ଫନମ ପେନ,୩।୬: ପୋଲାଣ୍ଡର ୧୧ ବର୍ଷୀୟା ବାଳିକା ଏଲିଜା ଓ୍ବାନାତକୋ ଭାରତ ଆସିବା ପାଇଁ ପ୍ରଧାନମନ୍ତ୍ରୀ ମୋଦିଙ୍କୁ ଅନୁରୋଧ କରିଛନ୍ତି। ଏକ ହାତ ଲେଖା ଚିଠି ମାଧ୍ୟମରେ ସେ ମୋଦିଙ୍କୁ ନିଜର ଗୁହାରି କରିଛନ୍ତି। ଏଲିଜା ହାତରେ ଲେଖିଥିବା ଚିଠିଟିକୁ ତାଙ୍କ ମା’ ମାରଟା କୋଟରାଲସ୍କା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବୈଦେଶିକ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କରଙ୍କୁ ଟୁଇଟ୍ କରିଛନ୍ତି। ୨୦୧୯ ମାର୍ଚ୍ଚ ୨୪ ପୂର୍ବରୁ ଏମାନେ ଭାରତ ଆସିଥିବା ବେଳେ ଭିସା ଅବଧି ପୁରି ଯାଇଥିଲେ ମଧ୍ୟ ସେମାନେ ପୋଲାଣ୍ଡ ନ ଯାଇ ଭାରତରେ ରହି ଯାଇଥିଲେ। ତେଣୁ ତାଙ୍କୁ ବ୍ଲାକ୍ ଲିଷ୍ଟ କରାଯାଇ ଆଉ ଭାରତରେ ପ୍ରବେଶ କରିବାକୁ ଦିଆଯାଇ ନ ଥିଲା। ଏଲିଜାଙ୍କ ମା’ ଜଣେ କଳାକାର ଓ ଫଟୋଗ୍ରାଫର ହୋଇଥିବା ବେଳେ ସେ ଓ ତାଙ୍କ ଝିଅ ଭାରତରେ ରହିବାକୁ ପସନ୍ଦ କରିଛନ୍ତି। ବିଶେଷ କରି ଗୋଆରେ ଥିବା ବେଳେ ଶିବ ଆରାଧନା, ଗୋମାତା ସେବା ଏଲିଜାଙ୍କର ବହୁତ ମନେ ପଡୁଥିବାରୁ ସେ ପୁଣିଥରେ ଭାରତ ଆସିବାକୁ ବ୍ୟଗ୍ର ଥିବା ଉକ୍ତ ପତ୍ରରେ ଦର୍ଶାଇଛନ୍ତି। ଏବେ ଉଭୟ ମା’ ଝିଅ କାମ୍ବୋଡିଆରେ ଥିବା ବେଳେ ଭାରତକୁ ସେ ନିଜର ଜନ୍ମଭୂମିଠାରୁ ଅଧିକ ବୋଲି କହୁଛନ୍ତି।
