ବିଞ୍ଝାରପୁର,୨।୫(ଡି.ଏନ୍.ଏ.): ଯାଜପୁର ଜିଲା ବିଞ୍ଝାରପୁର ବ୍ଲକରେ ଶୁକ୍ରବାର ପ୍ରଥମ କରୋନା ପଜିଟିଭ ବ୍ୟକ୍ତି ଚିହ୍ନଟ ହୋଇଛନ୍ତି। ସେ ବିଞ୍ଝାରପୁର ବ୍ଲକ କଲ୍ୟାଣପୁର ଗ୍ରାମର ୬୩ ବର୍ଷିୟ ବୃଦ୍ଧ ବୋଲି ଜଣାପଡିଛି। ଗତ ମାର୍ଚ୍ଚ ୨୯ ତାରିଖରେ ବୃଦ୍ଧ ଏକ ବୋଲେରୋ ରିଜର୍ଭକରି କଲିକତାରୁ ଗ୍ରାମକୁ ଫେରିଥିଲେ। ଏହି ଗାଡିରେ ଉକ୍ତ ଗ୍ରାମର ଅନ୍ୟ ୪ଜଣ ବ୍ୟକ୍ତି ଆସିଥିବା ଟ୍ରାଭେଲ ହିଷ୍ଟ୍ରିରୁ ଜଣାପଡ଼ିଛି। ଏହି ଗାଡ଼ିରେ ଆସିଥିବା ସମସ୍ତ ବ୍ୟକ୍ତିଙ୍କୁ ପ୍ରଶାସନ ପକ୍ଷରୁ ସଂଗରୋଧରେ ରଖାଯିବା ସହ ସେମାନଙ୍କର ସ୍ବାବକୁ ପରୀକ୍ଷା ନିମନ୍ତେ ପଠାଯାଇଥିଲା। ତେବେ ଅନ୍ୟମାନଙ୍କର ନେଗେଟିଭ ବାହାରିଥିବା ବେଳେ ମାତ୍ର ଜଣଙ୍କର ପଜିଟିଭ ବାହାରିଛି। ଏହି ଘଟଣା ଜଣାପଡିବା ପରେ ସମଗ୍ର ବିଞ୍ଝାରପୁର ଅଞ୍ଚଳରେ ଆତଙ୍କ ଖେଳିଯାଇଥିବାବେଳେ ପ୍ରଶାସନ ପକ୍ଷରୁ ବ୍ୟାପକ ସର୍ତକତା ଅବଲମ୍ବନ କରାଯାଇଯାଇଛି।
