ମିଳୁନି ସାର, କଳାବଜାର ଅଭିଯୋଗ
7:32 amSeptember 20, 2019 / 21

ବଇଣ୍ଡା,୨୦।୯(ଡି.ଏନ.ଏ.)-ଅନୁଗୋଳ ଜିଲା କିଶୋରନଗର ବ୍ଲକରେ ଏବେ ୟୁରିଆ ସାର ଅଭାବ ଦେଖାଦେଇଛି। ଆବଶ୍ୟକ ପରିମାଣର ସାର ମିଳୁ ନ ଥିବାରୁ ଚାଷୀଙ୍କ ଚିନ୍ତା ବଢ଼ିଯାଇଛି। ଏହାର ଫାଇଦା ଉଠାଇ କେତେକ ଅସାଧୁ ବ୍ୟବାସୀୟ ଚଢ଼ା ଦରରେ ସାର ବିକ୍ରି କରୁଥିବାବେଳେ ପ୍ରଶାସନ ପକ୍ଷରୁ ଏଥିପ୍ରତି ଦୃଷ୍ଟ ଦିଆଯାଉ ନ ଥିବାରୁ ଅସନ୍ତୋଷ ଦେଖାଦେଇଛି।
କିଶୋରନଗର ବ୍ଲକର ୨୩ଟି ପଞ୍ଚାୟତର ୮ ହଜାର ୭୫୬ ଏକର ଧାନ ଚାଷ ଜମି ରହିଛି। ୬୦ ପ୍ରତିଶତ ଲୋକ ଚାଷକୁ ଜୀବିକା କରିଥିବା ବେଳେ ସେମାନଙ୍କୁ ସମସ୍ତ ସରକାରୀ ସୁବିଧା ଏବଂ ସବ୍‌ସିଡି ମାଧ୍ୟମରେ ଉପକରଣ ଯୋଗାଇ ଦିଆଯାଉ ନାହିଁ। ଚଳିତ ବର୍ଷ ଯେତିକି ବର୍ଷା ହୋଇଛି ସେଥିରେ ଚାଷୀମାନେ ଧାନ ଚାଷ କରିଛନ୍ତି। ହେଲେ ଏବେ ସାର ମିଳୁ ନ ଥିବା ଯୋଗୁ ଚାଷୀମାନେ ଚିନ୍ତିତ ହୋଇପଡ଼ିଛନ୍ତି। ବ୍ଲକ ପାଇଁ ୩ ହଜାର କୁଇଣ୍ଟାଲ ସାର ଆବଶ୍ୟକ ଥିବାବେଳେ ମାତ୍ର ୧୬୬୩ କୁଇଣ୍ଟାଲ ୟୁରିଆ ଆସିଛି। ଏଥିସହ ଡିଏପି ୫୦ କୁଇଣ୍ଟାଲ ଆସିଛି। ୮ଟି ସୋସାଇଟି ଓ ନକଟିନାଳୀ, ଘୋଷର, ରାଇବାହାଳ, କରମଳକଟା, ତାଳପଦର, ନାକିଚି ଆଦି ୬ଟି ଗ୍ରାମ(ଦୋକାନ ଗୁଡ଼ିକ)ରେ ସାର ବିକ୍ରି କରିବା ପାଇଁ ସରକାରଙ୍କ ପକ୍ଷରୁ ଲାଇସେନ୍ସ ବଣ୍ଟନ କରାଯାଇଛି। ହେଲେ ଲୁହାମୁଣ୍ଡା ସୋସାଇଟିରେ ଚଳିତ ବର୍ଷ ସାର ବିକ୍ରି କରାଯାଉ ନାହିଁ। ସୋସାଇଟିର ସମସ୍ତ ଗୃହ ରାଜପଥ ସମ୍ପ୍ରସାରଣ ପାଇଁ ଭଙ୍ଗା ଯାଇଥିବାରୁୁ ସାର ଅଣାଯାଇ ନାହିଁ। ଫଳରେ ଅସାଧୁ ବ୍ୟବସାୟୀମାନେ ଏହାର ଫାଇଦା ନେଇ ବଇଣ୍ଡା ଅଞ୍ଚଳରେ ସାର ୨ଗୁଣା ଦରରେ ବିକ୍ରି କରୁଥିବା ଚାଷୀମାନେ ଅଭିଯୋଗ କରିଛନ୍ତି। ୟୁରିଆ ୫୦ କେଜି ବସ୍ତା ୫୦୦ ଟଙ୍କା ଲେଖାଏଁ ବିକ୍ରି କରାଯାଉଛି। ଲୁହାମୁଣ୍ଡା ସୋସାଇଟିରେ ନୁନୁକାପଶି, ଲୁହାମୁଣ୍ଡା, ଜାମ୍ବୁନାଳୀ, ଗାଁ ବଇଣ୍ଡା ଆଦି ୫ ପଞ୍ଚାୟତର ଚାଷୀ ନିର୍ଭର କରୁଛନ୍ତି। ହେଲେ ସାର ମିଳି ନ ଥିବାରୁ ବଇଣ୍ଡା ଅଞ୍ଚଳର ବିଭିନ୍ନ ଦୋକାନରେ ବିକ୍ରି ହେଉଥିବା ସାରକୁ ନେଇ ବ୍ୟବହାର କରୁଛନ୍ତି। କୃଷି ବିଭାଗ ପକ୍ଷରୁ ସେଭଳି କୌଣସି ପଦକ୍ଷେପ ନିଆଯାଉ ନ ଥିବାରୁ କଳା ବ୍ୟବସାୟୀମାନେ ଏହାର ଫାଇଦା ଉଠାଉଥିବା ସାଧାରଣରେ ଅଭିଯୋଗ ହେଉଛି। ଏ ନେଇ ଚାଷୀ ସନାତନ ବେହେରା, ନବୀନ ନାୟକ, କନ୍ଦର୍ପ ମୁଖୀ ପ୍ରମୁଖ କହିଛନ୍ତି, ଆବଶ୍ୟକ ପରିମାଣର ୟୁରିଆ ମିଳୁନାହିଁ। ସୋସାଇଟିରେ ସାର ନ ଥିବାବେଳେ ବାହାର ଦୋକାନ ଗୁଡ଼ିକରୁ ୨ ଗୁଣ ଦରରେ କିଣି ବ୍ୟବହାର କରାଯାଉଛି। ସରକାର ଓ କୃଷି ବିଭାଗ ଏଥିପ୍ରତି ଦୃଷ୍ଟି ଦିଅନ୍ତୁ। ବଇଣ୍ଡା କୃଷି ଅଧିକାରୀ ଚଣ୍ଡି ପ୍ରସାଦ ମହାଳିକ କହିଛନ୍ତି, ସାରର କଳାବଜାରକୁ ନେଇ ବିଭାଗ ପକ୍ଷରୁ ଚଢାଉ କରାଯାଉଛି।