ନୂଆପଡା ଅଫିସ/ବୋଡେନ,୩୦ା୭: ନୂଆପଡା ଜିଲା ପ୍ରତିବର୍ଷ ମରୁଡି କବଳିତ ହେଉଥିବାବେଳେ ଏଠାରେ ଚାଷୀଙ୍କ ଗୁହାରି ଶୁଣିବାକୁ କର୍ତ୍ତୃପକ୍ଷ ହେଳା କରୁଥିବା ଅଭିଯୋଗ କରି ବୋଡେନ ବ୍ଲକ ଭାଜପା ତରଫରୁ ତହସିଲ ଅଫିସ ଘେରାଉ କରାଯାଇଛି। ଏହି ପରିପ୍ରେକ୍ଷୀରେ ରାଜ୍ୟପାଳଙ୍କ ଉଦ୍ଦେଶ୍ୟରେ ତହସିଲଦାରଙ୍କୁ ୧୨ଦଫା ଦାବିପତ୍ର ପ୍ରଦାନ କରାଯାଇଛି ।
ବୋଡେନ ବ୍ଲକ ପାତାଳ ଗଙ୍ଗା ମଣ୍ଡଳ ସଭାପତି ନୀଳାମ୍ବର ମେହେରଙ୍କ ନେତୃତ୍ୱରେ ଶତାଧିକ ଭାଜପା କକର୍ମକର୍ତ୍ତାମାନେ ସ୍ଥାନୀୟ ବସଷ୍ଟାଣ୍ଡ ନିକଟରୁ ଏକ ରାଲିରେ ବାହାରିଥିଲେ। ବୋଡେନ ବସ୍ତି ପରିକ୍ରମା କରି ସରକାରଙ୍କ କୃଷୀ ଏବଂ କୃଷକ ମାରଣାନୀତି ଉପରେ ବିଭିନ୍ନ ସ୍ଲୋଗାନମାନେ ଦେଇଥିଲେ। ଶେଷରେ ବୋଡେନ ତହସିଲ ଗେଟ ସମ୍ମୁଖରେ ଠୁଳ ହୋଇ ଦୀର୍ଘ ସମୟ ଧରି ବିକ୍ଷୋଭ ପ୍ରଦର୍ଶନ କରିଥିଲେ । ଶେଷରେ ସ୍ଥାନୀୟ ତହସିଲଦାର ପୂର୍ଣ୍ଣଚନ୍ଦ୍ର ଭୋଇଙ୍କୁ ରାଜ୍ୟପାଳଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଥିଲେ । ଏଥିରେ ବୋଡେନ ସମେତ ସମଗ୍ର ନୂଆପଡା ଜିଲାକୁ ମରୁଡି ଘୋଷଣା କରିବା, ଗତ ୨୦୧୭-୧୮ବର୍ଷର କୃଷୀ ବୀମା, ୨୦୧୮ର ମରୁଡି ସହାୟତା, ଜଳ ସେଚନର ସୁବିଧା, ପ୍ରଧାନମନ୍ତ୍ରୀ ସମ୍ମାନିଧି ଯୋଜନାରେ ସାମିଲ କରିବା ଆଦି ୧୨ ଦଫା ଦାବି କରାଯାଇଛି । ଏହାକୁ ତୁରନ୍ତ ପୂରଣ କରାଯିବାକୁ ଦାବି କରାଯାଇଥିଲା । ଏହି ଆନ୍ଦୋଳନରେ ଜିଲା ସଭାପତି ଶିବ ପ୍ରସାଦ ମୁଣ୍ଡ, ଅନନ୍ତରାମ ଚିନ୍ଦା, ଜିଲା ସାଧାରଣ ସମ୍ପାଦକ ସୁବ୍ରତ ଠାକୁର, ଅତିନ୍ଦ୍ର ଜିତ ସିଂ ମଲ୍ଲିକ, କିର୍ତନ ବାଗ, ମନିଜର ଆର୍ଯ୍ୟ, ବିଜୟ କୁମାର ବେହେରା, ଅମର ମାଝି, ଅଜୟ ଦାସ, ମୂରଲୀ ହଂସ, ରାଧା ପଟେଲ ପ୍ରମୁଖ ସାମିଲ ଥିଲେ।
