ସାମାଜିକ କାର୍ଯ୍ୟକଳାପ ସହ ଯୋଡ଼ି ହେଉଛନ୍ତି ଯୁବପିଢ଼ି। ଅଧିକରୁ ଅଧିକ ସଂଖ୍ୟାରେ ଯୁବଗୋଷ୍ଠୀ ଏବେ ନିଜକୁ ସମାଜସେବାରେ ସାମିଲ କରୁଥିବା ଦେଖିବାକୁ ମିଳିଲାଣି। ଫଳରେ ଦିନକୁ ଦିନ କ୍ଲବ ସଂଖ୍ୟା ବଢୁଛି। କେତେଜଣ ଯୁବକ ଏକତ୍ରିତ ହୋଇ ତିଆରି କରୁଛନ୍ତି କ୍ଲବ। ସହରର ବିଭିନ୍ନ କ୍ଲବ ନିମନ୍ତେ ଏହି ସ୍ବତନ୍ତ୍ର ସ୍ତମ୍ଭ…
ପ୍ରତି ରବିବାର ଭୋର ହେବା ମାତ୍ରେ ରୟାଲ କ୍ଲବର ସମସ୍ତ ସଦସ୍ୟ ବାଦାମବାଡ଼ି ନିକଟରେ ଏକଜୁଟ ହୁଅନ୍ତି। ପୂର୍ବରୁ ଟଙ୍କା ଯୋଗାଡ଼ ଓ ରୋଷେଇ ସାମଗ୍ରୀ କିଣା ସରିଥାଏ। ସକାଳୁ ସକାଳୁ ବାଦାମବାଡ଼ିସ୍ଥିତ ଏକ ହୋଟେଲରେ ପ୍ରାୟ ୧୦୦୦ ଲୋକଙ୍କ ନିମନ୍ତେ ଅରୁଆ ଭାତ ଓ ଡାଲମା ରୋଷେଇ କରାଯାଏ। ପୂର୍ବାହ୍ନ ପ୍ରାୟ ୧୧ଟା ବେଳକୁ କଟକର ବିଭିନ୍ନ ସ୍ଥାନରେ ଏହି ରନ୍ଧାଖାଦ୍ୟକୁ ବଣ୍ଟାଯାଏ ବୋଲି କହିଛନ୍ତି କ୍ଲବର ସମ୍ପାଦକ ସୂରଯ କୁମାର ରାଉତ। ପ୍ରାୟ ରବିବାର ମେଡିକାଲରେ ବଣ୍ଟାଯାଏ। କେତେକ ଥର ରାସ୍ତାକଡ଼ରେ ଶୋଉଥିବା ଗରିବ ଲୋକମାନଙ୍କୁ ବଣ୍ଟାଯାଉଛି। ମାତ୍ର ଆମ ଖାଦ୍ୟବଣ୍ଟନ ସ୍ଥାନ ପ୍ରାୟ ଲୋକ ଜାଣି ସାରିଲେଣି। ଏଣୁ ରବିବାର ହେଲା ମାତ୍ରେ ସହରରେ କାମ କରୁଥିବା ଦିନମଜୁରିଆ, ଗରିବ ଲୋକମାନେ ଆପେ ଆପେ ଆସି ରୁଣ୍ଡ ହୋଇଯାଆନ୍ତି ବୋଲି ସୂରଯ କହିଛନ୍ତି।
୨୦୧୪ ମସିହାରୁ ଏହି କ୍ଲବ ଚାଲୁଛି। ପ୍ରଥମେ ଶଙ୍କରପୁର ଓ ବାଦାମବାଡ଼ି ଅଞ୍ଚଳର ପ୍ରାୟ ୨୦ଜଣ ଯୁବ ବ୍ୟବସାୟୀ ଏକାଠି ହୋଇ ଉକ୍ତ କ୍ଲବ ଗଠନ କରିଥିଲେ। ଏବେ ୭୮ଜଣ ଯୁବକ ଏହି କ୍ଲବର ସଦସ୍ୟ। ଏହାର ଅଧିକାଂଶ ସଦସ୍ୟ ବ୍ୟବସାୟ କରନ୍ତି। ପ୍ରତି ରବିବାର ଖାଦ୍ୟ ବଣ୍ଟନ କରାଯିବା ସହିତ ପ୍ରତ୍ୟେକ ମାସରେ ବୃଦ୍ଧାଶ୍ରମ, ବାଳାଶ୍ରମରେ କାର୍ଯ୍ୟକ୍ରମ ଆୟୋଜନ କରାଯାଏ ବୋଲି କ୍ଲବ ସଭାପତି ଚିତ୍ତରଞ୍ଜନ ରାଉତ କହିଛନ୍ତି। କିଛିଦିନ ତଳେ ଚଣ୍ଡିଖୋଲରେ ଥିବା ଏକ ବୃଦ୍ଧାଶ୍ରମରେ କାର୍ଯ୍ୟକ୍ରମ ଆୟୋଜନ କରିଥିଲୁ। ସେଠାରେ ଖାଦ୍ୟ ଓ ପୋଷାକ ବଣ୍ଟନ କରାଯାଇଥିବା ଚିତ୍ତରଞ୍ଜନ କହିଛନ୍ତି। ଏପରି କି ଅର୍ଥ ଅଭାବରୁ ଯେଉଁ ପିଲାଙ୍କ ପାଠ ପଢ଼ିବାରେ ସମସ୍ୟା ହେଉଛି ସେମାନଙ୍କୁ ଆମେ ସାହାଯ୍ୟ କରୁଛୁ ବୋଲି ଚିତ୍ତରଞ୍ଜନ କହିଥିଲେ। ଅରୁଣୋଦୟ ମାର୍କେଟ ନିକଟରେ ପ୍ରତିବର୍ଷ ଏହି କ୍ଲବ ଗଣେଶପୂଜା ଆୟୋଜନ କରେ। ସ୍କୁଲପିଲାଙ୍କୁ କ୍ରୀଡ଼ା ସାମଗ୍ରୀ ବଣ୍ଟାନ କରାଯାଉଛି ବୋଲି କ୍ଲବ ପକ୍ଷରୁ କୁହାଯାଇଛି। ରାକେଶ ରାଉତ କ୍ଲବ ଉପସଭାପତି ଥିବାବେଳେ ଶ୍ୟାମପ୍ରସାଦ ବେହେରା ଯୁଗ୍ମ ସମ୍ପାଦକ ଓ ରାକେଶ ସ୍ବାଇଁ କୋଷାଧ୍ୟକ୍ଷ ଅଛନ୍ତି।
-ରିପୋର୍ଟ: କୁମାରଶ୍ରୀ ସାହୁ
