ଅନୁଗୋଳ ଅଫିସ,୩୧।୭: ଅନୁଗୋଳ ଜିଲା ତାଳଚେରସ୍ଥିତ ଭରତପୁର କୋଇଲା ଖଣି ଦୁର୍ଘଟଣାକୁ ନେଇ ବୁଧବାର ଜିଲାପାଳଙ୍କ କାର୍ଯ୍ୟାଳୟରେ ଏକ ରୁଦ୍ଧଦ୍ବାର ବୈଠକ ଅନୁଷ୍ଠିତ ହୋଇଛି। ଏହି ବୈଠକରେ ଜିଲାପାଳଙ୍କ ସହ ଏମ୍ସିଏଲ୍ର ଉଚ୍ଚପଦସ୍ଥ ଅଧିକାରୀ, ପୋଲିସ, ତାଳଚେର ବିଧାୟକ, ପାଲଲହଡ଼ା ବିଧାୟକ, ମୃତକଙ୍କ ପରିବାର ଲୋକେ ଓ ତାଳଚେରର ବିଭିନ୍ନ ସଙ୍ଗଠନର କର୍ମକର୍ତ୍ତା ଉପସ୍ଥିତ ଥିଲେ। ଏଥିରେ ୩ଟି ପ୍ରସଙ୍ଗରେ ଆଲୋଚନା ହୋଇଥିଲା। ମୃତକଙ୍କ ପରିବାରକୁ କ୍ଷତିପୂରଣ ସହ ପରିବାରର ଜଣେ ସଦସ୍ୟଙ୍କୁ ସ୍ଥାୟୀ ଚାକିରି ଓ କ୍ୱାର୍ଟର ପ୍ରଦାନ, କୋଇଲା ଖଣିର ସୁରକ୍ଷା ଯାଞ୍ଚ ଓ ଦୁର୍ଘଟଣାର ଉଚ୍ଚ ସ୍ତରୀୟ ତଦନ୍ତ ନେଇ ଦାବି କରାଯାଇଛି। ତେବେ ମୃତକଙ୍କ ପରିବାରକୁ ସ୍ଥାୟୀ ନିଯୁକ୍ତି ସହ ଆର୍ଥିକ ସହାୟତା ପ୍ରଦାନ ପାଇଁ ଏମ୍ସିଏଲ୍ କର୍ତ୍ତୃପକ୍ଷଙ୍କୁ କୁହାଯାଇଥିବା ଜିଲାପାଳ ମନୋଜ କୁମାର ମହାନ୍ତି କହିଛନ୍ତି। ଏଥି ସହ ଏମ୍ସିଏଲ୍ କର୍ତ୍ତୃପକ୍ଷ ସେଫ୍ଟି ପ୍ରମାଣପତ୍ର ଦେବାପରେ ମାଇନିଂ ଅପରେଶନ ଜାରି ହେବ ବୋଲି ସେ କହିଛନ୍ତି। ସେଫ୍ଟିରେ କୌଣସି ସାଲିସ କରାଯିବ ନାହିଁ ବୋଲି ଜିଲାପାଳ ମହାନ୍ତି ପ୍ରକାଶ କରିଛନ୍ତି। ଏଥିସହ ଘଟଣାର ତଦନ୍ତ ଟେକ୍ନିକାଲ କମିଟି ଜାରି ରଖିଛି। ସିଏମ୍ଆର୍ଆଇ ଟେକ୍ନିକାଲ ଟିମ ଘଟଣାର ତଦନ୍ତ କରିବ ବୋଲି ଏମ୍ସିଏଲ୍ କର୍ତ୍ତୃପକ୍ଷ ପ୍ରତିଶ୍ରୁତି ଦେଇଥିବା ଜିଲାପାଳ ସୂଚନା ଦେଇଛନ୍ତି।
