ପୁରୀ ଅଫିସ,୨୫।୮: ମେଘନାଦ ପାଚେରିକୁ ଲାଗି ରହିଥିବା ସମସ୍ତ ସରକାରୀ ଓ ବେସରକାରୀ ନିର୍ମାଣ ଉଚ୍ଛେଦ ହୋଇଛି। ଏହାପରେ ଶନିବାର ଏଏସ୍ଆଇର ବରିଷ୍ଠ ଅଧିକାରୀମାନେ କ୍ଷେତ୍ର ପରିଦର୍ଶନ କରିଛନ୍ତି। ଅବରୋଧ ଥିବା ସ୍ଥାନରେ ପାଚେରି କାମ ହୋଇପାରି ନ ଥିବାରୁ ବର୍ତ୍ତମାନ ସେହି ସ୍ଥାନର ସ୍ଥିତି କ’ଣ ରହିଛି, ପଥର କେମିତି ଅଛି ଏ ସବୁ ଅନୁଧ୍ୟାନ କରିଛନ୍ତି। ଏହି ସ୍ଥାନକୁ ଭଲ ଭାବେ ଯାଞ୍ଚ କରାଯାଇ ଆବଶ୍ୟକ ସଂରକ୍ଷଣ କରାଯିବ। ଏଥିସହିତ ଏଏସ୍ଆଇର ଉଦ୍ୟାନ ବିଭାଗ ମେଘନାଦ ପାଚେରି କଡ଼ରେ ଫାଙ୍କା ଜାଗାରେ ବିଭିନ୍ନ କିସମର ଫୁଲଚାରା ଲଗାଇବ। ସିଂହଦ୍ୱାର ସମ୍ମୁଖ ଭାଗ କିପରି ବିଭିନ୍ନ ଫୁଲ ଗଛରେ ସବୁଜିମା ରହିବ ସେ ବ୍ୟବସ୍ଥା ମଧ୍ୟ କରିବ।
ତେବେ ସବୁଠୁ ଗୁରୁତ୍ୱପୂର୍ଣ୍ଣ ହେଉଛି ମେଘନାଦ ପାଚେରିକୁ ଲଗାଇ ରାମଦୟା ପରିଷଦ କଂକ୍ରିଟ୍ ନିର୍ମାଣ କରିଥିଲା। ସେହିପରି ଆନନ୍ଦ ବଜାରରୁ ହାତଧୁଆ ପାଣି ଓ ଦକ୍ଷିଣ ପାର୍ଶ୍ୱରେ ମଧ୍ୟ ମେଘନାଦ ପାଚେରି ଦେଇ ପାଣି ତଳକୁ ଗଳୁଛି। ଏହି ସ୍ଥାନରେ ଶିଉଳି ବସି କଳା ପଡ଼ିିଯାଇଛି। ଫଳରେ ଏହା ପାଚେରିର ସୌନ୍ଦର୍ଯ୍ୟ ନଷ୍ଟ କରୁଛି। ଏହାକୁ ଅଧିକାରୀମାନେ ବୁଲି ଦେଖିଛନ୍ତି। ତେଣୁ ଶ୍ରୀମନ୍ଦିର ପ୍ରଶାସନକୁ ଅବଗତ କରାଇ ଏହାର ସମାଧାନ କରିବା ଲାଗି ଏଏସ୍ଆଇ ଅଧିକାରୀମାନେ ସ୍ଥିର କରିଛନ୍ତି। ଏହି ପରିଦର୍ଶନରେ ଏଏସ୍ଆଇର ସୁପରିଣ୍ଟେଣ୍ଡିଂ ଆର୍କିଓଲୋଜିଷ୍ଟ ଅରୁଣ ମଲ୍ଲିକ, ସଂରକ୍ଷଣ ସହାୟକ ଏସ୍.ଆର. ରାଓ, କନିଷ୍ଠ ସଂରକ୍ଷଣ ସହାୟକ ଜ୍ୟୋତିରଞ୍ଜନ ପ୍ରଧାନ ପ୍ରମୁଖ ଅଧିକାରୀ ସାମିଲ ଥିଲେ।
