ବେଗୁନିଆପଡ଼ା,୬।୯(ଡି.ଏନ.ଏ.)-ବେଗୁନିଆପଡ଼ା ବଜାରରେ ଖୋଲିଥିବା ଠିପି ବନ୍ଦ ମଦ ଦୋକାନ ସ୍ଥାନାନ୍ତରଣ ଦାବିରେ ଶୁକ୍ରବାର ଦୋକାନ ଆଗରେ ମହିଳାମାନେ ପୁନର୍ବାର ଧାରଣା ଦେଇଛନ୍ତି। ଏହି ମଦ ଦୋକାନ ପଡ଼ୋଶୀରେ ଜଣେ ବ୍ୟକ୍ତିଙ୍କ ଘର ରହିଛି। ମଦ୍ୟପମାନେ ବେଳେ ବେଳେ ମଦ ଦୋକାନ ଜାଣି ନ ପାରି ଉକ୍ତ ବ୍ୟକ୍ତିଙ୍କ ଘରେ ଯାଇ ମଦ ମାଗୁଛନ୍ତିି। ମଦ ଦୋକାନଟି ବଜାର ମଧ୍ୟରେ ଥିବାରୁ ସାଧାରଣରେ ମଧ୍ୟ ବହୁ ଅସୁବିଧା ହେଉଛି। ଏହାର ପ୍ରତିବାଦରେ ୨୦୧୮ ଡିସେମ୍ବର ୨୫ରେ ଲୋକେ ରାସ୍ତାରୋକ କରିଥିଲେ। ପ୍ରଶାସନ ପକ୍ଷରୁ ଏହା ସ୍ଥାନାନ୍ତରଣ କରିବା ପର୍ଯ୍ୟନ୍ତ ଉକ୍ତ ଦୋକାନକୁ ବନ୍ଦ କରାଯାଇଥିଲା। ତହସିଲଦାରଙ୍କ ପତ୍ରସଂଖ୍ୟା ୧୯୫୦/୨୬ା୫ା୨୦୧୯କୁ ଅନୁଧ୍ୟାନ କରି ଗଞ୍ଜାମ ଜିଲାପାଳଙ୍କ ଚିଠି ନଂ . ୭୭୦/୨୬ା୩ା୨୦୧୯ରେ ଉକ୍ତ ଦୋକାନ ସ୍ଥାନାନ୍ତରଣ କରିବା ପାଇଁ ନିର୍ଦ୍ଦେଶ ଦେଇଥିଲେ। କିନ୍ତୁ ଗତ ଅଗଷ୍ଟ ୧୯ ତାରିଖରେ ଲାଇସେନ୍ସକୁ ମାର୍ଚ୍ଚ ୨୦୨୦ ପର୍ଯ୍ୟନ୍ତ ନବୀକରଣ କରି ମଦ ଦୋକାନ ଖୋଲିବାକୁ ଅନୁମତି ପ୍ରଦାନ କରାଯାଇଥିଲା। ଏଥିପାଇଁ ପୁଣି ସମ୍ପୃକ୍ତ ବ୍ୟକ୍ତି ଓ ମହିଳା ମାନେ ଗତ ୨୬ରେ ଜିଲାପାଳଙ୍କୁ ଅଭିଯୋଗ କରିଥିଲେ। ଯଦି ଉକ୍ତ ଦୋକାନ ୭ ଦିନ ମଧ୍ୟରେ ବନ୍ଦ କିମ୍ବା ସ୍ଥାନାନ୍ତରିତ କରାନଯାଏ ତେବେ ପୁଣି ଆନ୍ଦୋଳନ କରିବା ପାଇଁ ବାଧ୍ୟ ହେବୁ ବୋଲି ସେମାନେ କହିଥିଲେ। ହେଲେ କୌଣସି ସୁଫଳ ନ ମିଳିବାରୁ ଶୁକ୍ରବାର ସମ୍ପୃକ୍ତ ପରିବାର ସହ ବହୁ ମହିଳା ଧାରଣାରେ ବସିଥିଲେ। କୋଦଳା ତହସିଲଦାର ପ୍ରଭାତ କୁମାର ପରିଡା, ଦିଲୀପ କୁମାର ସାହୁ, ବେଗୁନିଆପଡ଼ା ଫାଣ୍ଡି ଅଧିକାରୀ ରଶ୍ମି ରଞ୍ଜନ ବେହେରା ପହଞ୍ଚି ଲୋକମାନଙ୍କୁ ବୁଝାଶୁୁଝା କରିଥିଲେ। ଏକ ମାସ ମଧ୍ୟରେ ଦୋକାନ ସ୍ଥାନାନ୍ତରଣ କରାଯିବା ପାଇଁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା।
