କେନ୍ଦୁଝର,୧୫ା୬(ସ୍ବ.ପ୍ର.): ପ୍ରବାସୀମାନଙ୍କୁ ସହାୟତା କରିଥିବାରୁ ରଙ୍ଗୋଲିରେ ଓଡ଼ିଆ ସିନେଷ୍ଟାର ସବ୍ୟସାଚୀଙ୍କୁ ଧନ୍ୟବାଦ ଜଣାଇଛନ୍ତି ଚିତ୍ରକାର ନିଶିକାନ୍ତ ବେହେରା। ନିଶିକାନ୍ତଙ୍କ ଘର କେନ୍ଦୁଝର ସଦର ବ୍ଲକ ଟିକରପଡ଼ା ଗ୍ରାମରେ। କମ୍ ବୟସରେ ବିଭିନ୍ନ ପ୍ରକାରର ଚିତ୍ର ଆଙ୍କି ସେ ଏକ ସ୍ବତନ୍ତ୍ର ସ୍ଥାନ ଗ୍ରହଣ କରିଛନ୍ତି। ଏକାଧାରରେ ଟେରାକୋଟା, ବାଲୁକା କଳା, ରଙ୍ଗୋଲି ଚିତ୍ର ଏବଂ ବିଭିନ୍ନ ପ୍ରକାରର ରଙ୍ଗ ଓ ତୈଳ ଚିତ୍ର, ପ୍ରତିଛବି ଅଙ୍କନ କରି ସେ ସୁନାମ ଅର୍ଜନ କରିଛନ୍ତି। ସେହିପରି ବିଭିନ୍ନ ପ୍ରକାର ମୂର୍ତ୍ତି ଗଢ଼ି ନିଜେ ରଙ୍ଗ କରି ଜୀବନ୍ତ ରୂପ ଦେଇଥାନ୍ତି। ଏହି ସବୁ ଚିତ୍ରକଳା ନିଜେ ନିଜେ ଶିଖିଛନ୍ତି। ତାଙ୍କ ବାପା ଜଣେ ଟେରାକୋଟା ଶିଳ୍ପୀ। ପିଲାଦିନରୁ ସେ ବାପାଙ୍କ ସହିତ କାମ କରି ଅଭିଜ୍ଞତା ହାସଲ କରିପାରିଛନ୍ତି। ଏବେ ଚିତ୍ରକଳାରେ ଡିଗ୍ରୀ ଶିକ୍ଷା ଅଧ୍ୟୟନ କରୁଛନ୍ତି। ପ୍ରୋତ୍ସାହନ ମିଳିଲେ ସେ ଜଣେ ଦକ୍ଷ ଓ ବଳିଷ୍ଠ ଚିତ୍ରକାର ଭାବେ ଜିଲା ପାଇଁ ଗୌରବ ଆଣି ପାରିବେ ଏବଂ ଅନ୍ୟ ଆଗ୍ରହୀ ଚିତ୍ରକାରଙ୍କ ପାଇଁ ଉଦାହରଣ ହୋଇ ପାରିବେ ବୋଲି ଅଧ୍ୟାପକ ବିପିନ ସାହୁ କହିଛନ୍ତି।
