ନୂଆଦିଲ୍ଲୀ/ଓ୍ବାଶିଂଟନ,୧୩।୬: ଗୋଟିଏ ବର୍ଷ ମଧ୍ୟରେ ଭାରତରେ ଶାନ୍ତି କମିଛି। ବାର୍ଷିକ ଗ୍ଲୋବାଲ୍ ପିସ୍ ଇଣ୍ଡେକ୍ସ୍ରେ ଏନେଇ ରିପୋର୍ଟ ପ୍ରକାଶ ପାଇଛି। ଚଳିତବର୍ଷ ୧୬୩ ଦେଶ ମଧ୍ୟରେ ଭାରତ ୧୪୧ ସ୍ଥାନରେ ରହିଛି। ୨୦୧୮ରେ ୧୩୬ ସ୍ଥାନ ହାସଲ କରିଥିଲା। ଗୋଟିଏ ବର୍ଷ ମଧ୍ୟରେ ଭାରତରେ ଶାନ୍ତି ୫ ପଏଣ୍ଟ ହ୍ରାସ ପାଇଥିବା ଇଣ୍ଟରନ୍ୟାସନାଲ୍ ଥିଙ୍କ୍ ଟ୍ୟାଙ୍କ ରିପୋର୍ଟରେ ପ୍ରକାଶ ପାଇଛି। ଚଳିତ ବର୍ଷ ମଧ୍ୟ ଆଇସ୍ଲାଣ୍ଡ୍ ଶାନ୍ତି ତାଲିକାର ପ୍ରଥମ ସ୍ଥାନରେ ରହିଛି। ଗତ ୨୦୦୮ଠାରୁ ଆଇସ୍ଲାଣ୍ଡ୍ ତାଲିକାର ଶୀର୍ଷରେ ରହିଛି। ନ୍ୟୁଜିଲାଣ୍ଡ୍, ଅଷ୍ଟ୍ରିଆ, ପର୍ତ୍ତୁଗାଲ, ଡେନମାର୍କ ଓ ଭୁଟାନ ଏହି ତାଳିକାରେ ଚଳିତ ବର୍ଷ ପୂର୍ବାପେକ୍ଷା ଭଲ ସ୍ଥାନରେ ରହିଥିବା କୁହାଯାଉଛି। ଏସବୁ ଦେଶ ଶ୍ରେଷ୍ଠ ୨୦ ସ୍ଥାନରେ ରହିଛନ୍ତି। ନେପାଳ ଗତ ୧୨ ବର୍ଷ ମଧ୍ୟରେ ୪୩ ସ୍ଥାନ ଉପରକୁ ଉଠିଥିବା ତାଲିକାରେ ଦର୍ଶାଯାଇଛି। ଚଳିତବର୍ଷ ଏହି ତାଲିକାରେ ଭାରତ, ଫିଲିପାଇନ୍ସ, ଜାପାନ, ବାଂଲାଦେଶ, ମ୍ୟାନ୍ମାର୍, ଚାଇନା, ଇଣ୍ଡୋନେସିଆ, ଭିଏତନାମ୍ ଓ ପାକିସ୍ତାନ ଆଦି ୯ଟି ଦେଶରେ ଶାନ୍ତି ବ୍ୟାହତ ହୋଇଥିବା ରିପୋର୍ଟରେ ପ୍ରକାଶ ପାଇଛି।
