ମୁମ୍ବାଇ: ସୈଫ ଲଳନା ସାରା ଅଲ୍ଲି ଖାନ୍ ‘କଫି ଉଇଥ୍ କରନ୍’ ଶୋ’ରେ କାର୍ତ୍ତିକ ଆର୍ୟନଙ୍କୁ ନେଇ ନିଜର ମନକଥା କହିବା ଦିନଠାରୁ ଚର୍ଚ୍ଚାରେ ରହିଆସୁଛନ୍ତି। ଏବେ ଉଭୟ ‘ଲଭ ଆଜ କଲ-୨’ର ଶୁଟିଂରେ ବ୍ୟସ୍ତ। ମାତ୍ର କିଛି ସମୟ ପାଇଲେ ଉଭୟ ଉଭୟଙ୍କ ସହ ସମୟ ବିତାଇବାକୁ ଆଦୌ ଭୁଲୁନାହାନ୍ତି। ନିକଟରେ ଉଭୟ ଶିମଲାର ବିଭିନ୍ନ ଗଳିରେ ମୁହଁ ଲୁଚାଇ ବୁଲୁଥିବା ଦେଖିବାକୁ ମିଳିଛି। ଏ ନେଇ ଫଟୋ ସହ କିଛି ଭିଡିଓ ମଧ୍ୟ ଭାଇରାଲ ହେଉଛି।
ଶିମଲାର ମାଲ୍ ରୋଡ୍ରେ ସାରା ଏବଂ କାର୍ତ୍ତିକ ବୁଲୁଥିବା ବେଳେ ମୁହଁକୁ ଅଧା ଲୁଚାଇଛନ୍ତି। କାର୍ତ୍ତିକ ରୁମାଲରେ ମୁହଁ ଘୋଡାଇଥିବା ବେଳେ ସାରା ଓଢ଼ଣୀରେ ମୁହଁ ଲୁଚାଇଥିଲେ। ମାତ୍ର ସେମାନଙ୍କୁ ରାସ୍ତାରେ ଯାଉଥିବା ଲୋକେ ଚିହ୍ନି ଦେଇଥିଲେ। ଏପରିକି ଅନେକେ ପ୍ରଶଂସକ ତାଙ୍କ ସହ ଫଟୋ ଉଠାଇଥିଲେ।
କେବଳ ଯେ ଏବେ ତାହା ନୁହେଁ ପୂର୍ବରୁ ମଧ୍ୟ ଉଭୟଙ୍କୁ ଏପରି ବୁଲୁଥିବା ଦେଖିବାକୁ ମିଳିଛି। ଇଦ୍ ସମୟରେ ଉଭୟ ବମ୍ବେର ମସ୍ଜିଦ୍ ବାହାରେ ବୁଲୁଥିବା ଦେଖାଯାଇଥିଲା।
