ନୂଆଦିଲ୍ଲୀ,୧୭-୭: କେନ୍ଦ୍ର ସରକାର ଏମ୍ଜିଏନ୍ଆର୍ଇଜିଏ ଯୋଜନାରେ ସାମିଲ ୫ କୋଟି ଶ୍ରମିକଙ୍କୁ ଦକ୍ଷିତା ପ୍ରଶିକ୍ଷଣ ଦେବେ। ସେମାନଙ୍କୁ ଯେପରି ଉନ୍ନତ ରୋଜଗାର ମିଳିବ ସେଥିପାଇଁ ସେମାନଙ୍କର ଦକ୍ଷତା ବୃଦ୍ଧି କରାଯିବ। ମିଡିଆ ସହ ଆଲୋଚନା କାଳରେ ଗ୍ରାମୀଣ ବିକାଶ ମନ୍ତ୍ରଣାଳୟ ସଚିବ ଅମରଜୀତ ସିହ୍ନା କହିଛନ୍ତି ଯେ, ଏମ୍ଜିଏନ୍ଆରଇଜିଏ ଯୋଜନାରେ ସାମିଲ ଶ୍ରମିକଙ୍କ ସ୍କିଲ୍ ବା ଦକ୍ଷତା ବୃଦ୍ଧିର ଆବଶ୍ୟକତା ରହିଛି। ସେ କେତେ ଦିନ ଧରି ଅଣକୁଶଳୀ ଶ୍ରମିକ ଭାବେ ଜୀବନଯାପନ କରିବେ ବୋଲି ସେ ପ୍ରଶ୍ନ କରିଛନ୍ତି। ସରକାର ଗତ ୨ ବର୍ଷ ହେବ ଏହି ଯୋଜନାକୁ ସୀମିତ ସ୍ତରରେ ଆରମ୍ଭ କରିଥିଲେ। ଏବେ ଏହାକୁ ଯୋଜନାବଦ୍ଧ ଭାବେ ବ୍ୟାପକ ସ୍ତରରେ ଆରମ୍ଭ କରାଯିବ ବୋଲି ସେ କହିଛନ୍ତି। ଗ୍ରାମୀଣ ବିକାଶ ମନ୍ତ୍ରଣାଳୟ ପକ୍ଷରୁ ଏଭଳି ପ୍ରଶିକ୍ଷଣ ଲାଗି ଟ୍ରେନିଂ କ୍ୟାମ୍ପର ଆୟୋଜନ କରାଯିବ। ଏଥିରେ ସାମିଲ ଶ୍ରମିକଙ୍କୁ ଭତ୍ତା ମଧ୍ୟ ଦିଆଯିବ। ଫଳରେ ପ୍ରଶିକ୍ଷଣ ସମୟରେ ସେମାନଙ୍କୁ ଦୈନନ୍ଦିନ ଖର୍ଚ୍ଚ ପାଇଁ ଅର୍ଥ ମିଳିଯିବ। ଜଣେ ଅଧିକାରୀ କହିଛନ୍ତି ଯେ, ମଜୁରି କ୍ଷତି ହେବା ଭୟରେ ବହୁ ଶ୍ରମିକ ଏହି ଟ୍ରେନିଂରେ ସାମିଲ ହେବାକୁ ଚାହୁଁନାହାନ୍ତି। ଏହି ବାଧାକୁ ଦୂର କରିବା ଲାଗି ଏବେ ପ୍ରୟାସ କରାଯିବ। ଏଥିଲାଗି ଏକ ନିର୍ଦ୍ଧାରିତ ରାଶି ଶ୍ରମିକଙ୍କୁ ଭତ୍ତା ବାବଦରେ ଦିଆଯିବ। ଏଥିଲାଗି ସରକାର ୬୦୦ରୁ ୭୦୦ କୋଟି ଟଙ୍କା ଖର୍ଚ୍ଚ କରିବେ। ଏଥିଲାଗି ଗ୍ରାମୀଣ ବିକାଶ ମନ୍ତ୍ରଣାଳୟ ପକ୍ଷରୁ ସ୍କିଲ୍ ଡେଭଲପ୍ମେଣ୍ଟ ମନ୍ତ୍ରଣାଳୟ ସହ ଆଲୋଚନା ଚାଲିଛି ବୋଲି ସେ କହିଛନ୍ତି। ଚଳିତବର୍ଷ ଅଗଷ୍ଟରୁ ଏହି ସ୍କିମ୍ ଆରମ୍ଭ କରାଯିବାର ଯୋଜନା ରହିଛି। ଜଳ ସଂରକ୍ଷଣ ଯୋଜନାକୁ ଏମ୍ଜିଏନ୍ଆର୍ଜିଏ ସହ ଯୋଡାଯିବ ବୋଲି ସରକାର ନିଷ୍ପତ୍ତି ନେଇଥିବା ସେ କହିଛନ୍ତି।
