ନୂଆଦିଲ୍ଲୀ,୭।୬: ପ୍ରତିବର୍ଷ ଭାରତରେ ପ୍ରାୟ ୧୫.୭୩ ଲକ୍ଷ ଲୋକ ଫୁଡ ଫଏଜନିଂରେ ମୃତ୍ୟୁବରଣ କରିଥାନ୍ତି। ଖରାପ ଖାଦ୍ୟ ଖାଇ ମୃତ୍ୟୁବରଣ କରୁଥିବା ମାମଲାରେ ବିଶ୍ୱରେ ଭାରତ ଦ୍ୱିତୀୟ ନମ୍ବର ଓ ଚୀନ ପ୍ରଥମରେ ରହିଛି ବୋଲି ଏକ ସର୍ଭେ ରିପୋର୍ଟରୁ ଜଣାପଡ଼ିଛି। କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରାଳୟର ଇଣ୍ଟିଗ୍ରେଟେଡ ଡିଜିଜ୍ ସର୍ଭିଲାନ୍ସ ପ୍ରୋଗ୍ରାମ (ଆଇଡିଏସ୍ପି) ଅନୁସାରେ ୨୦୦୮ରୁ ୨୦୧୭ ଭିତରେ ଫୁଡ ଫଏଜନିଂ ଏକ ପ୍ରକୋପ ଭଳି ବ୍ୟାପିଥିଲା। ଏହି ପ୍ରକୋପ ଏବେ ବି ବ୍ୟାପିବାରେ ଲାଗିଛି। ୨୦୦୮ରୁ ୨୦୧୭ ଭିତରେ ଫୁଡ ପଏଜିନଂର ୨୮୬୭ ମାମଲା ଆସିଛି ଯେଉଁଥିରେ ଡାଇରିଆର ୪୩୬୧ ମାମଲା ଅଲଗା ରହିଛି। ସେହିପରି ଚଳିତ ବର୍ଷ ମେ ୬ରୁ ୧୨ ଭିତରେ ଫୁଡ ପଏଜନିଂର ୧୪ଟି ମାମଲା ରୁଜୁ କରାଯାଇଛି। ଫୁଡ ଫଏଜନିଂର ମାମଲା ଲଗାତାର ବୃଦ୍ଧି ପାଉଥିବାରୁ ଏହାକୁ ଧ୍ୟାନରେ ରଖି ୨୦୧୭ରେ ଏକ ରାଷ୍ଟ୍ରୀୟ ନୀତି ତିଆରି କରାଯାଇଥିଲା। ଯାହାଫଳରେ ସାରା ଦେଶରେ ଖାଦ୍ୟର ଗୁଣବତ୍ତା ଉପରେ ନଜର ରଖାଯାଇପାରିବ। ସେହିପରି ଗତ ୩ବର୍ଷରେ ଅପମିଶ୍ରଣ ଖାଦ୍ୟର ୨୦ ପ୍ରତିଶତରୁ ଊର୍ଦ୍ଧ୍ୱ ସେମ୍ପୁଲ ମିଳିଛି ବୋଲି ଚଳିତ ବର୍ଷ ଜାନୁଆରୀ ୪ରେ ଲୋକ ସଭାରେ ପୂର୍ବତନ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ରାଜ୍ୟମନ୍ତ୍ରୀ ଅଶ୍ୱିନୀ ଚୌବେଙ୍କ ସୂଚନା ଦେଇଥିଲେ।
