ନୂଆଦିଲ୍ଲୀ,୬।୫(ପି.ଟି.): ଗତ ଦୁଇବର୍ଷ ମଧ୍ୟରେ ବିଫଳତା ବହୁତ କିଛି ଶିଖାଇଛି। ବିଫଳତାରୁ କିଛି ଶିକ୍ଷା କରିବାର କଳା ହାସଲ କରିଛି ବୋଲି କେରଳର ୨୫ ବର୍ଷୀୟ ଉଇକେଟକିପର ବ୍ୟାଟ୍ସମ୍ୟାନ ସଞ୍ଜୁ ସାମସନ କହିଛନ୍ତି। ସେ ଜଣେ ପ୍ରତିଭାସମ୍ପନ୍ନ କ୍ରିକେଟର ହୋଇଥିଲେ ମଧ୍ୟ ଅନ୍ତର୍ଜାତୀୟସ୍ତରରେ ଆଶାନୁରୂପ ସଫଳତା ହାସଲ କରିପାରି ନାହାନ୍ତି। ଗତ ୫ ବର୍ଷ ମଧ୍ୟରେ ସେ ମାତ୍ର ୪ଟି ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳିଛନ୍ତି।
ନିଜର ସାମର୍ଥ୍ୟକୁ ବୁଝିବାରେ ସଫଳ ହୋଇଛି ଓ ବିଫଳତାକୁ ଗ୍ରହଣ କରିବା ଓ ଏଥିରୁ ଶିକ୍ଷା କରିବାରେ ସମର୍ଥ ହୋଇଛି। ନିଜର ଭାବପ୍ରବଣତାକୁ ନିୟନ୍ତ୍ରଣ କରିବାରେ ମଧ୍ୟ ସଫଳ ହୋଇଛି। ମହେନ୍ଦ୍ର ସିଂ ଧୋନୀଙ୍କଠାରୁ ବହୁତ କିଛି ଶିକ୍ଷା କରିବାରେ ସମର୍ଥ ହୋଇଛି ବୋଲି ସେ କହିଛନ୍ତି। କିଛିଦିନ ତଳେ ସାମସନ ଭାରତୀୟ ଟି୨୦ ଦଳକୁ ପ୍ରତ୍ୟାବର୍ତ୍ତନ କରିଥିଲେ। ଭାରତୀୟ ଦଳକୁ ପ୍ରତ୍ୟାବର୍ତ୍ତନ କରିବା ନିଶ୍ଚିତ ଭାବେ ବଡ଼କଥା। ଦଳରେ ବିରାଟ କୋହଲି ଓ ରୋହିତ ଶର୍ମାଙ୍କ ଭଳି ବିଶ୍ୱସ୍ତରୀୟ ଖେଳାଳି ରହିଛନ୍ତି। ତେଣୁ ଭାରତୀୟ ଦଳ ସହ ମୋର ସୁନ୍ଦର ଅଭିଜ୍ଞତା ରହିଛି। କୋହଲି ଓ ରୋହିତଙ୍କ ଭଳି ଖେଳାଳି ମୋତେ ବିଶ୍ୱାସକୁ ନେବା ମଧ୍ୟ ଏକ ବଡ଼ କଥା।
ଅଷ୍ଟ୍ରେଲୀୟ ଅଭିଜ୍ଞ ବ୍ୟାଟ୍ସମ୍ୟାନ ଷ୍ଟିଭ୍ ସ୍ମିଥ୍ଙ୍କ ସହିତ ମଧ୍ୟ ମୋର ସମ୍ପର୍କ ବେଶ୍ ଭଲ ରହିଛି। କ୍ରିକେଟକୁ ନେଇ ତାଙ୍କ ଅଭିଜ୍ଞତା ଓ ଚିନ୍ତାଧାରା ଉଚ୍ଚକୋଟୀର। ତାଙ୍କ ନେତୃତ୍ୱରେ ଆଇପିଏଲ୍ ଖେଳିବାର ଅଭିଜ୍ଞାତ ମଧ୍ୟ ବେଶ୍ ଭଲ ରହିଛି। ଧୋନୀ ମୋର ଆଦର୍ଶ ଖେଳାଳି। ତେବେ ଜୋସ ବଟଲରଙ୍କ ଖେଳ ମୋତେ ପ୍ରଭାବିତ କରିଛି। ରାଜସ୍ଥାନ ରୟାଲ୍ସ ତରଫରୁ ସେ ଖେଳିଥାନ୍ତି ଓ ତାଙ୍କ ବ୍ୟାଟିଂକୁ ଉପଭୋଗ କରିଛି। ସେ ସବୁବେଳେ ତାଙ୍କ ପ୍ରଦର୍ଶନରେ ଉନ୍ନତି ଆଣିବାକୁ ପ୍ରୟାସ କରିଥାନ୍ତି ବୋଲି ସାମସନ କହିଛନ୍ତି।
