ରାଉରକେଲା,୧୩ା୭(ସଙ୍ଗୀତା ଜେନା): ପରିବେଶ ପାଇଁ ଅନୁକୂଳ ତଥା କମ ଅର୍ଥରେ ମିଳିବ ଇନ୍ଧନ। ଗ୍ରୀନ ଫୁଏଲ ଭାବେ ପରିଚିତ କମ୍ପ୍ରେସଡ଼ ନେଚୁରାଲ ଗ୍ୟାସ(ସିଏନଜି)ର ରାଉରକେଲାରେ ବହୁତ ଶୀଘ୍ର ମଦର ସିଏନଜି ଷ୍ଟେସନ୍ ଖୋଲିବାକୁ ଯାଉଛି। ପେଟ୍ରୋଲ ଓ ଡିଜେଲର ବିକଳ୍ପ ଭାବେ ଖ୍ୟାତି ଲାଭ କରିଥିବା ସିଏନଜି ଦ୍ୱାରା ଯାନବାହାନ ଓ ଭାରିଯାନ ଚାଲିବ। ଏହାଦ୍ୱାରା ଲୋକ କମ ଖର୍ଚ୍ଚରେ ଇନ୍ଧନ ପାଇବେ। ରାଉରକେଲା ଭଳି ଶିଳ୍ପ ନଗରୀରେ ପ୍ରଦୂଷଣହାର ବୃଦ୍ଧି ସାଙ୍ଗକୁ କ୍ରମାଗତ ବହୁ ପରିମାଣରେ ଯାନବାହାନ ସଂଖ୍ୟା ବୃଦ୍ଧି ହୋଇଛି। ତେବେ ପ୍ରଦୂଷଣ ହାରକୁ କମ କରିବା ପାଇଁ ପୂର୍ବରୁ ଅଟୋ ଗୁଡ଼ିକ ପାଇଁ ସିଏନଜି ଇନ୍ଧନ ବ୍ୟବସ୍ଥା ୨୦୧୯ ମସିହାରେ କରାଯାଇଥିଲା। ଛେଣ୍ଡସ୍ଥିତ ଭଗବତୀ ଓ ସତ୍ୟମରେ ପେଟ୍ରୋଲ ପମ୍ପରେ ଆରୋ ଷ୍ଟେସନ ଦ୍ୱାରା ସିଏନଜି ବିତରଣ କରାଯାଉଥିଲା। ହେଲେ ଏହାର ବହୁଳ ଚାହିଦା ଓ ଅତ୍ୟାଧୁନିକ କୌଶଳରେ ନିର୍ମିତ ଚାରିଚକିଆ ଯାନବାହାନ ଓ ଅଟୋରେ ଇନ୍ଧନ ଯୋଗାଇବା ପାଇଁ ବୃହତ୍ତ ପ୍ରକଳ୍ପ ତିଆରି ଲାଗି ପେଟ୍ରୋଲିୟମ ମନ୍ତ୍ରଣାଳୟ ନିଷ୍ପତି ନେଇଥିଲା। ଯାହାଦ୍ୱାରା ରାଉରକେଲା ସେକ୍ଟର-୨ ଗାୟତ୍ରୀ ମନ୍ଦିର ନିକଟରେ ଏହି ମଦର ଷ୍ଟେସନ ନିର୍ମାଣ ୨୦୨୨ରୁ ଆରମ୍ଭ କରାଯାଇଥିଲା। ପ୍ରାୟ ୯ କୋଟି ଟଙ୍କା ବ୍ୟୟରେ ହେଉଥିବା ଉକ୍ତ ଷ୍ଟେସନରେ ୮ଟି ଡିସପେନସର ଲାଗିବ। ଯାହାଦ୍ୱାରା ଏକକାଳୀନ ୬ଟି କାର ବା ଅଟୋ ସହ ୨ଟି ସିଏନଜି ବସର ଇନ୍ଧନ ଭରାଯିବ। ସେକ୍ଟର-୧୩ ସିଟି ଗେଟ ଷ୍ଟେସନରୁ ଏହାର ପ୍ରମୁଖ ସିଏନଜି ଯୋଗାଣ କରାଯିବ। ଗେଲ(ଗ୍ୟାସ ଅଥରିଟି ଅଫ ଇଣ୍ଡିଆ ଲିମିଟେଡ଼) କମ୍ପାନୀ ଓନ କମ୍ପାନୀ ଅପରେସନାଲ(କୋକୋ) ଦ୍ୱାରା ପରିଚାଳିତ ହେବ। ଏହାର ନିର୍ମାଣ ଲାଗି ସଂଚିତ ଇନଫ୍ରାଟେକକୁ କାର୍ଯ୍ୟଦେଶ ମିଳିଛି। ପ୍ରାୟ ସେପ୍ଟମ୍ବର ମାସ ସୁଦ୍ଧା ଏହା ସମ୍ପୂଣର୍ର୍ ହେବ ବୋଲି ଗେଲ ଗ୍ୟାସ ମୁଖ୍ୟ ପରିଚାଳକ କିନସୁକ ସରକାର ସୂଚନା ଦେଇଛନ୍ତି। ଅତ୍ୟାଧୁନିକ ଯନ୍ତ୍ରାଂଶ ଦ୍ୱାରା ସୁରକ୍ଷିତ( ଦୁର୍ଘଟଣା ରହିତ) ଇନ୍ଧନ ଯୋଗାଣ କରାଯିବ। ସୂଚନାଯୋଗ୍ୟ, ଦିଲ୍ଲୀ, ବେଙ୍ଗଲୁରୁ ଭଳି ମହାନଗର ଗୁଡ଼ିକରେ ବାୟୁ ପ୍ରଦୂଷଣ ନିୟନ୍ତ୍ରଣ କରିବା ପାଇଁ ସିଏନଜି ବ୍ୟବହାରକୁ ପ୍ରାଥମିକତା ଦିଆଯାଉଛି। ବିଭିନ୍ନ କମ୍ପାନୀ ପକ୍ଷରୁ ସିଏନଜି ଇନ୍ଧନ ବିଶିଷ୍ଟ ଯାନବାହାନ ଉପତ୍ାଦନ କରାଯାଉଛି। ସିଏନଜି ବ୍ୟବହାର ଦ୍ୱାରା ଯାନବାହାନରୁ ବିଷାକ୍ତ କାର୍ବନ ଡାଇକ୍ସସାଇଡ଼ କମ ନିର୍ଗତ ହୋଇଥାଏ। ବୈଜ୍ଞାନିକ ମାନେ ଏହକୁ ଅଧିକ ସବୁଜ ପରିବେଶ ପାଇଁ ବିକଶିତ କରିଛନ୍ତି।
