ନୂଆଦିଲ୍ଲୀ,୨୭-୧୦: ଦେଶରେ ମାନ୍ଦାବସ୍ଥା ଲାଗି ରହିଥିବା ବେଳେ ଏହାର ପ୍ରଭାବ ରେଲଓ୍ବେ ଉପରେ ପଡିଛି। ଚଳିତ ଆର୍ଥତ୍କ ବର୍ଷ ଦ୍ୱିତୀୟ ତ୍ରୈମାସରେ ପାସେଞ୍ଜର ଏବଂ ମାଲ ପରିବହନ ବର୍ଗରେ ରେଲଓ୍ବେ ରାଜସ୍ବ ଯଥାକ୍ରମେ ୧୫୫ ଏବଂ ୩୯୦୧ କୋଟି ଟଙ୍କା ହ୍ରାସ ଘଟିଛି। ଏହାର ପୂର୍ବ ତ୍ରୈମାସ ତୁଳନାରେ ଏହି ରାଜସ୍ବ ହ୍ରାସ ଘଟିଥିବା ସୂଚନା ଅଧିକାର ତଥ୍ୟରୁ ଏହା ସାମ୍ନାକୁ ଆସିଛି। ମଧ୍ୟପ୍ରଦେଶର ନିମୁଚ୍ ବାସିନ୍ଦା ଶେଖର ଗୌର ରେଲଓ୍ବେ ରାଜସ୍ବକୁ ନେଇ ଏକ ଆର୍ଟିଆଇ ଆବେଦନ କରିଥିଲେ। ୨୦୧୯-୨୦ ଆର୍ଥତ୍କ ବର୍ଷର ପ୍ରଥମ ତ୍ରୈମାସରେ ରେଲଓ୍ବେ ପାସେଞ୍ଜର ଭଡା ବାବଦକୁ ୧୩,୯୯୮.୯୨ କୋଟି ଟଙ୍କା ଲାଭ ରାଜସ୍ବ ହାସଲ କରିଥିଲା। ଏହା ଜୁଲାଇ-ସେପ୍ଟେମ୍ବର ତ୍ରୈମାସରେ ୧୩,୨୪୩.୮୧ କୋଟି ଟଙ୍କାକୁ ହ୍ରାସ ଘଟିଛି।
ସେହିଭଳି ଚଳିତ ବର୍ଷ ପ୍ରଥମ ତ୍ରୈମାସରେ ମାଲ ପରିବହନ ବାବଦକୁ ରେଲଓ୍ବେ ୨୯,୨୬୬.୯୨ କୋଟି ଟଙ୍କା ରାଜସ୍ବ ପାଇଥିଲା। ଏହା ଦ୍ୱିତୀୟ ତ୍ରୈମାସରେ ୨୫,୧୬୫.୧୩ କୋଟି ଟଙ୍କାକୁ ଖସି ଆସିଛି। ଟିକେଟ ବୁକିଂ ଉପରେ ମଧ୍ୟ ମାନ୍ଦାବସ୍ଥାର ପ୍ରଭାବ ଦେଖା ଦେଇଥିବା ଜଣାପଡିଛି। ଗତ ବର୍ଷ ସମାନ ସମୟ ତୁଳନାରେ ଚଳିତ ବର୍ଷ ଏପ୍ରିଲଠାରୁ ସେପ୍ଟେମ୍ବର ମାସ ମଧ୍ୟରେ ବୁକିଂ ୧.୨୭% କମିଛି। ଏହାବାଦ ସବ୍ଅର୍ବାନ ରେଳ ଯାତ୍ରା ସମାନ ସମୟରେ ୧.୧୩% ହ୍ରାସ ଘଟିଥିବା ଆର୍ଟିଆଇ ତଥ୍ୟରୁ ସାମ୍ନାକୁ ଆସିଛି। ମାନ୍ଦାବସ୍ଥା ପ୍ରଭାବକୁ ହ୍ରାସ କରିବା ଲାଗି ରେଲଓ୍ବେ ପକ୍ଷରୁ ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ନିକଟରେ ଏହା ମାଲ ପରିବହନ ଟ୍ରାଫିକ ଉପରେ ଲାଗୁ ହେଉଥିବା ବିଜି ରିଜନ ସରଚାର୍ଜକୁ ରେଲଓ୍ବେ ଉଠାଇ ଦେଇଛି।
ଏହା ଏୟାର କଣ୍ଡିସନ ଚେୟାର କାର ଏବଂ ଏକଜିକ୍ୟୁଟିଭ୍ କାର ସିଟିଂ ଉପରେ ୨୫% ପର୍ଯ୍ୟନ୍ତ ରିହାତି ବ୍ୟବସ୍ଥା ଆରମ୍ଭ କରିଛି। ୩୦ ବର୍ଷ ପୁରୁଣା ଡିଜେଲ ଇଞ୍ଜିନଗୁଡିକୁ ବାଦ ଦେବା ଲାଗି ଯୋଜନା ରହିଛି। ସେହିଭଳି ଇନ୍ଧନ ବିଲ୍ ହ୍ରାସ, ଅଣ ଭଡା ରାଜସ୍ବ ବୃଦ୍ଧି, ଜମିର ମୁଦ୍ରାକରଣ ଭଳି ବିଭିନ୍ନ ପ୍ରସଙ୍ଗକୁ ଏବେ ରେଲଓ୍ବେ ଗୁରୁତ୍ୱ ଦେଉଛି। ମାନ୍ଦାବସ୍ଥା ବିରୋଧରେ ଲଢିବା ଲାଗି ବିଭିନ୍ନ ପଦକ୍ଷେପ ଗ୍ରହଣ କରିବାକୁ ରେଳ ବୋର୍ଡ ଏହାର ୧୭ ଜୋନକୁ ଚିଠି ଲେଖିଥିଲା। ମାଲ ପରିବହନ କ୍ଷେତ୍ରରେ ହ୍ରାସ ହେବା ଏବେ ରେଲଓ୍ବେ ଲାଗି ଏକ ଚିନ୍ତାର କାରଣ ପାଲଟିଛି। ବର୍ଷା କୋଇଲା ପରିବହନକୁ ପ୍ରଭାବିତ କରିଥିବା ବେଳେ ମାନ୍ଦାବସ୍ଥା ଇସ୍ପାତ ଏବଂ ସିମେଣ୍ଟ କ୍ଷେତ୍ରକୁ କ୍ଷତିଗ୍ରସ୍ତ କରିଛି। ଏଭଳି ପ୍ରସଙ୍ଗକୁ ଧ୍ୟାନରେ ରଖି ପଦକ୍ଷେପ ନିଆଯାଉଥିବା ବେଳେ ରାଜସ୍ବ କ୍ଷତିକୁ ଭରଣା କରିବା ଲାଗି ରେଲଓ୍ବେ ଶୀଘ୍ର ସକ୍ଷମ ହେବ ବୋଲି ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି।
