ବଅଁରପାଳ,୧୪ା୧୧(ଡି.ଏନ.ଏ.)- ଅନୁଗୋଳ ଜିଲା ବଅଁରପାଳ ବ୍ଲକ ଗଡସନ୍ତ୍ରୀଠାରେ ଚାଲିଥିବା ମା’ ଲୋଭୀ ଠାକୁରାଣୀଙ୍କ ଯାତ୍ରାର ବୁଧବାର ଥିଲା ଦ୍ୱିତୀୟ ଦିବସ। ପ୍ରଥମ ଦିନ ପରି ମା’ଙ୍କ ଏହି ଯାତ୍ରା ଦେଖିବାକୁ ଆଖପାଖ ଅଞ୍ଚଳର ବହୁ ସଂଖ୍ୟକ ଭକ୍ତ ଭିଡ଼ ଲଗାଇଥିଲେ। ସକାଳେ ପୀଠସ୍ଥଳୀରେ ମା’ଙ୍କ ଯଥାରୀତି ପୂଜାର୍ଚ୍ଚନା କରାଯାଇଥିଲା। ଶ୍ରଦ୍ଧାଳୁମାନେ ଧାଡ଼ିରେ ଆସି ମା’ଙ୍କ ଦର୍ଶନ କରିଥିଲେ। ଯାତ୍ରାରେ ୫ଶହରୁ ଊର୍ଦ୍ଧ୍ୱ ଦୋକାନ ବଜାର ପଡିଛି। ମନୋହରି, ପିତ୍ତଳ ସାମଗ୍ରୀ, ପୋଷାକ ଦୋକାନ ସହ ବିଭିନ୍ନ ପ୍ରକାର ଖାଦ୍ୟ ବିକ୍ରି କରାଯାଉଛି। ବିଭିନ୍ନ ସାମଗ୍ରୀ କିଣିବା ସହ ଲୋକେ ଖାଇବା ଜିନିଷର ମଜା ନେଉଛନ୍ତି। ସେହିପରି ଯାତ୍ରା ଅବସରରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯାଇଛି। ଶୁକ୍ରବାର ମା’ଙ୍କ ଯାତ୍ରା ଉଦ୍ଯାପିତ ହେବ। ଯାତ୍ରା ପରେ ମା’ ଲୋଭୀ ତୁଳସୀପାଳ ସ୍ଥିତ ଦିଅଁ ଘରକୁ ବାହୁଡିବେ। ଟ୍ରଷ୍ଟ ବୋର୍ଡ ସଭାପତି ସୁନୀଲ ମାଝି, ସମ୍ପାଦକ ଭଜମନ ମହାନ୍ତି, ଅନ୍ତର୍ଯ୍ୟାମୀ ବିଶ୍ୱାଳ, ବୈକୁଣ୍ଠ ବେହେରା, ବିଦ୍ୟାଧର ସାମଲ, ପ୍ରଶାନ୍ତ ମାଝି, ସଂସାର ମାଝି, ଗୋକୁଳ ନାୟକ, ଦୈତାରୀ ସାହୁ, ପ୍ରଫୁଲ୍ଲ ଅଝା, ଲୋକନାଥ ମାଝି, ଗଗନ ସାହୁ, ରାହାସ ବିଶ୍ୱାଳ, ରାମ ସାମଲ, ପଟେଇତ ମାଝିଙ୍କ ସମେତ ପୂଜା କମିଟିର ସମସ୍ତ ସଦସ୍ୟ ଓ ଗ୍ରାମବାସୀ ଯାତ୍ରା ପରିଚାଳନାରେ ସହଯୋଗ କରୁଛନ୍ତି।
