ମାଡ୍ରିଡ୍,୧୦।୩- ଆସନ୍ତା ୧୮ ତାରିଖରେ ବାର୍ସିଲୋନା କ୍ଲବ ତା’ର ଚାମ୍ପିୟନ୍ସ ଲିଗ୍ର ପ୍ରିକ୍ୱାର୍ଟର ଫାଇନାଲରେ ନାପୋଲିକୁ ଭେଟିବ। ଏହି ମ୍ୟାଚ୍ ବନ୍ଦ ଇନ୍ଡୋର ଷ୍ଟାଡିୟମରେ ଖେଳାଯିବ। ଏ ନେଇ ଉଭୟ କ୍ଲବ ପକ୍ଷରୁ ମଙ୍ଗଳବାର ଘୋଷଣା କରାଯାଇଛି। ସେହି ଦିନ ଆହୁରି ଦୁଇ ଚାମ୍ପିୟନ୍ସ ଲିଗ୍ ମ୍ୟାଚ୍ ଖେଳାଯିବାର ଅଛି। ସ୍ପେନରେ ଭାଲେନ୍ସିଆ ଓ ଆଟଲାଣ୍ଟ ଏବଂ ପିଏସ୍ଜି-ଆଟଲେଟିକୋ ମାଡ୍ରିଡ୍ ମ୍ୟାଚ୍ ଖେଳାଯିବ। ଉଭୟ ମ୍ୟାଚ୍ ଖାଲି ଷ୍ଟାଡିୟମରେ ଖେଳାଯିବ ବୋଲି ପୂର୍ବରୁ ଘୋଷଣା କରାଯାଇସାରିଛି। ଫ୍ରାନ୍ସରେ କରୋନା ଭାଇରସ ଆକ୍ରନ୍ତଙ୍କ ସଂଖ୍ୟା ୧୪୧୨ ଛୁଇଁଥିବାବେଳେ ୨୫ଜଣଙ୍କ ମୃତ୍ୟୁ ହୋଇସାରିଛି। ଏଣୁ ଫ୍ରେଞ୍ଚ ସରକାର କୌଣସି ସ୍ଥାନରେ ଏକ ହଜାର ଲୋକ ଏକତ୍ରିତ ନ ହେବାକୁ ବାରଣ କରିଛନ୍ତି। ଅନ୍ୟପକ୍ଷରେ ସ୍ପାନିଶ କ୍ଲବ ଭାଲେନ୍ସିଆ ଓ ଆଟଲାଣ୍ଟା ମ୍ୟାଚ୍ରେ ବିଶେଷ ଆଶଙ୍କା ରହିଥିବାରୁ ଖାଲି ଷ୍ଟାଡିୟମରେ ଆୟୋଜନ କରିବାକୁ ନିର୍ଦ୍ଦେଶ ଦିଆଯାଇଛି। କାରଣ ଆଟଲାଣ୍ଟା ଦଳ ଇଟାଲି ସୁବୁଠୁ ପ୍ରଭାବିତ ହୋଇଥିବା ଅଞ୍ଚଳ ଲମ୍ବାର୍ଡିରୁ ଆସିବ। ଇଟାଲିରେ କରୋନା ଭାଇରସର ସ୍ଥିତି ସାଙ୍ଘାତିକ। ଏହି ଭାଇରସ ଯୋଗୁ ସେଠାରେ ୪୬୩ ଜଣଙ୍କ ମୃତ୍ୟୁ ହୋଇସାରିଛି। ସରକାର ଦେଶର ଫୁଟବଲ ଲିଗ୍ ସିରି ଏ’ର ମ୍ୟାଚ୍କୁଡ଼ିକୁ ଏପ୍ରିଲ ୩ ତାରିଖ ପର୍ଯ୍ୟନ୍ତ ବାତିଲ କରି ଦେଇଛନ୍ତି।
