ଭୁବନେଶ୍ୱର, ୧୪ା୯(ବ୍ୟୁରୋ): ଭୁବନେଶ୍ୱରର ଘରେ ଘରେ ଲାଗିବ ଡିଜିଟାଲ ଠିକଣା ବୋର୍ଡ। ଭୁବନେଶ୍ୱର ମହାନଗର ନିଗମ (ବିଏମ୍ସି) ଦ୍ୱାରା ପ୍ରସ୍ତୁତ କରାଯାଇଥିବା ଏହି ଯୋଜନାଟି ମୁଖ୍ୟତଃ ହୋଲ୍ଡିଂ ଟ୍ୟାକ୍ସ ଖିଲାପକାରୀଙ୍କୁ ଚିହ୍ନଟ କରିବାକୁ କରାଯାଇଥିବାବେଳେ ଏଥିରେ ଭୁବନେଶ୍ୱରରେ ବସବାସ କରୁଥିବା ଲୋକସଂଖ୍ୟାର ତଥ୍ୟ ମିଳିବ। ଏଥିସହ କେଉଁଟା ବ୍ୟବସାୟିକ ଅନୁଷ୍ଠାନ ଓ କେଉଁଟା ବାସଗୃହ ତାହାର ତଥ୍ୟ ରହିପାରିବ। ଏନେଇ ପୂର୍ବ ଯୋଜନା ଅନୁଯାୟୀ ବିଏମ୍ସି ନୂଆ ଟ୍ୟାକ୍ସ କଲେକ୍ଟର ନିୟୋଜିତ କରିବ। ତା’ସହ ଭୁବନେଶ୍ୱରରେ ଯେଉଁମାନେ ଘର ଖୋଜିବାରେ ସମସ୍ୟା ଅନୁଭବ କରୁଛନ୍ତି ସେମାନଙ୍କୁ ସହାୟତା ମିଳିବ। ସମସ୍ତ ଓ୍ବାର୍ଡରେ ନିୟୋଜିତ ଥିବା ଓ୍ବାର୍ଡ ଅଫିସରମାନେ ଏହାକୁ ତଦାରଖ କରିବେ। ଏହି ନୂତନ ବ୍ୟବସ୍ଥା ପାଇଁ ବିଏମ୍ସି ଗତ ୫ତାରିଖରୁ ଅନ୍ଲାଇନ୍ରେ ଟେଣ୍ଡର ପ୍ରକ୍ରିୟା ଆରମ୍ଭ କରିଛି। ଟେଣ୍ଡର ପ୍ରକ୍ରିିୟା ସରିବା ପରେ ସମ୍ପୃକ୍ତ ସଂସ୍ଥା ଆସନ୍ତା ୬ମାସ ମଧ୍ୟରେ ଭୁବନେଶ୍ୱରର ସମସ୍ତ ଓ୍ବାର୍ଡରେ ସର୍ଭେ କରି ବିଏମ୍ସିକୁ ରିପୋର୍ଟ ଦେବ। ତା’ପରେ ପ୍ରତ୍ୟେକ ଘରେ ଡିଜିଟାଲ ଠିକଣା ବୋର୍ଡ ଲଗାଯିବ ବୋଲି ବିଏମ୍ସି ଯୋଜନା ରଖିଛି।
ବିଏମ୍ସି ଆଡିଶନାଲ କମିଶନର ସୁରଥଚନ୍ଦ୍ର ମଲ୍ଲିକ କହିଛନ୍ତି, ପୂର୍ବରୁ ଘର ସଂଖ୍ୟା ଅନୁଯାୟୀ ଖୋଜି ବାହାର କରିବା କାଠିକର ପାଠ ହେଉଥିଲା। ନୂଆ ଯୋଜନାରେ ପ୍ରତ୍ୟେକ ଘରକୁ ଏକ ଆଇଡି ନମ୍ବର ବା ପରିଚୟ ସଂଖ୍ୟା ଯୋଗାଇ ଦିଆଯିବ। ତାହା ଜିପିଏସ୍ ଆଧାରିତ ହୋଇଥିବାରୁ ପ୍ରତି ଘରର ଭୌଗୋଳିକ ଚିହ୍ନଟ ସହଜରେ ହୋଇପାରିବ। ଏପରି କି ଘର, ଘର ସମ୍ପର୍କିତ ତଥ୍ୟ ଓ ଘରକୁ ସଂଯୋଗ କରୁଥିବା ମୁଖ୍ୟ ରାସ୍ତା, ବିମାନବନ୍ଦର, ବସ୍ଷ୍ଟାଣ୍ଡ, ରେଳଷ୍ଟେଶନ ଓ ଲେନ୍ ବିବରଣୀ ଏହି ନୂଆ ବ୍ୟବସ୍ଥାରେ ଉପଲବ୍ଧ ହେବ ବୋଲି ସେ କହିଛନ୍ତି। ସେହିପରି ଡିଜିଟାଲ ଠିକଣା ବୋର୍ଡ ଲାଗିଯିବା ପରେ କୌଣସି ଘରେ ରହୁଥିବା ବ୍ୟକ୍ତିଙ୍କ ବିବରଣୀ ସମେତ ବିଦ୍ୟୁତ୍ ସଂଯୋଗ, ପାଇପ ଜଳ ସଂଯୋଗ, ସମ୍ପତ୍ତି, ଟ୍ୟାକ୍ସ ଦେୟ ତଥ୍ୟ ମିଳିପାରିବ ଓ ଏସବୁ ସହଜରେ ପରିଚାଳନା କରାଯାଇପାରିବ। ଯେଉଁମାନେ ଜାଣତରେ ବିଏମ୍ସିକୁ ରାଜସ୍ବ ଫାଙ୍କୁଛନ୍ତି, ସେମାନଙ୍କୁ ଚିହ୍ନଟ କରାଯିବା ସହିତ କଡ଼ା କାର୍ଯ୍ୟାନୁଷ୍ଠାନ ନିଆଯିବ।
