ମୁମ୍ବାଇ,୩।୧୧: ମହାରାଷ୍ଟ୍ରରେ ରାଜନୈତିକ ଅସ୍ଥିରତା ଜାରି ରହିଛି। ସରକାର ଗଠନ ପାଇଁ ଭାଜପା-ଶିବସେନା ମଧ୍ୟରେ ଅଙ୍କକଷା ଛିଡୁ ନ ଥିବାରୁ କଂଗ୍ରେସ, ଏନସିପି ସହିତ ଅନ୍ୟ ଛୋଟ ଛୋଟ ଦଳ କିଙ୍ଗ୍ମେକର ହେବାକୁ ଅପେକ୍ଷା କରିଛନ୍ତି। ଏପରିସ୍ଥଳେ ସଙ୍କଟମୋଚନ କିଏ ସାଜିବ ନେଇ ଚର୍ଚ୍ଚା ଆରମ୍ଭ ହୋଇଛି। ଶିବସେନା ମୁଖପତ୍ର ସାମନାରେ କାର୍ଯ୍ୟକାରୀ ସମ୍ପାଦକ ସଞ୍ଜୟ ରାଉତଙ୍କର ଏକ ଲେଖା ରବିବାର ପ୍ରକାଶ ପାଇଛି। ଏଥିରେ ସେ ଭାଜପାକୁ ଟାର୍ଗେଟ୍ କରିବା ସହିତ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହଙ୍କ ଭୂମିକାକୁ ସମାଲୋଚନା କରିଛନ୍ତି। ଭାଜପା ରଥ କାଦୁଅରେ ଅଟକି ରହିଥିବାବେଳେ ସଙ୍କଟମୋଚନ ଶାହଙ୍କ ଦେଖା ନାହିଁ ବୋଲି ସଞ୍ଜୟ କହିଛନ୍ତି। ମହାରାଷ୍ଟ୍ର ବିଧାନସଭା ଆସନ ସଂଖ୍ୟା ୨୮୮ ମଧ୍ୟରୁ ସରକାର ଗଠନ ପାଇଁ ୧୪୫ ଜଣ ବିଧାୟକଙ୍କ ସମର୍ଥନର ଆବଶ୍ୟକତା ରହିଛି। ତେବେ ଭାଜପା ପାଖରେ ୧୦୫ ବିଧାୟକ ଥିବାବେଳେ ଶିବସେନା ପାଖରେ ୫୬, ଏନ୍ସିପି ୫୪ ଏବଂ କଂଗ୍ରେସ ପାଖରେ ୪୪ ବିଧାୟକ ରହିଛନ୍ତି। ଅବଶିଷ୍ଟ ଆସନରେ ଛୋଟ ଛୋଟ ଦଳର ବିଧାୟକ ବିଜୟ ଲାଭ କରିଛନ୍ତି। ତେବେ ଏକୁଟିଆ ଭାଜପା ଅବା ଶିବସେନା ମ୍ୟାଜିକ୍ ନମ୍ବର ହାସଲ କରିବାକୁ ସକ୍ଷମ ହେବ ନାହିଁ। ଏନ୍ସିପି, କଂଗ୍ରେସ ସହିତ ଅନ୍ୟ ଛୋଟ ଛୋଟ ଦଳଙ୍କ ସମର୍ଥନ ପାଇଲେ ଶିବସେନା ୧୭୦ ଆସନ ହାସଲ କରି ପାରିବ ବୋଲି ସଞ୍ଜୟ କହିଛନ୍ତି।
