କୋଟା,୨୦।୬: ରାଜସ୍ଥାନର କୋଟାରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ବିଜ୍ଞାନ ନଗରରେ ରହୁଥିବା ଫତେହଚନ୍ଦଙ୍କ ୧୨ବର୍ଷର ପୁଅ କୁଶଳ ମୋବାଇଲରେ ଅନ୍ଲାଇନ ଗେମ୍ ଖେଳୁଥିବା ବେଳେ ଆତ୍ମହତ୍ୟା କରିଥିବା ଜଣାପଡ଼ିଛି। ଆତ୍ମହତ୍ୟା କରିବା ସମୟରେ ସେ ରୁମ୍ରେ ଏକୁଟିଆ ଥିବା ବେଳେ ନିଜ ହାତରେ ଚୁଡ଼ି ଓ ମଙ୍ଗଳସୂତ୍ର ପିନ୍ଧିଥିଲେ। ସୂଚନାଯୋଗ୍ୟ, କୁଶଳଙ୍କ ଏବେ ସ୍କୁଲ ଛୁଟି ଥିବା ବେଳେ କିଛି ଦିନ ହେଲା ସେ ମୋବାଇଲରେ ବ୍ଲୁ ହ୍ବେଲ ଭଳି ଏକ ଗେମ୍ ଖେଳୁଥିଲେ। ମଙ୍ଗଳବାର ନିଜ ରୁମରୁ ନ ବାହାରିବାରୁ ପରିବାର ଲୋକ ସନ୍ଦେହରେ ତାଙ୍କ ରୁମ୍କୁ ଯାଇଥିଲେ। ହେଲେ ସେ ନିଜକୁ ବାଥ୍ରୁମ ଭିତରେ ବନ୍ଦ କରିଦେଇଥିଲେ। କବାଟ ଭାଙ୍ଗିବା ପରେ କୁଶଳ ଆତ୍ମହତ୍ୟା କରିଥିବା ଦେଖିବାକୁ ମିଳିଥିଲା। ତୁରନ୍ତ ତାଙ୍କୁ ପରିବାର ଲୋକେ ହସ୍ପିଟାଲ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। କୁଶଳ ଏଭଳି କେବେ ଚୁଡ଼ି ଓ ମଙ୍ଗଳସୂତ୍ର ପିନ୍ଧି ନ ଥିବା ବେଳେ ସେ ଜୀବନ ହାରିଦେଇଛନ୍ତି ବୋଲି ପରିବାର ଲୋକେ କହିଛନ୍ତି। ତେବେ ସେ କେଉଁ ଗେମ୍ ଖେଳୁଥିଲେ ତାହା ସ୍ପଷ୍ଟ ହୋଇ ନ ଥିବା ବେଳେ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି। ଅନ୍ଲାଇନରେ ଗେମ୍ ଖେଳିବା ସମୟରେ କାହାରି ମୃତ୍ୟୁ ହେବା ଘଟଣା କୋଟାରେ ଏହା ପ୍ରଥମ।
