ବନ୍ତଳା, ୫ା୩(ଡି.ଏନ.ଏ.)- ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ପମ୍ପାସର ରେଞ୍ଜ ଅଧୀନରେ ସୋମବାର ଓ ମଙ୍ଗଳବାର ୧୧ କେଭି ତାରରେ ହୁକ ପକାଇ ଏକ କୁଟୁରା ଓ ଗୟଳ ଶିକାର କରାଯାଇଥିବା ଅଭିଯୋଗ ହୋଇଛି। ଜଗନ୍ନାଥପୁର ଗ୍ରାମ ଛୁଟା ମୁଣ୍ଡା ରିଜର୍ଭ ଜଙ୍ଗଲ କମ୍ପାର୍ଟମେଣ୍ଟ ନମ୍ବର ୧ରେ ସୋମବାର ରାତି ୧୧.୩୦ ରୁ ୧୨ ଟା ମଧ୍ୟରେ ହୁକ ପକାଇ ଜନ୍ତୁ ଶିକାର ପାଇଁ ଲୁହା ତାର ବିଛାଯାଇଥିଲା। ଏହା ସଂସ୍ପର୍ଶରେ ଆସି ଏକ କୁଟୁରାର ମୃତ୍ୟୁ ଘଟିଥିଲା। ଖବରପାଇ ରେଞ୍ଜର ସୁଦୀପ୍ତା ମହାପାତ୍ରଙ୍କ ନିର୍ଦ୍ଦେଶ କ୍ରମେ ଜଗନ୍ନାଥପୁର କର୍ମଚାରୀ ସେଠାରେ ଚଢ଼ାଉ କରିବା ସହ ମୃତ କୁଟୁରା, ଶିକାରରେ ବ୍ୟବହୃତ ତାର, ବାଉଁଶ କିଳା ଆଦି ଜବତ କରିଥିଲେ। ବନବିଭାଗ ପକ୍ଷରୁ ଓଆର କେଶ୍ ନଂ. ୭ ରେ ଏକ ମକଦ୍ଦମା ରୁଜୁ କରି ମଙ୍ଗଳବାର ମୃତଦେହ ବ୍ୟବଚ୍ଛେଦ କରାଯାଇଛି। ଉକ୍ତ ଅଞ୍ଚଳଟି ବନ୍ତଳା ପ୍ରାଣୀ ଚିକିତ୍ସାଳୟ କେନ୍ଦ୍ର ଅଧୀନରେ ଯାଉଥିବା ବେଳେ ଜରପଡା ପ୍ରାଣୀ ଚିକିତ୍ସାଳୟରେ ବ୍ୟବଚ୍ଛେଦ କରାଯିବା ନେଇ ସନ୍ଦେହ ସୃଷ୍ଟି ହୋଇଛି। ସେହିପରି ଉକ୍ତ ରେଞ୍ଜ ତରଭା ବିଟ ଅଧୀନରେ ଥିବା କୁରୁ ରିଜର୍ଭ ଜଙ୍ଗଲ ଜଳେଶ୍ବରଠାରେ ମଙ୍ଗଳବାର ରାତିରେ ୧୧ କେଭି ତାରରେ ହୁକ ପକାଇ ଏକ ଗୟଳକୁ ଶିକାର କରାଯାଇଛି। ବୁଧବାର ସକାଳେ ଖବରପାଇ ବନବିଭାଗ ଗୟଳ ଓ ଶିକାରରେ ବ୍ୟବହୃତ ସାମଗ୍ରୀକୁ ଜବତ କରିଛି। ପମ୍ପାସର କେଶ୍ ନଂ. ୮ରେ ଏକ ମାମଲା ରୁଜୁ କରାଯିବା ସହ ସାତକୋଶିଆ ପ୍ରାଣୀ ଡାକ୍ତର କିଶୋର କୁମାର ସାହୁ ମୃତ ଗୟଳର ବ୍ୟବଚ୍ଛେଦ କରିଛନ୍ତି। ସେହିପରି ଅନୁଗୋଳ ବନଖଣ୍ଡ ଅଧୀନରେ ଥିବା ଅନୁଗୋଳ ରେଞ୍ଜ ପୁରୁଣାଗଡ଼ ସୋରିଷପାଳ ଗ୍ରାମ ନିକଟରେ ମଙ୍ଗଳବାର କୁକୁର ଆକ୍ରମଣରେ ଏକ ହରିଣର ମୃତ୍ୟୁ ହୋଇଛି। ଖବର ପାଇ ବନବିଭାଗ ହରିଣକୁ ଜବତ କରି ବୁଧବାର ଅନୁଗୋଳ ପ୍ରାଣୀ ଚିକିତ୍ସାଳୟରେ ବ୍ୟବଚ୍ଛେଦ କରିଛି। ରେଞ୍ଜର ସୁଦୀପ୍ତା ମହାପାତ୍ର କୁହନ୍ତି, ଶିକାରୀଙ୍କ ବିଷୟରେ ଜଣାପଡିଛି। ଅଧିକ ତଦନ୍ତ ଚାଲିଛି। ଖୁବଶୀଘ୍ର ସେମାନଙ୍କୁ ଗିରଫ କରାଯିବ।
