ଅନୁଗୋଳ ଅଫିସ୍/ତାଳଚେର, ୭ା୪- ଅନୁଗୋଳ ଜିଲା ତାଳଚେର ଗୋପାଳଗଡ଼ସ୍ଥିତ ଅଧିଷ୍ଠାତ୍ରି ଦେବୀ ମା ହିଙ୍ଗୁଳାଙ୍କ ବାର୍ଷିକ ଯାତ୍ରା ମଙ୍ଗଳବାର ନିରାଡମ୍ବର ଭାବେ ପାଳନ କରାଯାଇଛି। ବିନା ଶ୍ରଦ୍ଧାଳୁ ତଥା ଭକ୍ତଙ୍କ ଉପସ୍ଥିତିରେ ମାଙ୍କ ଯଥାବିଧି ପୂଜାର୍ଚ୍ଚନା କରାଯାଇଛି । କରୋନା ସଂକ୍ରମଣ ରୋକିବା ପାଇଁ ପ୍ରଶାସନ ପକ୍ଷରୁ ଜାରି କଟକଣାକୁ ମାନି ଜଣେ ହେଲେ ଲୋକେ ଯାତ୍ରାରେ ଯୋଗ ଦେଇ ନ ଥିବା ଜଣାପଡିଛି । ଫଳରେ ଯାତ୍ରାସ୍ଥଳ ପୂରା ଖାଁ ଖାଁ ହୋଇପଡିଛି । ଯାତ୍ରାରେ ପୋଲିସ ମୁତୟନ ହୋଇଛନ୍ତି। ମା’ଙ୍କ ଯାତ୍ରାକୁ ଲୋକ ଆସି ନ ଥିବାରୁ ଅନୁଗୋଳ ଏସପି ଜଗମୋହନ ମୀନା ତାଙ୍କ ଫେସବୁକ ଆକାଉଣ୍ଟ ମାଧ୍ୟମରେ ମନ୍ଦିର ପରିସରର କିଛି ଫଟୋ ଛାଡିବା ସହ ଅନୁଗୋଳବାସୀଙ୍କୁ ଧନ୍ୟବାଦ ଜଣାଇଛନ୍ତି ।
