ଭିକ୍ଟୋରିଆ,୨୩।୧୨- ବିଗ୍ ବାଶ ଲିଗ୍ (ବିବିଏଲ)ରେ ମେଲବୋର୍ନ ଷ୍ଟାର୍ସ ପକ୍ଷରୁ ପ୍ରତିନିଧିତ୍ୱ କରୁଥିବା ପାକିସ୍ତାନ ବାମହାତୀ ପେସର ହାରିସ ରଫ କ୍ରିକେଟ ପ୍ରଶଂସକଙ୍କ ମନ ଜିଣି ନେଇଛନ୍ତି। ମ୍ୟାଚ୍ରେ କାର୍ଯ୍ୟରତ ଭାରତୀୟ ସୁରକ୍ଷା କର୍ମଚାରୀଙ୍କୁ ମ୍ୟାଚ୍ ବଲ ପ୍ରଦାନ କରିଛନ୍ତି। ଦକ୍ଷିଣ ଆଫ୍ରିକୀୟ ପେସର ଡେଲ ଷ୍ଟେଇନ ଆହତ ହେବାରୁ ରଫଙ୍କୁ ଦଳରେ ସାମିଲ କରାଯାଇଛି। ଏଠାରେ ହାବର୍ଟ ହରିକେନ୍ସ ବିପକ୍ଷରେ ଅନୁଷ୍ଠିତ ମ୍ୟାଚ୍ରେ ସେ ୪ ଓଭର ବୋଲିଂ କରି ୨୭ ରନ୍ ଦେଇ ୫ ଉଇକେଟ ହାତେଇଥିଲେ। ତାଙ୍କ ଯୋଗୁ ହାବର୍ଟ ୧୧୧ ରନ୍ରେ ଅଲଆଉଟ୍ ହୋଇ ୫୨ରନ୍ରେ ପରାଜୟ ବରଣ କରିଥିଲା। ମ୍ୟାଚ୍ ଶେଷ ହେବା ପରେ ରଫ ଅଟୋଗ୍ରାଫ ସହ ମ୍ୟାଚ୍ ବଲକୁ ଭାରତୀୟ ସୁରକ୍ଷାକର୍ମୀଙ୍କୁ ପ୍ରଦାନ କରିଥିଲେ। ମୁଁ ଆଜି ଭାରତୀୟ ସୁରକ୍ଷାକର୍ମୀଙ୍କୁ ମ୍ୟାଚ୍ ବଲ ଦେଇଛି। ଗ୍ରାଉଣ୍ଡକୁ ଓହ୍ଲାଉଥିବାବେଳେ ତାଙ୍କୁ ମୁଁ ପାକିସ୍ତାନର ବୋଲି କହିଥିଲି। ଏହା ଶୁଣି ତାଙ୍କ ଆଖିରେ ଲୁହ ଆସିଯାଇଥିଲା। ସେ ମୋତେ ହଗ କରିନେଇଥିଲେ ବୋଲି ମ୍ୟାନ ଅଫ୍ ଦି ମ୍ୟାଚ୍ ବିବେଚିତ ହୋଇଥିବା ବୋଲର କହିଛନ୍ତି। ଉଲ୍ଲେଖଥାଉ କି, ରଫ ଏପର୍ଯ୍ୟନ୍ତ ଅନ୍ତର୍ଜାତୀୟ ସ୍ତରରେ ପଦାର୍ପଣ କରି ନାହାନ୍ତି। ଗତ ପାକିସ୍ତାନ ସୁପର ଲିଗ୍(ପିଏସ୍ଏଲ)ରେ ଭଲ ପ୍ରଦର୍ଶନ କରି ସଭିଙ୍କ ଦୃଷ୍ଟି ଆକର୍ଷଣ କରିଥିଲେ।
