ନୂଆଦିଲ୍ଲୀ, ୧୨।୬(ପି.ଟି.)-ସୀମିତ ଓଭର କ୍ରିକେଟ ସିରିଜ ଖେଳିବା ପାଇଁ ଭାରତୀୟ କ୍ରିକେଟ ଦଳ ଶ୍ରୀଲଙ୍କା ଗସ୍ତରେ ଯିବାର ଥିଲା। ମାତ୍ର କୋଭିଡ-୧୯ ସଂକ୍ରମଣକୁ ଦୃଷ୍ଟିରେ ରଖି ଏହି ସିରିଜ ସମ୍ଭବ ନୁହେଁ ବୋଲି ଉଭୟ ବୋର୍ଡ ଅନୁଭବ କରିଛନ୍ତି। ତେଣୁ ବର୍ତ୍ତମାନ ପାଇଁ ଏହି ସିରିଜକୁ ବାତିଲ କରାଯାଇଛି। ଭାରତୀୟ ଦଳ ୩ଟି ଲେଖାଏ ଏକଦିବସୀୟ ଓ ଟି୨୦ ମ୍ୟାଚ ଖେଳିବା ପାଇଁ ଚଳିତ ମାସ ଶେଷରେ ଶ୍ରୀଲଙ୍କା ଗସ୍ତରେ ଯିବାର ଥିଲା। ସିରିଜର କାର୍ଯ୍ୟସୂଚୀ ପ୍ରକାଶ ପାଇ ନ ଥିଲେ ହେଁ ଜୁଲାଇ ପର୍ଯ୍ୟନ୍ତ ଏହା ଚାଲିବାର ଥିଲା। ”ଜୁନ-ଜୁଲାଇରେ ସିରିଜ ସମ୍ଭବ ନୁହେଁ ବୋଲି ଆମେ ଶ୍ରୀଲଙ୍କା ବୋର୍ଡକୁ ବୁଝାଇଛୁ। ତେବେ ଭବିଷ୍ୟତରେ ଆମେ ଶ୍ରୀଲଙ୍କାରେ ସିରିଜ ଖେଳିବାକୁ ପ୍ରତିଶ୍ରୁତିବଦ୍ଧ“ ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) କୋଷାଧ୍ୟକ୍ଷ ଅରୁଣ ଧୁମଲ ପ୍ରକାଶ କରିଛନ୍ତି। ଦେଶରେ ଦ୍ରୁତଗତିରେ କୋଭିଡ କେସ୍ ବଢ଼ି ଚାଲିଥିବାରୁ ଭାରତୀୟ ଖେଳାଳିମାନେ ଏପର୍ଯ୍ୟନ୍ତ ଅଭ୍ୟାସକୁ ଓହ୍ଲାଇପାରି ନାହାନ୍ତି। ତେଣୁ ଏହି ସିରିଜ ବାତିଲ ହେବା ସମ୍ଭାବନା ରହିଥିଲା। ଦେଶରେ ପାଖାପାଖି ୩ ଲକ୍ଷ କରୋନା ପଜିଟିଭ୍ ରହିଥିବାବେଳେ ୮,୦୦୦ରୁ ଊର୍ଦ୍ଧ୍ୱ ମୃତ୍ୟୁବରଣ କରିଛନ୍ତି। ମ୍ୟାଚ ଫିଟ୍ନେସ ପାଇଁ ଖେଳାଳିଙ୍କୁ ୪ରୁ ୬ ସପ୍ତାହ ପର୍ଯ୍ୟନ୍ତ ଟ୍ରେନିଂ କରିବା ଅତ୍ୟନ୍ତ ଜରୁରୀ। ତେବେ ଅଗଷ୍ଟରେ ସମ୍ଭବ ହେଲେ ଏହି ସିରିଜ ଆୟୋଜନ ପାଇଁ ଉଭୟ ବୋର୍ଡ ସମ୍ମତି ଜଣାଇଛନ୍ତି।
ଭାରତୀୟ ଦଳ ଏବେ ଅଭ୍ୟାସରୁ ଦୂରେଇ ରହିଛି। ଏହା ବ୍ୟତୀତ ଅନ୍ତର୍ଜାତୀୟ ଭ୍ରମଣ ଉପରୁ କେବେ କଟକଣା ଉଠିବ ତାହାକୁ ନେଇ ମଧ୍ୟ ଆମେ ନିଶ୍ଚିତ ନୋହୁ। ତେଣୁ ସିରିଜ ଜୁନ-ଜୁଲାଇରେ କେବେହେଲେ ସମ୍ଭବ ନୁହେଁ“ ବୋଲି ଧୁମଲ କହିଛନ୍ତି। ଶ୍ରୀଲଙ୍କା ବୋର୍ଡ଼ ପକ୍ଷରୁ ମଧ୍ୟ ଏକ ମିଡିଆ ରିଲିଜ ମାଧ୍ୟମରେ ଏ ସମ୍ପର୍କରେ ସୂଚନା ଦିଆ ଯାଇଛି।
