ରଭାତୀ ପ୍ରଶ୍ନ କରିଛନ୍ତି। ଅଧ୍ୟକ୍ଷା ସ୍ମିତାଙ୍କ ପରିବାରକୁ ଭେଟିଥିଲେ କି। ମହିଳା କମିଶନ ଅଧ୍ୟକ୍ଷା ସ୍ମିତାରାଣୀଙ୍କ ଗାଁକୁ ଯାଇ ନ ଥିବା, ଏପରିକି ସ୍ମିତାଙ୍କ ସ୍ବାମୀଙ୍କୁ ଭଲଭାବେ ଚିହ୍ନି ନାହାନ୍ତି। କାହା ପାଖରେ ମହିଳା କମିଶନ ଅଧ୍ୟକ୍ଷାଙ୍କ ଗସ୍ତର ଖବର ନାହିଁ। ତେଣୁ ଏପରି ସମ୍ବେଦନଶୀଳ ପ୍ରସଙ୍ଗରେ ଉପଯୁକ୍ତ ଢଙ୍ଗରେ ନିଜ ଦାୟିତ୍ୱ ପାଳନ କରୁ ନ ଥିବା ଅଧ୍ୟକ୍ଷା ଇସ୍ତଫା ଦିଅନ୍ତୁ ବୋଲି ଭାଜପା ମହିଳା ମୋର୍ଚ୍ଚା ପକ୍ଷରୁ ଦାବି କରାଯାଇଛି। ଯଦି ଅଧ୍ୟକ୍ଷା ଇସ୍ତଫା ନ ଦିଅନ୍ତି, ତେବେ ଚଳିତ ମାସ ୨୮ରେ ମହିଳା ମୋର୍ଚ୍ଚା କମିଶନଙ୍କ କାର୍ଯ୍ୟାଳୟ ଘେରାଉ କରିବ ବୋଲି ଚେତାବନୀ ଦେଇଛି।
