ମୁମ୍ବାଇ,୩-୮: ବିଶ୍ୱରେ ୫ମ ସ୍ଥାନ ହାସଲ କରିଥିତ୍ବା ବ୍ୟାଙ୍କ ଅଫ୍ ଚାଇନା ଭାରତରେ ଏକ ଶାଖା ଖୋଲିବାକୁ ଯାଉଛି। ଏଥିପାଇଁ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ) ଏହାକୁ ଅନୁମତି ପ୍ରଦାନ କରିଛି। ଗତବର୍ଷ ଏହାକୁ ଲାଇସେନ୍ସ ପ୍ରଦାନ କରାଯାଇଥିଲା। କେନ୍ଦ୍ରୀୟ ବ୍ୟାଙ୍କ ଆର୍ବିଆଇ ଆଇନ, ୧୯୩୪ର ଦ୍ୱିତୀୟ ସିଡ୍ୟୁଲରେ ଏହି ବ୍ୟାଙ୍କକୁ ଅନ୍ତର୍ଭୁକ୍ତ କରିଛି। ଦେଶର ଅନ୍ୟ ପ୍ରମୁଖ ବ୍ୟାଙ୍କ ପୂର୍ବରୁ ଏହି ସିଡ୍ୟୁଲରେ ସାମିଲ ହୋଇଛନ୍ତି। ଏସ୍ସିଓ ସମ୍ମିଳନୀରେ ଯୋଗ ଦେବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚାଇନା ରାଷ୍ଟ୍ରପତି ଜି.ଜିନପିଙ୍ଗଙ୍କ ସହ ଆଲୋଚନା କାଳରେ ଏହାକୁ ନେଇ ପ୍ରତିଶ୍ରୁତି ଦେଇଥିଲେ। ଚାଇନାର ଦ୍ୱିତୀୟ ବ୍ୟାଙ୍କ ଭାବେ ବ୍ୟାଙ୍କ ଅଫ୍ ଚାଇନା ଭାରତରେ ନିଜର ଶାଖା ଖୋଲିବାକୁ ଯାଉଛି। ମୁମ୍ବାଇରେ ଏହାର ପ୍ରଥମ ଶାଖା ଖୋଲାଯିବ। ଏହା ଚାଇନାର ଚତୁର୍ଥ ସର୍ବବୃହତ ବ୍ୟାଙ୍କ, ଯାହା କି, ହଂକଂ ଏବଂ ସାଂଘାଇ ଷ୍ଟକ୍ ଏକ୍ସଚେଞ୍ଜରେ ତାଲିକାଭୁକ୍ତ ହୋଇଛି। ଏହାର ମାର୍କେଟ କ୍ୟାପିଟାଲାଇଜେଶନ ୧୫୮.୬ ବିଲିୟନ ଡଲାର ବା ୧୦.୮୫ ଲକ୍ଷ କୋଟି ଟଙ୍କା ରହିଛି। ବ୍ୟାଙ୍କ ଅଫ୍ ଚାଇନା ୨୦୧୬ ଜୁଲାଇରେ ସିକ୍ୟୁରିଟି କ୍ଲିୟରାନ୍ସ ଲାଗି ଆବେଦନ କରିଥିଲା। ଇସ୍ରାଏଲ୍ ବିରୋଧରେ ଲଢ଼େଇ କରୁଥିବା ଆତଙ୍କବାଦୀ ସଂଗଠନ ହମାସକୁ ଏହି ବ୍ୟାଙ୍କ ଆର୍ଥିକ ସହାୟତା ପ୍ରଦାନ କରିଥିଲା ବୋଲି ପୂର୍ବରୁ ଅଭିଯୋଗ ହୋଇଥିଲା। ତେବେ ବ୍ୟାଙ୍କ ଏହାକୁ ସ୍ପଷ୍ଟ ଭାବେ ଖଣ୍ଡନ କରିଥିଲା।
