ଜେଲ୍ର ନାଁ ଶୁଣିଲେ ଆପଣା ଛାଏଁ ମନକୁ ଆସେ ସେଠାକାର ରହିବା ଓ ଖାଇବା କେମିତି ହୋଇଥିବ। ହେଲେ କ୍ୟୁବାରେ ଏମିତି ଏକ ଜେଲ୍ ଅଛି ଯାହାର ନାଁ ଶୁଣିଲେ ଆଶ୍ଚର୍ଯ୍ୟ ଲାଗେ ନାହିଁ ବରଂ ଏଠାରେ କଏଦୀଙ୍କ ପଛରେ ଖର୍ଚ୍ଚ ହେଉଥିବା ଅର୍ଥର ପରିମାଣ ଶୁଣିଲେ ଆଶ୍ଚର୍ଯ୍ୟ ଲାଗିଥାଏ। କାରଣ ଏଠାରେ ଜଣେ କଏଦୀଙ୍କ ପଛରେ କୋଟି କୋଟି ଟଙ୍କା ଖର୍ଚ୍ଚ ହୋଇଥାଏ ବୋଲି କୁହାଯାଏ। ସେଥିପାଇଁ ଏହାକୁ ବିଶ୍ୱର ସବୁଠାରୁ ମହଙ୍ଗା ବା ଦାମୀ ଜେଲ୍ ବୋଲି କୁହାଯାଏ। ଏହି ଜେଲ୍ର ନାଁ ଗୁଅନ୍ତନମୋ ବେ ଜେଲ୍। ଏହାର ଏପରି ନାମକରଣ ପଛର କାରଣ ହେଲା ଏହା ଗୁଅନ୍ତନମୋ ଉପକୂଳରେ ଅବସ୍ଥିତ। ଆମେରିକାର ଏକ ଖବର କାଗଜର ରିପୋର୍ଟ ଅନୁଯାୟୀ, ଏବେ ଏଠାରେ ପ୍ରାୟ ୪୦ କଏଦୀ ଥିବା ବେଳେ ଏମାନଙ୍କ ପାଇଁ ପ୍ରତିବର୍ଷ ପାଖାପାଖି ୯୩ କୋଟି ଟଙ୍କା ଖର୍ଚ୍ଚ ହେଉଛି। ଏହି ଜେଲ୍ରେ ପ୍ରାୟ ୧୮ ହଜାର ସୁରକ୍ଷାକର୍ମୀ ନିୟୋଜିତ ଅଛନ୍ତି। କାରଣ ସେହି ଜେଲ୍ରେ ଜଣେ କଏଦୀଙ୍କ ପାଇଁ ୪୫ ସୁରକ୍ଷାକର୍ମୀ ନିଯୁକ୍ତ ଥାଆନ୍ତି। ଏହି ସୁରକ୍ଷାକର୍ମୀଙ୍କ ପାଇଁ ପ୍ରତିବର୍ଷ ପାଖାପାଖି ୩ହଜାର ୯ଶହ କୋଟି ଟଙ୍କା ଖର୍ଚ୍ଚ ହୋଇଥାଏ। ହେଲେ କାହିଁକି ଏଠାରେ କଏଦୀଙ୍କ ପାଇଁ ଏତେ ପରିମାଣର ଅର୍ଥ ଖର୍ଚ୍ଚ ହେଉଛି ବୋଲି ମନରେ ପ୍ରଶ୍ନ ଉଠିପାରେ। ଅସଲ କଥା ହେଲା ଏହି ଜେଲ୍ରେ ସବୁଠାରୁ ବଡ ଅପରାଧୀ ରହିଛନ୍ତି। ଗଣମାଧ୍ୟମର ସୂଚନା ମୁତାବକ ୯/୧୧ ଆକ୍ରମଣର ମାଷ୍ଟର ମାଇଣ୍ଡ ଖାଲିଦ ଶେଖ ମହମ୍ମଦ ମଧ୍ୟ ଏହି ଜେଲ୍ରେ ରହୁଛନ୍ତି। ଏହି ଜେଲ୍ରେ ୩ଟି ବଡ ବଡ କୋଠା, ୨ ଗୁପ୍ତ ମୁଖ୍ୟାଳୟ ଓ ୩ ହସ୍ପିଟାଲ ରହିଛି। ଏହାସହ ଓକିଲଙ୍କ ପାଇଁ ଏଠାରେ ଅଲଗା ଅଲଗା କମ୍ପାଉଣ୍ଡ ତିଆରି କରାଯାଇଛି ଯେଉଁଠାରେ କଏଦୀମାନେ ସେମାନଙ୍କ ସହ କଥା ହୋଇପାରିବେ। ଏହାସହ ଚର୍ଚ୍ଚ, ସିନେମା ଘର, ଜିମ୍ ଓ ପ୍ଲେ ଷ୍ଟେଶନ ଭଳି ସୁବିଧା ମଧ୍ୟ ରହିଛି। ପ୍ରଥମେ ଗୁଅନ୍ତନମୋ ଆମେରିକା ନୌ ସେନା ବେସ୍ ଥିଲା ପରେ ଏହାକୁ ଜେଲ୍ କରି ଦିଆଯାଇଛି।
