ଆଠଗଡ, ୧୫।୧୨(ସ୍ବ.ପ୍ର.): ତିଗିରିଆ ବ୍ଲକ ଅନ୍ତର୍ଗତ ଭିରୁଡା ପଞ୍ଚାୟତର ଗୋଡିଝରିଆ ଗ୍ରାମର ପୁଷ୍ପଲତା ବାରିକ ବିଧବା ଭତ୍ତା ପାଇବାରୁ ବଞ୍ଚତ୍ତ ହୋଇଛନ୍ତି। ସେ ବର୍ଷେ ହେବ ଏଥି ପାଇଁ ପ୍ରଶାସନ ପାଖକୁ ଦୌଡୁଛନ୍ତି। ମାତ୍ର ଏ ପର୍ଯ୍ୟନ୍ତ ତାଙ୍କୁ ଭତ୍ତା ମିଳିପାରିନାହଁି। ଫଳରେ ଏହି ନିରାଶ୍ରୟ ମହିଳା ଜଣକ ବହୁ ଦୁଃଖ କଷ୍ଟରେ ଦିନ କାଟୁଛନ୍ତି। ପ୍ରାୟ ବର୍ଷେ ପୂର୍ବେ କିଡ୍ନୀ ରୋଗରେ ଆକ୍ରାନ୍ତ ହୋଇଥିବା ସ୍ବାମୀ ସୁରେନ୍ଦ୍ର ବାରିକଙ୍କ ମୃତ୍ୟୁ ଘଟିଥିଲା । ଏହାପରଠାରୁ ପୁଷ୍ପଲତାଙ୍କ ଦୁଃଖ କହିଲେ ନ ସରେ। ପରିବାର ପୋଷଣ ତାଙ୍କ ପାଇଁ କଷ୍ଟସାଧ୍ୟ ହୋଇପଡିଛି । ଅନ୍ନପୂର୍ଣ୍ଣା ଯୋଜନାରେ ମିଳୁଥିବା ୩୫କିଲୋ ଚାଉଳରେ ପିଲାମାନଙ୍କ ପେଟକୁ ଦାନା ଗଣ୍ଡିଏ କଷ୍ଟରେ ଦେଉଥିବା ବେଳେ ଅନ୍ୟ କିଛି ଖର୍ଚ୍ଚ ପାଇଁ ପାଖରେ ଟଙ୍କା ନାହିଁ ବୋଲି ସେ କହିଛନ୍ତି । ଏନେଇ ପୁଷ୍ପଲତା ବିଧବା ଭତ୍ତା ନିମନ୍ତେ ତିଗିରିଆ ବ୍ଲକ କାର୍ଯ୍ୟାଳୟରୁ ଆରମ୍ଭକରି ଉପଜିଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଦୌଡିଛନ୍ତି। ଗତମାସରେ ତିଗିରିଆରେ ଆୟୋଜିତ ହୋଇଥିବା ଜିଲାପାଳଙ୍କ ଜନଶୁଣାଣି ଶିବିରରେ ସେ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିଲେ। ଶୁକ୍ରବାର ସେ ବିଧବା ଭତ୍ତାପାଇଁ ଆଠଗଡ ଉପଜିଲାପାଳଙ୍କ କାର୍ଯ୍ୟାଳୟକୁ ଆସିଥିଲେ। ଉପଜିଲାପାଳ କିମ୍ବା ଉପଖଣ୍ଡ ସାମାଜିକ ସୁରକ୍ଷା ଅଧିକାରୀ କାର୍ଯ୍ୟାଳୟରେ ନ ଥିବାରୁ ନିରାଶ ହୋଇ ଫେରିଯାଇଥିଲେ। ଏ ସମ୍ପର୍କରେ ଉପଜିଲାପାଳ ଅମିୟ କୁମାର ସାହୁ ଓ ସାମାଜିକ ସୁରକ୍ଷା ଅଧିକାରୀ ଉମେଶ ଚନ୍ଦ୍ର ସାହୁଙ୍କ ସହ ଫୋନ୍ ଯୋଗେ ଯୋଗାଯୋଗ କରିବାକୁ ଉଦ୍ୟମ କରାଯାଇଥିଲା। ମାତ୍ର ଏହା ନମ୍ବର ନ ଲାଗିବାରୁ ଏହା ସମ୍ଭବ ହୋଇ ପାରି ନଥିଲା। ତୁରନ୍ତ ତିଗିରିଆ ବ୍ଲକ ପ୍ରଶାସନ ପକ୍ଷରୁ ପୁଷ୍ପଲତାଙ୍କୁ ବିଧବା ଭତ୍ତା ପ୍ରଦାନ କରିବା ଲାଗି ଆବଶ୍ୟକ ପଦକ୍ଷେପ ନେବା ପାଇଁ ଗୋଡିଝରିଆ ଗ୍ରାମବାସୀ ଦାବି କରିଛନ୍ତି ।
