ଆଡିଲେଡ୍,୩୦।୧୧- ଅଷ୍ଟ୍ରେଲିଆନ ଓପନର ଡେଭିଡ ଓ୍ବାର୍ନର ପାକିସ୍ତାନ ବିପକ୍ଷ ଦିବାରାତ୍ର ତଥା ଦ୍ୱିତୀୟ ଟେଷ୍ଟରେ ୩୩୫ ରନ୍ର ତ୍ରିଶତକ ହାସଲ କରିଛନ୍ତି। ଏଥିସହ ଆଡିଲେଡ ଓଭାଲ ଗ୍ରାଉଣ୍ଡରେ ସର୍ବାଧିକ ବ୍ୟକ୍ତିଗତ ରନ୍ କରିବାରେ ସାର ଡନ ବ୍ରାଡମ୍ୟାନ ରେକର୍ଡ ଭାଙ୍ଗିଛନ୍ତି। ବ୍ରାଡମ୍ୟାନ ୧୯୩୨/୩୩ରେ ଦକ୍ଷିଣ ଆଫ୍ରିକା ବିପକ୍ଷରେ ୨୯୯ ରନ୍ର ଇନିଂସ ଖେଳିଥିଲେ। ଏହା ଓଭାଲ ଗ୍ରାଉଣ୍ଡ ସର୍ବାଧିକ ବ୍ୟକ୍ତିଗତ ସ୍କୋର ଥିଲା। ତେବେ ବ୍ରାଡମ୍ୟାନଙ୍କ ସର୍ବାଧିକ ବ୍ୟକ୍ତିଗତ ସ୍କୋର ଥିଲା ୩୩୪। ଏହାକୁ ମଧ୍ୟ ଓ୍ବାର୍ନର ପଛରେ ପକାଇଛନ୍ତି। ବାମହାତୀ ବ୍ୟାଟ୍ସମ୍ୟାନ ଏକ ସିଙ୍ଗଲ ନେଇ ୩୩୫ ରନ୍ କରିବା ପରେ ଅଧିନାୟକ ଟିମ ପେନ ପ୍ରଥମ ଇନିଂସ ଘୋଷଣା କରିଥିଲେ। ଅଷ୍ଟ୍ରେଲିଆ ବ୍ୟାଟ୍ସମ୍ୟାନଙ୍କ ମଧ୍ୟରେ ସର୍ବାଧିକ ବ୍ୟକ୍ତିଗତ ସ୍କୋର ଏବେ ମଧ୍ୟ ମାଥ୍ୟୁ ହେଡେନଙ୍କ ନାମରେ ରହିଛି। ସେ ୨୦୦୩ରେ ଜିମ୍ବାଓ୍ବେ ବିପକ୍ଷରେ ୩୮୦ ରନ୍ କରିଥିଲେ। ଏହି ତାଲିକାରେ ଓ୍ବାର୍ନର ଏବେ ଦ୍ୱିତୀୟ ସ୍ଥାନରେ ରହିଛନ୍ତି। ୪୧୮ ବଲର ସମ୍ମୁଖୀନ ହୋଇଥିବା ଓ୍ବାର୍ନରଙ୍କ ଇନିଂସରେ ୩୯ ଚୌକା ଓ ଏକ ଛକା ସାମିଲ ଥିଲା। ଏହି ଇନିଂସ ସହ ଦିବାରାତ୍ର ଟେଷ୍ଟ ଇତିହାସରେ ସର୍ବାଧିକ ରନ୍ କରିବାର ରେକର୍ଡ ମଧ୍ୟ ନିଜ ନାମରେ କରିଛନ୍ତି। ପୂର୍ବରୁ ଏହି ରେକର୍ଡ ପାକିସ୍ତାନର ଆଝାର ଅଲି(୩୦୨)ଙ୍କ ନାମରେ ଥିଲା। ଅପରାଜିତ ରହି ପ୍ୟାଭିଲିୟନକୁ ଫେରିବା ବେଳେ ୩୩ ବର୍ଷୀୟ ବ୍ୟାଟ୍ସମ୍ୟାନଙ୍କୁ ସାଥୀ ଖେଳାଳିମାନେ ତାଙ୍କୁ ଗାର୍ଡ ଅଫ୍ ଅନର ଦେଇଥିଲେ।
