ରୂପ୍ସା, ୧।୩(ଡି.ଏନ.ଏ.)-ବାଲେଶ୍ୱର ଜିଲା ରୂପ୍ସା ଥାନା ଗଡ଼ପଦା ପଞ୍ଚାୟତ ଅନ୍ତର୍ଗତ ଲଛମନଖୁଣ୍ଟା ୟୁଜିଏମ୍ଇ ସ୍କୁଲରେ ଶନିବାର ଉତ୍ତେଜନା ଦେଖାଦେଇଛି। ଛାତ୍ରୀଛାତ୍ରଙ୍କୁ ମଧ୍ୟାହ୍ନଭୋଜନରେ ଦିଆଯାଇଥିବା ଭାତରେ ପୋକ ଥିବାରୁ ଅଭିଭାବକମାନେ ସ୍କୁଲରେ ପହଞ୍ଚତ୍ ହୋହଲ୍ଲା କରିଛନ୍ତି। ପ୍ରଧାନଶିକ୍ଷକଙ୍କ ଦାୟିତ୍ୱହୀନତାକୁ ବିରୋଧ କରି ତାଙ୍କୁ ଅଫିସ୍ ଭିତରେ ୫ଘଣ୍ଟା ଅଟକ ରଖାଯାଇଥିଲା। ଘଟଣାସ୍ଥଳରେ ରୂପ୍ସା ଥାନା ଏଏସ୍ଆଇ ହେମନ୍ତ କୁମାର ଦେବ, ସିଆରସିସି ଅନିଲ କୁମାର ପାତ୍ର, ମ୍ୟାନେଜମେଣ୍ଟ କମିଟି ସଭାପତି ୟୁସୁଫ ଖାନ ପ୍ରମୁଖ ପହଞ୍ଚତ୍ ଉତ୍ତ୍ୟକ୍ତ ଲୋକଙ୍କୁ ବୁଝାଶୁଝା କରିବା ପରେ ଅପରାହ୍ନ ସାଢ଼େ ୩ଟାରେ ପ୍ରଧାନଶିକ୍ଷକ ମୁକୁଳିଥିଲେ। ଅଭିଯୋଗ ମୁତାବକ ସମସ୍ୟାର ସମାଧାନ ଦିଗରେ ଶୀଘ୍ର ବିଭାଗୀୟ ପଦକ୍ଷେପ ଗ୍ରହଣ କରା ନ ଗଲେ ଆନ୍ଦୋଳନ ହେବ ବୋଲି ଚେତାବନୀ ଦିଆଯାଇଛି।
ଶନିବାର ସକାଳୁଆ ସ୍କୁଲ ଥିଲା। ପୂର୍ବାହ୍ନ ୧୦ଟାରେ ପିଲାଙ୍କୁ ମଧ୍ୟାହ୍ନଭୋଜନ ଖାଇବାକୁ ଦିଆଯାଇଥିଲା। ହେଲେ ଛାତ୍ରୀଛାତ୍ର ପୋକରା ଚାଉଳ ଭାତ ଖାଉଥିବା ଜାଣିପାରି ଅଭିଭାବକ ଜାହିଦ୍ ବକ୍ସ, ମଣି ସିଂ, ଚମ୍ପା ବିନ୍ଧାଣୀ, ସର୍ପରାଜ ଖାନ, ପରମାନନ୍ଦ ସିଂ, ଜୀବନ ସିଂ, ଗୌରୀ ମଢୁଆଳ, ଶ୍ରୀକାନ୍ତ ସିଂଙ୍କ ସମେତ ଅନ୍ୟମାନେ ସ୍କୁଲରେ ପହଞ୍ଚତ୍ ଏହାକୁ ବିରୋଧ କରିଥିଲେ। ଛାତ୍ରୀଛାତ୍ରଙ୍କୁ ଦୀର୍ଘଦିନ ଧରି ପୋକରା ଚାଉଳର ଭାତ ଦିଆଯାଉଥିବା ପ୍ରଧାନଶିକ୍ଷକଙ୍କୁ ପୂର୍ବରୁ ଅବଗତ କରାଯାଇଥିଲେ ହେଁ ଏହାର ପୁନରାବୃତ୍ତି ଘଟୁଥିବାରୁ ତାଙ୍କୁ ଅଟକ ରଖି ବିଭାଗୀୟ ଉଚ୍ଚ କର୍ତ୍ତୃପକ୍ଷଙ୍କୁ ଘଟଣା ସମ୍ପର୍କରେ ଜଣାଇଥିଲେ। ଫଳରେ ଅନ୍ୟ ଶିକ୍ଷକ ଓ କର୍ମଚାରୀମାନେ ସ୍କୁଲରେ ଅଟକ ରହିଥିଲେ। ବିଦ୍ୟାଳୟ ନଳକୂପରୁ ପାଣି ବାହାରୁ ନ ଥିବାରୁ ସ୍କୁଲ ସମୟରେ ଛାତ୍ରୀଛାତ୍ରଙ୍କୁ ବାହାରକୁ ପାଣି ଆଣିବା ଓ ମାର୍କେଟିଂ ପାଇଁ ପଠାଇବା ପ୍ରଧାନଶିକ୍ଷକଙ୍କ ଦାୟିତ୍ୱହୀନତା ବୋଲି ସିଆର୍ସିସିଙ୍କଠାରେ ଅଭିଯୋଗ ହୋଇଥିଲା। ଏହାଛଡ଼ା ଗତ ୨୭ତାରିଖ ଅପରାହ୍ନ ୨ଟା ୨୦ମିନିଟ୍ରେ ପିଲାଙ୍କୁ ମଧ୍ୟାହ୍ନଭୋଜନ ଦିଆଯିବା ଘଟଣା ମଧ୍ୟ ସିଆର୍ସିସିଙ୍କୁ ଅବଗତ କରାଯାଇଥିଲା। ବିଦ୍ୟାଳୟ ହତା ପରିଷ୍କାର ପରିଚ୍ଛନ୍ନ କରା ନ ଯିବା, ପାଣି ଟାଙ୍କି ବ୍ୟବହାର ଉପଯୋଗୀ ନ ଥିବାରୁ ଉତ୍ତେଜନା ଦେଖାଦେଇଥିଲା। ପ୍ରଧାନଶିକ୍ଷକଙ୍କ ସମେତ ଦୀର୍ଘଦିନ ଧରି ରହିଥିବା ଶିକ୍ଷୟିତ୍ରୀ ଶିକ୍ଷକଙ୍କ ତୁରନ୍ତ ବଦଳି ଦାବି ହୋଇଥିଲା। ସିଆର୍ସିସି ପାତ୍ର ସମସ୍ତ ସମସ୍ୟାର ସମାଧାନ ହେବ ବୋଲି ପ୍ରତିଶ୍ରୁତି ଦେଇଥିଲେ। ମାର୍ଚ୍ଚ ୧୨ ତାରିଖରେ ଅଭିଭାବକ ବୈଠକ ଡକାଯାଇ ସମସ୍ତ ଘଟଣାର ପୁଙ୍ଖାନୁପୁଙ୍ଖ ଆଲୋଚନା ପୂର୍ବକ ପଦକ୍ଷେପ ଗ୍ରହଣ କରାଯିବ ବୋଲି ସେ ଘୋଷଣା କରିବା ପରେ ଅପରାହ୍ନ ସାଢ଼େ ୩ଟାରେ ପ୍ରଧାନଶିକ୍ଷକଙ୍କ ସମେତ ଅନ୍ୟ ଶିକ୍ଷକମାନେ ଘରକୁ ଯାଇଥିଲେ। ଏ ସମ୍ପର୍କରେ ପ୍ରଧାନଶିକ୍ଷକ ରମେଶ ସିଂଙ୍କୁ ପଚରାଯିବାରୁ ସେ କହିଥିଲେ ଯେ, ପୋକରା ଚାଉଳ ପାଛୁଡ଼ି ରୋଷେଇ କରିବା ପାଇଁ ମୁଁ ରୋଷେୟାଙ୍କୁ କହିଥିଲି।
