ଦିଗପହଣ୍ଡି,୨୦ା୧୨(ଡି.ଏନ.ଏ.)-ଦିଗପହଣ୍ଡି ସହର ସମେତ ଗ୍ରାମାଞ୍ଚଳ ମାନଙ୍କରେ ବେନିୟମ ଭାବେ ବହୁ ସଂଖ୍ୟାରେ ପାଥୋଲୋଜି କ୍ଲିନିକ ଖୋଲାଯାଇଛି। ଅଭିଯୋଗ ପାଇ ଜିଲାପାଳ ବିଜୟ ଅମୃତା କୁଲାଙ୍ଗେଙ୍କ ନିର୍ଦ୍ଦେଶକ୍ରମେ ଗଞ୍ଜାମ ଜିଲା ଡ୍ରଗ୍ସ ଇନ୍ସପେକ୍ଟର ଲଳିତ କୁମାର ସାହୁ ଓ ସ୍ଥାନୀୟ ତହସିଲଦାର ତଥା କାର୍ଯ୍ୟନିର୍ବାହୀ ମାଜିଷ୍ଟ୍ରେଟ ଅଦୈତ କୁମାର ସ୍ବାଇଁ ସଦଳବଳ ପଦ୍ମନାଭପୁର ପଞ୍ଚାୟତ ଚୈତନ୍ୟପୁର ଗାଁରେ ଥିବା ଏକ ଘରୋଇ କ୍ଲିନିକ ଉପରେ ଗୁରୁବାର ଚଢ଼ାଉ କରିଥିଲେ। ଚଢାଉ ପୂର୍ବରୁ ଖବର ପାଇ କ୍ଲିନିକ ମାଲିକ ଚମ୍ପଟ ମାରିଥିଲେ। ଫଳରେ କୌଣସି ଦଳିଲ ପତ୍ର ଜବତ ହୋଇପାରିନାହିଁ। ପରେ ସେମାନେ କୁଶପଡା ଗଁାରେ ଥିବା ଏକ ଔଷଧ ଦୋକାନରେ ଚଢାଉ କରି ଅନୁମତିପତ୍ର ଯାଞ୍ଚ କରିଥିଲେ। ଫେରିବା ରାସ୍ତାରେ ଦିଗପହଣ୍ଡିସ୍ଥିତ କାନାରା ବ୍ୟାଙ୍କ ସମ୍ମୁଖରେ ଥିବା ବାସୁଦେବ କ୍ଲିନିକ ଉପରେ ଚଢ଼ାଉ କରି ଲାଇସେନ୍ସ ସମ୍ପର୍କିତ କାଗଜପତ୍ର ଜବତ କରିଥିବା ତହସିଲଦାର ଜଣାଇଛନ୍ତି। କ୍ଲିନିକ ଖୋଲିବା ପାଇଁ ଜିଲା ସ୍ବାସ୍ଥ୍ୟ ଅଧିକାରୀଙ୍କ ଅନୁମତି ପତ୍ର ନଥିବାରୁ ସପ୍ତାହକ ମଧ୍ୟରେ ତାହା ଦାଖଲ କରିବାକୁ ମାଲିକଙ୍କୁ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି। ଦିଗପହଣ୍ଡି ଅଞ୍ଚଳରେ ବହୁ ସଂଖ୍ୟକ ପାଥଲୋଜି କ୍ଲିନିକ ନିୟମ ଉଲ୍ଲଘଂନ କରି ଖୋଲାଯାଇଛି। ରୋଗୀସେବା ନଁାରେ କ୍ୱାକ୍ମାନେ ଲୋକଙ୍କୁ ଶୋଷଣ କରୁଛନ୍ତି। ବିଭିନ୍ନ ସ୍ଥାନରେ ଭୃଣର ଲିଙ୍ଗ ନିରୂପଣ ସହ ବେଆଇନ ଭାବେ ଗର୍ଭପାତ କରାଯାଉଥିବା ସଙ୍ଗୀନ ଅଭିଯୋଗ ହୋଇଛି। ଜିଲା ସ୍ବାସ୍ଥ୍ୟ ବିଭାଗ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି ହେଉଛି।
